Arangkada of Leo Lastimosa for December 13, 2011

        Taya ni Corona


    Mahimong mas sayo ang pasko ni kanhi presidente Gloria Arroyo karong tuiga.  Di na gani siya kinahanglang magpaabot nga aprobahan ni Pasay City Regional Trial Court Jesus Mupas ang petisyon nga tugotan siyang makapauli sa iyang bay sa La Vista Subdivision sa Quezon City.  Karong semanaha mahimong makagawas na siya.  Di lang sa Veterans Memorial Medical Center, kon dili mahimong mahinayon na gyod ang nabaraw niyang paggawas sa Pilipinas.
    Kana kon mangiyugpos lang ang Malakanyang sa gikahadlokan nga pagbasura sa Korte Suprema sa legalidad sa joint panel sa Department of Justice (DOJ) ug Commission on Elections (Comelec) nga maoy naghimo sa pasiunang imbestigasyon sa kasong electoral sabotage nga maoy nakapapriso ni Arroyo.

-o0o-

    Bisan sa kadaghan sa mga petisyon nga nag-ung-ong sa Korte Suprema, nga pulos nag-awhag nga di manginlabot si Chief Justice Renato Corona paghusay sa petisyon, mahimong si Corona gihapon ang mangu sa mga mahistrado pagtuki sa petisyon nga gipasaka nilang kanhi presidente Arroyo ug kanhi first gentleman Mike Arroyo.
    Sa iyang pagdeklarar og gubat sa giingong mga lakang pagpalagpot niya sa katungdanan, si Corona nipasidaan nga mohimo siya og mas determinadong mga lakang pagpanalipod di lang sa iyang kaugalingon kon dili ug labi na sa kaligdong sa institusyon sa mga hukmanan.  Gidasig niya ang ubang mga maghuhukom sa pagduyog sa iyang kawsa.

-o0o-

    Apan dunay igong numero si Presidente Noynoy Aquino sa House of Representatives pag-impeach ni Corona.  Ang lalisan na lang mao nga mahimo bang diretsuhon pagtuki ang impeachment complaint sa hawanan sa House, o kinahanglan pang iagi sa nagkalainlaing komitiba.  Bisan unsaon paglaktod ang impeachment process, mahimong makabiya na sa nasud si Arroyo ug dako ang kahigayonan nga di na mobalik pag-atubang sa nagbuntaog nga mga kaso batok niya.
    Di hinuon hingpit nga inutil ang mga kaatbang ni Arroyo.  Mahimo nilang apurahon ang Ombudsman pagpasaka sa mga kasong plunder sa Sandiganbayan.  Kon mahitabo na, way mahimo silang Corona ug kaubanan pagpugong sa pagluwat og laing arrest warrant batok ni Arroyo.

-o0o-

    Maniid ta sa timaan sa mosunod nga mga panghitabo.  Kon mo-inhibit si Corona, o kon ibasura sa Korte Suprema ang petisyon sa magtiayong Arroyo ug ipatigbabaw ang legalidad sa pagpasaka sa kasong electoral sabotage, mahibawo na ta kinsay unang mamilok ning bugno sa higanteng mga institusyon.
    Si Corona, bisan nagpailang maoy bag-ong kampeyon sa kaligdong ug hustisya, di kapapas sa iyang kagahapon.  Siyay chief of staff, presidential legal counsel ug executive secretary sukad sa pagka bise presidente ni Arroyo sa 1998 hangtod nga nakapuli sa Malakanyang.  Si Arroyo say nagtudlo niyang chief justice bisan gidili na unta niadtong 2010.  Kon tinuod nga duna siyay kaligdong ug nagtamod sa hustisya, nahibawo si Corona unsay iyang buhaton.  [30]  leo_lastimosa@abs-cbn.com

Arangkada of Leo Lastimosa for December 12, 2011

        Libro ni Glo


    Dugayng mahuman ang librong gisuwat ni kanhi presidente Gloria Arroyo kon di uyonan sa korte ang iyang awhag nga pagamiton siya og laptop.  Ang unang 40 ka pahina nasuwat na niya pinaagi sa laptop sa P50,000 matag adlaw nga presidential suite sa St. Luke's Medical Center sa wa pa siya ibalhin sa Veterans Memorial Medical Center niadtong Biyernes.  Ang mosunod nga mga pahina iyang suwaton pinaagi sa ballpen ug yellow pad sa mosunod nga mga adlaw.
    Gipahibawo ni Arroyo nga ang iyang libro mag-ulohan og "Another Stone for the Edifice".  Nga iyang dason sa libro sa iyang amahan, anhing presidente Diosdado Macapagal, nga siya say naghatag sa ulohan nga "A Stone for the Edifice".

-o0o-

    Pipila sa mga nakabasa sa libro sa iyang amahan niingon nga si Arroyo ang labing naigo sa gisulti ni Macapagal nga, "I regard integrity and a capacity for self denial as the prime requisites for the presidency."  Nikanaog si Arroyo sa katungdanan uban ang kaligdong nga hingpit nga nabuong.
    Sa siyam ka tuig niya sa Malakanyang, samang palasyo nga giduma sa iyang amahan gikan sa 1961 hangtod sa 1965, si Arroyo wa pakita og bisan gamay na lang timaan sa pagsakripisyo sa iyang kaugalingong mga panginahanglan.  Hinunoa gigamit ang iyang buhatan pagpaburot pag-ayo sa iyang personal nga panudlanan.

-o0o-

    Ang ulohan sa libro nga gisuwat ni Arroyo gigamit na hinuon sa usa sa duha ka libro nga iyang gipagawas dayong kapupos sa iyang termino isip presidente niadtong 2010.  Ang "Beat the Odds:  Another Stone for the Edifice" gipa-edit ni Arroyo sa iyang kanhi tigpamaba nga si Gary Olivar.  Ang laing libro nag-ulohan og "Beating the Odds."  Ang duha ka libro pulos naglista sa mga nahimo sa siyam ka tuig nga pamunoan ni Arroyo.
    Hinaot nga di magbalikbalik ang mga unod sa mga libro ni Arroyo, sama sa nagbalikbalik nga mga ulohan.  Kay gilangaw na ang unang duha, ambot unsay dangatan sa ikatulo.

-o0o-

    Mopalit ug mobasa ko sa bag-ong libro ni Arroyo kon sa kataposan iya nang tubagon ang mosunod nga mga pangutana:

• Nganong siya may naunay sa iyang pagpangespiya ni kanhi Comelec commissioner Virgilio Garcillano aron kapugngan nga mobali sa oposisyon?;
• Giunsa man gyod niya pagkuha ang kapin sa milyon ka boto nga mayoriya batok ni Fernando Poe Jr.?;
• Pila man gyoy iyang nabolsa sa NBN-ZTE nga gibiyaan mang himatyon niyang bana aron pagsaksi sa pinirmahay sa kauyonan sa Hainan, China niadtong 2007?;
• Nganong nakaako man siya pagbukubuko sa iyang kandidato pagka presidente sa 2010 nga si kanhi defense secretary Gibo Teodoro?; ug
• Kinsa man ang mga kardinal ug mga obispo sa Simbahang Katoliko nga iyang natental og dagkong suburno ug tagpila man?  [30]  leo_lastimosa@abs-cbn.com

Arangkada of Leo Lastimosa for December 10, 2011

        Pagbalhin ni Gloria


    Ang kampo ni kanhi presidente Gloria Arroyo, nga wa pa gyong kadawat nga napakyas ang Korte Suprema pagpalayas sa ilang idolo gikan sa nagbuntaog nga mga kaso nga ilang giatubang, nagsige og balikbalik nga sundon nila ang tanang kamandoan sa mga hukmanan.  Apil nang sa Pasay City Regional Trial Court nga nipabalhin ni Arroyo gikan sa St. Luke's Medical Center ngadto sa Veterans Memorial Medical Center.
    Apan nabantang atol sa pagbalhin ni Arroyo nga sila diay magbuot unsaon pagpatuman ang sugo sa korte.  Kon imong paminawon ang mga turutot ni Arroyo nga gipangulohan ni Ma. Elena Bautista-Horn, silay magbuot unsay sakyan ni Arroyo ug unsang orasa sila mobiyahe.

-o0o-

Inay itugyan ngadto sa kapolisan ang katungod sa pagpili sa labing maayong paagi ug labing tukmang oras sa pagbalhin ni Arroyo, silay nagsige og pabuwa sa ilang baba.  Kay gawas nga maoy gitahasan ni RTC Judge Jesus Muplas pagbalhin ni Arroyo, ang kapolisan sab ang labing takos nga nihikyad sa kinatibuk-ang seguridad ug nisubay sa labing hapsay nga ruta.

Nikalit lang sab pagkahimong eksperto sa kahimtang sa panahon silang Horn ug kaubanan.  Silay nagbuut-buot pagdeklarar nga di luwas ang pagpasakay ni Arroyo sa chopper tungod sa pagsigeng uwan.  Mas kusog ang uwan dihang nilupad ang among ayroplano gikan sa NAIA paingon sa Mactan.  Luwas ang among biyahe ug dako pa kong buhi nga nagsuwat ini.

-o0o-

Di hinuon mabasol si Arroyo nga magduda sa kaluwas sa choppers sa kapolisan.  Kay siya ang labing suhito sa mga pasangil nga gibaligya sa iyang bana ang duha ka ginamit nga choppers isip brand new ngadto sa kapolisan.  May sukaranan siyang magduda sa pasalig ni DILG Secretary Jesse Robredo nga mas bag-ong chopper ang pasakyan niya.

Hilas paminawon si Horn nga ang dakong gasto sa gobyerno pag-andam sa chopper mas kapuslan unta kon giapud-apod pa sa mga kabos.  Klarong napakyas si Horn pagbaraw sa daghan uyamot nga mga transaksiyon sa pag-usik-usik nga nahimong sukaranan sa daghang kasong plunder nga napasaka na batok ni Arroyo.

-o0o-

    Bisan nahinayon ang pagbalhin ni Arroyo, nagsige og pasangil silang Horn ug kaubanan nga gituyo ni Presidente Noynoy Aquino ang paglangay sa biyahe.  Aron maka-organisar ang mga kaatbang ni Arroyo sa paglusad og mga protesta sa kadalanan nga maagian sa convoy.  Wa gyod silang kaamgo nga way kalangay nga nahitabo kay ang sugo sa korte mao man nga ibalhin siya sa Biyernes--sa ato pa, gikan sa alas-12:01 sa kadlawon hangtod sa alas-11:59 dayong tungang gabii.
    Nitanyag si Horn nga mag-taxi na lang si Arroyo paingon sa VMMC.  Klarong nakalimot siya, o si Horn mismo wa motuo sa iyang pasangil, nga dunay "Oplan Put the Little Girl to Sleep."  [30]  leo_lastimosa@abs-cbn.com

Arangkada of Leo Lastimosa for December 5, 2011

Kurog ang DepEd?


Ang pagpanikas sa National Achievement Test (NAT) usa ka seryusong kalapasan.  Gawas nga di makiangayon ngadto sa mga tinun-an, apil na ang nagtinarung pagtubag sa mga pangutana ug ang mga gitudloan sa tubag o gihatagan og kodigo sa pasulit, mapangahason sab ning sabotahe sa mga paningkamot sa gobyerno sa makanunayon nga pagsubli ug pagpalambo sa sistema sa edukasyon sa nasud.
Ang NAT nga gipakuha sa pipila ka mga tinun-an sa elementarya ug high school sa publiko ug pribadong mga tulonghaan matag Marso matag tuig mohatag sa Departamento sa Edukasyon (DepEd) og kasayuran unsay nakat-onan sa mga bata sa nagkalainlaing subjects.  Kon tikason ang NAT, malikoy ang giya sa DepEd paghimo og mas makahuloganon nga curriculum.

-o0o-

Mao nga dihang nabisto ang pagpanikas sa NAT dinhi sa Sugbo ug ubang bahin sa nasud naalarma pag-ayo ang mga ginikanan ug ubang nagpakabana nga mga sektor sa katilingban.  Ang mga magtutudlo maoy gitahasan sa pag-umol sa panghunahuna sa atong kabataan.  Unsa may kaugmaon ning nasura kon pagpangopya ug pagpanikas nay ilang itudlo?
Nisaad dayon ang DepEd og makuti nga imbestigasyon.  Kaingon gyod nako nga ilang tinud-on.  Apan nahilom ang mga imbestigasyon sa ubang mga lalawigan.  Labihang langaya sa imbestigasyon sa mga pasangil dinhi sa Sugbo.  Ug dihang napamatud-an nga may tikas gyong nahitabo, igo rang gisuspenso ang tigpasiugda.

-o0o-

Ang Cebu City Division maoy nakadawat sa pasangil nga si Jessica Abayon, prinsipal sa Ramon Duterte Memorial National High School, nanghatag og kodigo ug pagkaon sa mga tinun-an nga nikuha sa NAT niadtong Marso 2010.  Naabtan og Disyembre ang buhatan ni Superintendent Rhea Mar Angtud pagrekomendar og silot batok ni Abayon.
Apan ang silot labihang gaana.  Morang bugalbugal.  Human yak-i ang kaso og siyam ka buwan, gideklarar nilang Angtud ug kaubanan si Abayon nga sad-an og "simple negligence."  Kasaba ray silot nga ilang gisugyot.

-o0o-

Nakapangawot og di katol si DepEd 7 Regional Director Recaredo Borgonia.  Di niya mahimong tumanon ang rekomendasyon nilang Angtud atubangan sa kaseryuso sa nagpamatud-an nga pagpanikas ni Abayon sa NAT.  Gisugo ni Borgonia ang mga abogado sa iyang buhatan pagsubli sa kinatibuk-ang imbestigasyon.  Naabtan sila og 11 ka buwan una nakakita og mas bug-at nga silot batok ni Abayon:  Tulo ka buwan nga suspenso tungod sa "simple dishonesty."

Ambot unsay nakapalikoy sa DepEd ning kaso ni Abayon.  Ang hulga bang Abayon nga mosumbalik siya og kiha.  O ang gidungog bang kasuod ni Abayon ni Cebu City Vice Mayor Joy Augustus Young.  Kinsa kusganong nihimakak sa pasangil apan nihatag og dugang sukaranan sa pagduda.  Dihang nisumbalik pagpasangil si Young nga igo lang gibawosan si Abayon sa mga magtutudlo nga nasakpan nga ligoy sa pagduma sa ilang mga klase.  [30]  leo_lastimosa@abs-cbn.com

Arangkada of Leo Lastimosa for December 4, 2011

Suwat ni Glo


Hinigugma kong mga Sugbuanon,
Ayaw mo kahibulong nganong larino kong mag-Binisaya.  Nakapuyo mi sa Iligan ug sige kong duaw sa Sugbo niadtong DTI undersecretary, senador, bise presidente ug presidente pa ko.  Pasayloa nga di na kong kaduaw ninyo kay hapit na ko nila ibta gikan diri sa nindot kaayo nakong kuwarto sa St. Luke's Medical Center aron ibalhin sa Veterans Memorial Medical Center nga nanimahong uk-ok.
Pahinumoman mo nako sa kapin sa milyon ka boto nga mayoriya nga inyong gihatag nako niadtong 2004 (dako hinuon kog gasto kay hapit tanang kandidato akong gigastohan).  Pero samang mayoriya inyong gihatag sa laing kandidato pagka presidente sa 2010.  Siya karoy nagdaugdaog nako.  Maong nagsuwat ko pagpahibawo nga balimbing mong dagko!

-o0o-

Nagsuwat sab ko aron pagklaro nga way bisan usa sa inyong mga politiko, nga kaniadto sipsip kaayo nako ug sa akong pamilya, ang niduaw ug nangumusta.  Nahadlok tingaling makit-an o mahibaw-an sa mga naglingkod ron sa Malakanyang.  Labaw pa silang balimbing!
Kay wa pa man ko kuhaig cellphone ug internet, akong nahibaw-an nga gibuhi sa bag-ong Ombudsman ang karaan nang mga kaso sa gikuwestiyon nga mga transaksiyon sa Sugbo nga giyak-an ni Merci Gutierrez (kon nahibaw-an pa nako nga labihan diayng talawana, maayo pag lain akong gitudlo).  Di layo ang kahigayonan nga maposasan ang mga hingtungdan.  Ngadto nilang tanan, mirisi!

-o0o-

Nagpabilin hinuong matinud-anon ang mga opisyal sa simbahan.  Silay labing unang nituo nga grabe akong sakit (bisan gibisto sa naapiki nakong mga doktor ngadto sa Pasay City Regional Trial Court nga maayo na ko).  Silay dagko kaayog tingog nga palargahon ko (bisan nabisto nang sipyat sa amaw nakong abogado nga kuwang diayng among requirements).  Ug silay labing unang nidason nga i-house arrest lang ko.
Wa gyod diay maanugon ang binilyon ka pesos nga pundo sa PCSO.  Bahala na nga ang uban nahibaw-an nga namalit og luhong mga sakyanan.  Mas daghan ang nahatagan nako og mas dagko nga naghilumhilom lang.  Ginoo na lay bahala nila.

-o0o-

Pahinumdom sab sa dagko nakong proyekto.  Apil nang North Coastal Road sa Paknaan (wa hinuon kapusli tungod sa binuang nga rerouting sa Mandaue) ug decorative lampposts (anugon wa kaapil og pirma si Tommy Osmeña).
Nahibawo kong may makabasa ini nga hasulon sa konsiyensiya.  Ug mahuwasan sa amnesia nga puwerteng daghanang pabor nga akong nahatag nila.  Tagsatagsa lang mog duaw kay mas apiki akong kuwarto sa Veterans.  Istoryahan nato nga nasakpan gyod diay ni KC si Piolo sa kuwarto.  Hangyo:  Ingna nang politiko sa Sugbo nga ganahanng magkanta-kanta nga ayaw paduawa.  Kay tingalig matinuod ang giimbento nga Elena Bautista-Horn nga "Oplan Put the Little Girl to Sleep."
Nagmingaw,
Gloria
(Dinasig sa Professional Heckler)  [30]  leo_lastimosa@abs-cbn.com

Arangkada of Leo Lastimosa for December 2, 2011

Unli nga bakak


Kon tuohan ang pangangkon sa kampo ni kanhi presidente Gloria Arroyo nga dunay mga hulga batok sa iyang kinabuhi, tigpaminaw sa Arangkada sa DYAB Abante Pa, Bisaya! nisugyot nga ang labing haom nga pahimutangan niya di ang St. Luke's Medical Center.  Ni ang iyang bay sa La Vista Subdivision sa Quezon City.
Kon dili ang Southern Police District (SPD) headquarters nga dunay hurisdiksiyon sa Pasay City, diin nahimutang ang korte nga mohusay sa iyang kasong electoral sabotage, ug sa Taguig City, nga maoy nahimutangan sa iyang kinaham nga tambalanan.  Kay 24 oras matag adlaw ug pito ka adlaw matag semana nga dunay mga polis nga magbantay niya.

-o0o-

Apan nakit-an ni Pasay City Regional Trial Court Jesus Mupas nga ang kuwarto nga gi-andam sa SPD alang ni Arroyo--nataoran na tuod og bag-ong aircon, nabag-ohan na tuod og pintal ug napalitan na tuod og mas hunulhunol nga higdaanan--way iyang kaugalingong pansayan.  Bisan unsa pay imong tan-aw ni Arroyo, mouyon tingali kang Mupas nga di makiangayon nga paipunon si Arroyo sa kumon nga pansayan sa mga polis ug mga piniriso sa SPD.
Maong way nisupak sa napilian ni Mupas nga balhinan ni Arroyo:  Ang Veterans Memorial Medical Center (VMMC).  Bisan si Arroyo maglisod pagbalibad.  Kay ang VMMC man ang iyang gipahimutangan ni kanhi presidente Joseph Estrada niadtong siya pag nagtungkawo sa gahom.

-o0o-

Salamat na lang nga si Mupas wa ma-influencia sa bisan unsa na lang nga mga pangangkon sa mga turutot ni Arroyo.  Sa iyang sala nabisto nga di tinuod nga himatyon si Arroyo, nga maayo na diay ang iyang panglawas, ug nga di gani diay angayng magpabilin sa tambalanan.
Klarong gitumong paglibog ni Mupas ang pagdalidali pagpaggawas ni Elena Bautista Horn, ang gikaintapan nga tigpamaba ni Arroyo, sa giingon niyang "Operation Put the Little Girl to Sleep."  Naggusbat na pag-ayong kaligdong nilang Horn ug sa iyang amo nga nahimong lang hinuong kataw-anan ang labing uwahi nilang pangangkon.

-o0o-

Ang siyam ka tuig nga pamunoan ni Arroyo nabulit sa pamakak--gikan sa pagpasiugda sa higanteng maniobra pagpalagpot ni Estrada sa Malakanyang sa 2001, sa iyang panumpa nga di modagan sa 2004, sa iyang pagsabotahe sa piniliay batok ni anhing Fernando Poe Jr., hangtod sa tanang eskandalo nga iyang giluto sa palasyo hangtod sa kataposang mga gutlo sa iyang pamunoan sa 2010.
Tukma kaayo nga samang way kukaikog nga pamakak ang padayon niyang gikapyotan karong nawagtang na sa Malakanyang.  Gipakaingon tingaling Arroyo ug sa iyang mga turutot nga labihang bugoa na lang gyod sa katawhang Pilipinhon.  Nga human nila tikasi, kawati, abusohi, pahimusli ug yatakyataki sud sa siyam ka tuig, magpatara, mangiyugpos ug magyanguyango lang gihapon pagpaabot sa mosunod pa ug way kinutoban nila nga pagpanikas, pagpangawat, magpangabuso, pagpahimus ug pagpanamastamas.  [30]  leo_lastimosa@abs-cbn.com

Arangkada of Leo Lastimosa for December 1, 2011

Husay ni Bonifacio



Niang kabahin sa testimoniya ni Andres Bonifacio sa court martial nga giduma nilang Koronel Pantaleon Garcia ug Major Lazaro Makapagal niadtong Mayo 4, 1897 sa Naic, Cavite nga nisilot niya og kamatayon sa pasangil nga naglaraw paglumpag sa gobyerno ug pagpapatay ni Emilio Aguinaldo (ang kinatibuk-ang transcript gimantala ni Teodoro Kalaw niadtong 1926):
"Ang mga sundawo niabot sa bay nga akong gipuy-an (sa Limbon, Indang, Cavite).  Ang ilang pangu (si Koronel Agapito Bonzon) nananghid nga makigsulti nako.  Nisaka siya sa hagdanan ug nipasabot nga gisusi nilang mga huhungihong nga ang akong mga sakop mobanhig nila.

-o0o-

"Pagkakita niya nga ang akong mga sakop nagpabilin sa ilang mga bay, nangayo siya og pasaylo.  Ako siyang gipasaylo ug gipasanginlan ang mga kaaway nga maoy nangintriga.  Nagsawo mig kaon ug dihang nanamilit ako siyang gipabawonan og pipila ka kahang sigarilyo.

"Human sa pila ka gutlo, gipahibawo kong gilibotan sa mga sundawo ang akong mga sakop, way usa nilang gipabiya ug gisakmit ang mga armas sa mga nibiya.  Gisiksik ang kabalayan ug gidakop ang mga magamit nga saksi.  Akong gipasusi ang kasayuran.  Nagpada ko og tulo ka mensahero, silang Kapitan Martin sa Silang, Santos Nocom ug pagka alas-10 sa gabii si Dorong Puti.  Giingnan sila nga di kinahanglang mopasabot ang mga sundawo.  

-o0o-

"Pagka sunod buntag, ang mga sundawo ni Koronel Yntong (Agapito Bonzon) nagpabuto og kalima ginamit ang Mauser.  Wa mobawos ang akong mga sakop.  Gisinggitan nako si Major Benito Torres nga way magpabuto kay ang mga sundawo among mga igsuon ug angayng magsabot ang mga opisyal sa duha ka pundok.

"Apan gitionan sa mga sundawo ang akong mga sakop ug gisiyagitan nga ang way uwaw nga "Supremo," nga nikawat sa ilang kuwarta, kinahanglang moatubang nila.  Akong giduol ug gigakos ang mga sundawo ug giingnan,  "Akong mga igsuon, wa koy gihimo nga pakauwaw ug wa manghilabot og kuwarta."

"Nagpabuto ang sundawo nga gisugo sa usa ka major.  Ang bala niagi sa akong abaga ug niigo sa dughan sa tawo sa akong luyo.  Nisinggit na sab ko, "Mga igsuon, tan-awa ang inyong gipatay.  Tagalog siya sama ninyo."  Wa sila maminaw, namusil hangtod nga natumba ko.  Giduol ko og opisyal ug gibunalan sa akong tutonlan.

-o0o-

"Si Koronel Yntong nipugos sa akong asawa pagkuyog niya sa bay nga way laing tawo aron pagbuong sa iyang kadungganan.  Salamat sa pagpugong sa ubang opisyal, wa matuman ang daotan niyang tinguha.

"Pag-abot namo sa Indang, ang major nisuway pagsakmit sa akong asawa, nga nag-atiman sa akong samad.  Salamat sa iyang pakiluoy ni Tomas Mascardo, nga naatol nga didto pagkahitabo, wa siya makuha.

"Mao ra ni ang akong ikasulti sa ngan sa Ginoo ug sa akong Yutang Natawhan.  Ang katawhan sa Limbon ug bisan ang mga opisyal ug mga sakop ni Koronel Yntong makamatuod sa akong gipanulti."

Arangkada of Leo Lastimosa for November 29, 2011

Si Glo ug ang kartero


Haskang hilasa sa mga turutot ni kanhi presidente Gloria Arroyo nga nipasidaan nga makadaot sa kadungganan sa nasud kon prisuhon ang ilang amo.  Matod nila maubos pag-ayo ang tan-aw sa ubang kanasuran kon di tang kahatag og tukmang respeto ngadto sa kanhi presidente.  Nipadayag sila og kahadlok nga ang langyawng mga negosyante moislag ug di na mobubo sa ilang puhonan dinhi kon isipon sa pamunoan ni Presidente Noynoy Aquino nga ordinaryong sinumbong si Arroyo.
Ambot diing langoba nagpuyo ang mga itoy ni Arroyo.  Ambot nganong alang nila mora man og mas dakong atraso ang pagtaral ni Arroyo sa hukmanan kay sa pagtino nga makatubag inay magdalidali siya og ikyas.

-o0o-

Angayng pahibaw-on silang Arroyo ug iyang mga kakonsabo nga:

• Di makadaot alang sa Pilipinas kon hingpit nga ipatuman ang balaod bisan kinsay hingtungdan ug bisan kinsay maig-an, ma-kanhi presidente o ma-basurero man;
• Di maubos ang pagtan-aw sa ubang kanasuran kon igo lang ipatigbabaw ang sistema sa hustisya bisan batok sa mga sinumbong nga modemanda nga tahuron sila; ug
• Di mahitabong moislag ang langyawng mga negosyante kon sama sa ordinaryong mga sinumbong paninglan sab silang Arroyo ug ubang mga hawod sa kuwestiyonable nilang mga transaksiyon, labi na kadtong nakaapiki sa mga negosyante--lokal man o langyaw.

-o0o-

Angayng pasabton silang Arroyo ug iyang mga turutot nga:

• Ang labing dakong tinubdan sa kauwawan sa Pilipinas mao ang atong kapakyas paggukod sa labing dagkong mga opisyal sa gobyerno nga nagpatuyang paglimas sa nasudnong katigayonan;
• Ang ikaduhang labing dakong tinubdan sa atong kauwawan mao ang atong daling paghikalimot sa mga atraso, pagpadani sa kinawat nga kuwartang ipabaha atol sa kampanya ug buta nga pagpili bisan sa labing kawatan ug abusado; ug
• Posibleng magpadayon ang duha ka labing dagko natong kauwawan kon sama sa nangaging mga kawatan palutson lang gihapon si Arroyo, hatagan og mas dakong importansiya ang pagtahud sa iyang kanhi buhatan, inay pagpriso ug pagsilot niya.

-o0o-

Maong daghang nihangop sa pagpangunay ni Pasay City Regional Trial Court Judge Jesus Mupas pagsusi sa posibleng kabalhinan ni Arroyo kon mogawason na sa St. Luke's Medical Center.  Labi na nga giapil pagsusi ni Mupas ang Southern Police District headquarters nga nanglimpiyo ug namintal na sa ilang kanhi press office alang sa kanhi presidente.
Gisusi sang Mupas ang Philippine Orthopedic Center, Veterans Memorial Medical Center, Veterans Memorial Medical Center ug AFP Medical Center.  Giapil sab hinuon ang bay ni Arroyo sa La Vista Subdivision sa Quezon City.
Hinaot nga ang init nga pagsunod sa katawhan sa kaso makapahinumdom nilang Mupas ug sa tanang hingtungdan nga sa mga mata sa balaod nga ang bugtong kalainan nilang Arroyo ug sa kartero nga gipasanginlang nangawat sa P200 sa suwat nga iyang gihatod mao nga ang nauwahi makapiyansa alang sa iyang temporaryong kagawasan.  [30]  leo_lastimosa@abs-cbn.com

Arangkada of Leo Lastimosa for November 28, 2011

Sukmat sa tanlag


Kinsa may angayng silotan:  Ang namakak?  O ang wa motuo sa bakak?
Gikatakdang hukman sa Korte Suprema karong semanaha ang petisyon ni kanhi presidente Arroyo nga angayng sagpaon og contempt ang mga nisupak sa temporary restraining order (TRO) batok sa watchlist order (WLO) nga giluwatan sa Department of Justice (DOJ) batok sa magtiayong Arroyo:

• Ipatigbabaw ba lang gihapon nilang Chief Justice Renato Corona ug sa mayoriya sa mga mahistrado ang napamatud-ang bakak nga pangangkon ni Arroyo nga grabe ang iyang kahimtang ug nga kon di siya palargahon mahimong di na maayo ang iyang sakit?; ug
• Silotan ba gyod si Justice Secretary Leila De Lima nga napamatud-ang sakto sa iyang pagduda sa pangangkon ni Arroyo?

-o0o-

Kon hinayunon lang gihapon nilang Corona ug kaubanan ang pagsagpa og contempt nilang De Lima ug sa mga kawani sa Buro sa Imigrasyon nga nibabag sa paglarga unta ni Arroyo agi sa Ninoy Aquino International Airport (NAIA) niadtong Martes sa gabii, mapamatud-an na gyod ang pagduda sa katawhan nga di diay sila tinuoray nga mga alagad sa hustisya kon dili mga itoy diay ni Arroyo nga maoy nagtudlo nila.
Kon gusto nilang Corona ug kaubanan nga mamawi, ug aron pagmatuod nga di sila konsabo ni Arroyo, angay silang mangayo og pasaylo sa ilang pagdalidali pagluwat og TRO sa way pagpaminaw sa mga argumento sa gobyerno, nga makabisto unta og mas sayo sa pamakak ni Arroyo.

-o0o-

Ug kon tinuoray gyong nagpakabana ang Korte Suprema sa pagpanalipod sa kaligdong sa sistema sa hustisya sa nasud, angayng sublion ang salida sa mga abogado ni Arroyo.  Silang Atty. Ferdinand Topacio ug Atty. Raul Lambino nagpatuyang pag-imbento og bisan unsa na lang sakit nga mahunahunaan alang sa ilang kliyente.

Dihang nagdumili ang mga doktor sa St. Luke's Medical Center pagdason sa ilang mga bakak, labi nang pagpamugos nila pagpapirma sa certification nga si Arroyo dunay bag-ong injury sa iyang lower spine, nagdalidali silang Topacio, Lambino ug ubang mga abogado pagpahibawo sa Pasay City Regional Trial Court nga makahimo na diay si Arroyo pagbiya sa ospital ug busa angayng nang i-house arrest.

-o0o-

Labaw sa tanan, angayng tagsatagsaon nilang Corona ug kaubanan pagpaminaw ang ilang konsiyensiya unsay tubag sa mosunod nga mga pangutana:

• Padayon ba silang mopalabi sa giisip nga obligasyon pagbayad sa dakong utang kabubut-on sa pagtudlo ni Arroyo nila sa labing taas nga hukmanan; o
• Sugdan na ba pagsalikway ang personal nilang interes ug mao nay ipatigbabaw ang mas mahinungdanong interes sa nasud ug sa katawhan; o
• Di na lang moapil paghusay sa mga kaso nga magkabangga ang mga interes ni Arroyo ug sa nasud; o
• Kon wa gyoy igong kaligdong ug kaisog pagpatigbabaw sa hustisya, di kaha maayong mosunod silang kanhi Ombudsman Merceditas Gutierrez pagpili sa mas malinawong pagretiro?  [30]  leo_lastimosa@abs-cbn.com

Arangkada of Leo Lastimosa for November 27, 2011

Duha ka sipyat


Karong nabisto nang kamatuoran sa kontrobersiya sa pagbiya unta ni kanhi presidente Arroyo aron magpatambal sa gawas sa nasud, nabantang sab ang labing menos duha ka sayop nga nahimo sa Korte Suprema:

• Giluwatan nila ang temporary restraining order (TRO) bisan wa pa mahingpit ang panginahanglan sa pagtudlo ni Arroyo og legal nga representante sa iyang mga kaso samtang tua siya sa gawas sa nasud; ug
• Nagpailad sila sa pangangkon ni Arroyo nga grabe kaayo ang iyang kahimtang, nga way doktor nga takos nga makatambal niya dinhi ug nga kon di siya palargahon dayon kuyaw nga di na maayo ang iyang sakit.

-o0o-

Di makapangangkon silang Chief Justice Renato Corona ug ang mayoriya sa mga mahistrado nga nisunod niya nga nalipat lang sila.  Ang mga doktor sa St. Luke's Medical Center niluwat og certification nga maayo na si Arroyo ug nga kon way komplikasyon mahibalik nang naandan niyang kahimsog sa mosunod nga unom ngadto sa walo ka buwan.  Apan ambot unsay nakaon nilang Corona ug kaubanan gilaktawan nila ang certifications.
Gipahibawo sab sila sa dakong sayop sa special power of attorney nga gihatag ni Arroyo ngadto ni Atty. Ferdinand Topacio.  Apan bisan pa sa nabisto nga buslot, niinsistir silang Corona ug kaubanan pinaagi sa pinangga nilang tigpamaba nga si Jose Midas Marquez nga epektibo ang TRO ug nga angayng motuman ini si Justice Secretary Leila De Lima.

-o0o-

Di hinuon tang kapaabot nga moangkon ang Korte Suprema sa ilang kasaypanan.  Labaw nang di tang kapaabot nga mangayo og pasylo sa ilang mga sipyat sa mga kaso ni Arroyo.  Sama nga wa sila moangkon nga nasayop sa pagbalitok sa kaso sa Philippine Airlines (PAL).  Sama nga wa mangayo og pasaylo sa kadaghan uyamot nga pagbalibali sa legalidad sa 16 ka labing bag-ong mga dakbayan.
Kay ang tanang hukom sa Korte Suprema mamahimong balaod.  Wa tay laing kapilian gawas sa pagtuman.  Hangtod nga ang mga mahistrado mobali sa ilang mga baruganan.

-o0o-

Apan ang kaligdong sa Korte Suprema namantsahan na sa makadaghang higayon.  Nagpagamit ang mayoriya sa mga mahistrado sa diktadura ni anhing presidente Ferdinand Marcos.  Dihang gitudlo ni Arroyo silang Corona ug kaubanan, wa say kukaikog nga nagdupadupa sa binuang nga mga transaksiyon sa niaging pamunoan.
Unsaon man nato pagbadlong ang Korte Suprema nga klarong tua kapusta sa pikas nga di mameligrong sagpaon og contempt?  O kondenahon sa mga abogado nga nagpatuong mahigugmaon sa "rule of law" apan nagpakabuta sa mga eskandalo sa labawng hukmanan?  Kadasonan ba nato ang mga awhag sa inhibition ug impeachment nga di kapasanginlan nga kabahin sa maniobra sa Malakanyang paghuyang sa Korte Suprema?
Kutob na ba lang sa pagpangindahay nga unta di na pun-an sa labawng hukmanan ang nagtipun-og nang mga sayo sa paghukom sa dugang mga petisyon ni Arroyo sunod semana?  [30]  leo_lastimosa@abs-cbn.com

Arangkada of Leo Lastimosa for November 26, 2011

Kubit sa bakak

Tan-awa ra gud ning mga abogado ni kanhi presidente Gloria Arroyo.  Haskang liwata sa ilang kliyente.  Way tihiktihik ang pamakak.  Sa way pagtagad nga nisiwil nang uban nilang bakak.  Dihang nabisto na gyod ang ilang pamakak, gisapawan pa gyod og laing pamakak.  Nagtuo gyod tingali nga amaw tang tanan nga moyanguyango lang gihapon sa naglut-od na nilang pamakak.
Silay nangangkon nga luya si Arroyo, di ganahang mokaon, nisamot kahuyang, may bag-ong sakit sa iyang lower spine, nagmagul-anon, may kagaw sa iyang dakong tinai, may diarrhea, may anorexia, nagngulngol ang iyang liog, mga kamot ug tiil.  Sa laktod, himatyon.

-o0o-

Ang mga doktor ni Arroyo sa St. Luke's Medical Center di makayanuyano pagsukwahi sa mga pangangkon sa mga abogado.  Way nahimo pagbadlong ni Arroyo dihang nagsul-ob og halo vest, bisan neck brace na lang untay gikinahanglan, sa pag-adto sa NAIA ug pagpa-mugshot sa kapolisan.  Ug wa kabaraw sa bisan unsa na lang bag-ong sakit nga giyamyam sa mga abogado.
Maayo na lang nga gisupinahan sila sa Pasay City Regional Trial Court nga naghusay sa kasong electoral sabotage batok ni Arroyo.  Sa kataposan, may kahigayonan na gyod sila pagsulti sa tinuod.  Ang kadagkoan sa St. Luke's nipasalig nga di nila tagoan ang kahimtang sa panglawas ni Arroyo.

-o0o-

Nakamatngon nga hapit na mahukasi ang ilang bakak, ang mga abogado ni Arroyo niboluntaryo pagpahibawo sa korte nga himsog nang ilang pasyente ug mahimo nang pagawason sa ospital.  Gidalidali pagbakwi ang petisyon sa hospital arrest ug gipulihan dayon og awhag nga house arrest.
Haskang bagaang mga abogadoha.  Way bisan gamay na lang lama sa kaikog ang ilang bayhon.  Di kabahin sa nangalisbo nilang bokabularyo ang mga pung pagpangayo og pasaylo sa ilang pagpangilad sa publiko.  Sa kadugay na tingali nilang sikitsikit hingpit na silang natakdan sa kagaw ni Arroyo sa unli nga pagpanunto ug unli nga pagpapating.

-o0o-

Apan ang kubal sa dagway sa mga abogado wa ra sa kumingking sa ilang kliyente.  Nailad niya ang mayoriya sa Korte Suprema (kana kon wa sila makigsabot daan sa kampo ni Chief Justice Renato Corona) nga kinahanglang molarga dayon siya alang sa Singapore, Espanya ug ubang kanasuran nga dunay mas takos nga mga eksperto nga makatambal sa naayo na diay niyang sakit.

Nangahas pa gyod si Arroyo pagsakaysakay og wheelchair, sinul-ob ang buhok nga wa sudlaya ug mga hiraminta nga wa na diay kinahanglana, aron pag-ilad na sab sa makausa pa sa katawhan, nga gipakaingon niyang na-syut sa iyang bolsa sa siyam ka tuig niyang pamunoan.  Apan bisan sa kadaghan sa retiradong mga heneral ug ubang alimatok nga kuyog niya, wa siyang kalarga.
Ug ang labing pait nga kamatuoran ang nihasmag ni Arroyo:  Way bisan usa nga nialsa ni nagprotesta pagkubit sa iyang bakak.  [30]  leo_lastimosa@abs-cbn.com

Arangkada of Leo Lastimosa for November 25, 2011

Corona palagputon


Hangtod kanus-a si Presidente Noynoy Aquino nga makaagwanta sa Korte Suprema ni Chief Justice Renato Corona?  Samtang makapangangkon si Corona nga di tanang lakang sa pamunoang Aquino ang ilang gibabagan--sama sa ilang pagpatigbabaw sa legalidad sa pag-uswag sa piniliay sa Autonomous Region in Muslim Mindanao (ARMM)--basurahan ang gipadulngan sa tanang pagsuway pagsusi sa mga binuhatan sa pamunoan ni kanhi presidente Gloria Arroyo.
Ang pagsalikway nilang Corona ug kaubanan sa pagtukod sa Truth Commission nga pangulohan unta ni kanhi Chief Justice Hilario Davide Jr. maoy pagmatuod nga di sila mangiyugpos ni magtan-aw lang sa pagtuman ni Aquino sa iyang saad nga gukdon, taralong sa hukmanan ug silotan ang mga kawatan sa panudlanan sa katawhan.

-o0o-

Mahimo bang pangilisan ni Aquino ang mga sakop sa Korte Suprema nga klarong tua kapusta ni Arroyo sa way pagsakripisyo sa kaligdong sa tibuok institusyon?  Kuwestiyonable ang pagtudlo ni Arroyo kang Corona apan ang mayoriya sa mga mahistrado, nga pulos sab tinudlo ni Arroyo, nisinina og legalidad sa klarong midnight appointment.
May igong mayoriya si Aquino sa House of Representatives aron pag-impeach nilang Corona ug kaubanan.  Mahimo ganinang makakuha sab og igong boto sa Senado pagkonbikto ug pagpalagpot nila gikan sa katungdanan.  Apan unsaon niya pagbatok ang naandan nang pagtuo nga bisan unsay isulti o buhaton sa labawng hukmanan, bisan nangalisbo nang mayoriya sa mga sakop, maisip nang mga balaod nga kinahanglang tumanon.

-o0o-

Ang napakyas nga pagsuway nilang Corona ug kaubanan pagpa-ikyas ni Arroyo di maoy kataposan sa padaylang nilang maniobra pagpanalipod sa giisip nga tinuod nilang bosing.  Mahimo nilang isalikway ang panel sa Commission on Elections (Comelec) ug Department of Justice (DOJ) aron mabasura ang kasong electoral sabotage batok ni Arroyo.
Mahimo gani nilang ideklarar nga way hurisdiksiyon ang Pasay City Regional Trial Court sa kaso kay angay ning ipasaka sa Sandiganbayan nga, nakatag-an ka, utro sang gidominahan sa mga tinudlo ni Arroyo.  Di kang kasupak sa bisan unsang hukom sa Korte Suprema.  Gawas lang kon ang mga mahistrado mismo--sama sa ilang gihimo sa mga kaso sa PAL ug 16 ka bag-ong dakbayan--magbalibali sa ilang baruganan.

-o0o-

Unsay nahibiling kapilian ni Aquino?  Ang wa paabutang kalamposan pagtangtang ni kanhi Ombudsman Merceditas Gutierrez maayong giya:  Gipasakaan og impeachment complaint sa House, gipalig-on pag-ayong ebidensiya, gipasabot ang katawhan sa panginahanglan pagtangtang niya, hangtod nga si Gutierrez nay boluntaryong nibiya.
Mahimo sang pasakaan og impeachment complaints silang Corona ug kaubanan, palig-unon ang mga ebidensiya ug pasabton ang katawhan nganong kinahanglan silang palagputon.  Kon bisan sa kalig-on sa mga ebidensiya ug kasibaw sa sentimento sa kinabag-an batok nila, magpapating silang Corona ug kaubanan, kinahanglang andam ang pamunoang Aquino pagsubay ug paglahutay sa proseso sa hingpit nga pagpalingkawas sa institusyon sa Korte Suprema gikan sa nangalisbong mga gaway sa kawatang pamunoan.  [30]  leo_lastimosa@abs-cbn.com

Arangkada of Leo Lastimosa for November 24, 2011

Hukas sa publiko

Ang pagkisikisi sa mga turutot ni kanhi presidente Gloria Arroyo sa pagpanggawas sa iyang mugshots nga kinuha sa kapolisan nakapahinumdom nako niadtong higayon nga si Arroyo naminaw sa iyang PR consultants ug nagsige  og usab-usab sa iyang imahe.  Sa usa ka semana, nikalit og kalumo ang iyang panagway, nilulot ang iyang mga mata, niaghop ang iyang tingog ug nideklarar sa iyang kaugalingon nga inahan sa nasud.  Pagka sunod semana, nigahi ang iyang tingog, nitig-a ang iyang dagway, nipakita sa iyang kumo ug nipasidaan nga iyang pulbuson ang Abu Sayyaf ug terorismo.

Pagligid sa laing semana, si Arroyo ang nangunay pagpresentar sa mga dinakpan sa kapolisan.  Ang mga dinakpan gideklarar ni Arroyo atubangan sa mga kamera nga pagmatuod sa determinado niyang kampanya batok sa krimen.  Pipila sa dinakpan inosente sa mga krimen nga gipasangil batok nila.  Apan gihukasan sila atubangan sa tibuok nasud kay naatlan nga niadtong semanaha pagka crime buster ang gisugyot sa image makers ni Arroyo.

-o0o-

Maapiki unta si Arroyo kon ang iyang salida gihimo pa sa laing nasud diin gidili ang paghingan, labi na ang pagladlad atubangan sa media, sa mga suspitsado nga wa pa kapasakai og kaso.  Sa uban ganing mga nasud, kanganlan lang ang mga dinakpan kon mahuman na ang pasiunang imbetigasyon sa piskaliya ug mapasaka na ang kaso sa hukmanan.  Wa hinuon nang balaora dinhi sa ato.  

Sama nga wa say balaod dinhi sa ato nga nagdili sa pagpublikar sa mugshots.  Maong way naglangas dihang gi-piyestahan ang mugshots ni kanhi presidente Joseph Estrada niadtong 2001.  Nga klarong may pagtugot, ug posible ganing gidasig ug gipasiugdahan sa pamunoang Arroyo.  Ambot nganong nikalit lang og kalami ang kampo ni Arroyo pagpaburot sa right to privacy.  Lahi gyod tingali ang bation kon ikay hukasan sa publiko.

-o0o-

Daghan nang gipatuong mugshots ni Arroyo nga nanggawas sa wa pa ipublikar ang labing uwahi niyang mga hulagway.  Bisan niadtong siya pa ang nagtungkawo sa Malakanyang, giwarawara na sa mga nagprotesta sa kadalanan ang ilang mugshots ni Arroyo nga gimarkahan sa mga krimen nga gipasangil batok niya.
Ang labing uwahing mugshots ni Arroyo klaro nga mao ang gikuha sa kapolisan sa luho niyang presidential suite sa St. Luke's Medical Center niadtong Sabado sa hapon.  Gilalisan na lang tukma ba ang mga marka ubos sa mga hulagway.

-o0o-

Usa sa gipresentar ni Arroyo niadto nasaypan lang.  Siyay whistleblower sa anomaliya sa bangko sa gobyerno.  Inay tul-iron, gipaundayonan ang sayop.  Giapil na lang pagkiha ang kawani nga angay untang pasidunggan.  Usa sab sa naigo sa watch list order ni Arroyo niadto mao ang aktibista nga sama niya og sakit sa bukog.  Wa kagawas kay way katakos ni koneksiyon sa Korte Suprema.
Silang duha, labaw sa bisan unsang mugshots, posibleng maoy tinuod nga naghamok karon sa kinatulgan ni Arroyo.  [30]  leo_lastimosa@abs-cbn.com

Arangkada of Leo Lastimosa for November 22, 2011

        Morang doktor, M.D.


    Aron di ka maglibog sa tinuod nga kahimtang sa panglawas ni kanhi presidente Gloria Arroyo, palihug hunong na og paminaw sa "medical bulletins" nga giluwatan sa iyang mga abogado ug ubang mga alyado.  Kay sama nato kutob ra sila sa pangagpas ug pagbanabana.  Wa silay katakos sa pagsusi sa panglawas sa kinaham nilang pasyente.
    Ang labing kasaligang tinubdan sa kasayuran sa kahimsog ni Arroyo mao ang iyang mga doktor.  Nga gipangunayan niya pagpili ug hingpit nga gisaligan sa pag-atiman sa iyang panglawas.  Binayran silang Arroyo, di sa gobyerno, busa di kapasanginlan sa mga suod ni Arroyo nga tua kapusta sa pikas.

-o0o-

    Ug sukwahi sa paukyab nilang Atty. Ferdinand Topacio, Atty. Raul Lambino ug tigpamaba Elena Bautista-Horn nga luya si Arroyo, nga taas kaayo ang presyon sa iyang dugo, nga wa na siya mokaon, nga maglisod na siya pagbangon, nga nagsige siya og diarrhea, nga may infection siya sa tinai, nga gibombahan siya og antibiotics ug nga himatyon na siya, mas madasigon ang taho sa iyang mga doktor.
    Matod sa mga doktor sa St. Luke's Medical Center nga nagtinabangay pag-atiman ni Arroyo arang-arang na ang iyang panglawas.  Subli nilang gipasalig nga hingpit nang maayo ang pasyente sa mosunod nga unom ngadto sa walo ka buwan.  Gawas lang kon dunay motumaw nga grabeng komplikasyon.

-o0o-

    Si Dr. Juliet Gopez-Cervantes, ang pangu sa medical team ni Arroyo, nagdumili pagdason sa mga pangangkon nga nisamot kaluya, gikapoy pag-ayo ug hingpit nga nagmagul-anon si Arroyo human babagi sa iya untang paglarga sa Ninoy Aquino International Airport (NAIA) Terminal 1 niadtong Martes sa gabii.
    Ambot nataligam-an ba lang, o pagbuot gyod sa kahigayonan, ang nahaunang certification ni Cervantes sa kahimsog ni Arroyo nasukip sa petisyon nga gisang-at sa Korte Suprema.  Nakumbinser ang mayoriya nga gipangulohan ni chief Justice Renato Corona sa pagpalarga ni Arroyo.  Apan nalilian ni Associate Justice Maria Lourdes Sereno ang nagkasungi nga pangangkon ni Arroyo ug sulti sa iyang mga doktor.

-o0o-

Niang mas detalyadong kasayuran sa ubang mga doktor:

• Si Dr. Mario Ver, orthopedic surgeon ni Arroyo, nipasalig nga "remarkable" ang "improvement" sa iyang "neurologic status" ug wa na sakiti sa iyang liog, mga bukton, mga kamot, o pagbanhod sa ibabaw nga bahin sa iyang lawas;
• Si Dr. Bernie Laya, Radiology Institute Director sa St. Luke's, nipahibawo nga ang "implant device" wa maluag ni mabalhin sa liog ni Arroyo, gani dunay nay bag-ong bukog nga nitubo sa anterior column gikan sa C3 ngadto sa C7 sa iyang cervical spine; ug
• Kon gipakaingon nimo nga gisakitan si Arroyo paglihok sa iyang liog, angay kang mahibawo nga ang halo vest gipulihan na sa mas humok nga brace ug gitambagan si Arroyo sa pagsige og lihok sa iyang liog aron mas daling mamaayo.  [30]  leo_lastimosa@abs-cbn.com