Arangkada for June 15, 2007

        KUROG NI TRILLANES

 

        Usa sa nakahimong senador ni Antonio Trillanes IV mao ang kahiktin sa panglantaw ni Pres. Arroyo.   Hugot nilang gisupak ang mga petisyon ni Trillanes niadto nga makagawas gikan sa bilanggoan aron nga makakuyog sa iyang kaubanan sa Genuine Opposition (GO) pagpangampanya sa nagkalainlaing bahin sa nasud.   Nga lisod sabton tungod sa pagtugot nila nga makagawas silang kanhi senador Gringo Honasan ug kanhi MNLF Chairman Nur Misuari nga nag-atubang sab og susamang mga kaso.

        Gawas sa pagpagawas nila sa bilanggoan, ang nagbubalitok ug kadudahan nang baruganan nilang Honasan ug Misuari atol sa kampanya nakapalig-on sa pagduda nga gigamit sila sa administrasyon paglawgaw sa oposisyon sa piniliay niadtong Mayo 14.   Ang pagpabilin ni Trillanes sa bilanggoan nakapakumbinser sa kinabag-an sa mga botante nga mas matinud-anon siya kay sa duha ka gipaboran nga mga sinumbong.

-o0o-

        Nakatabang sab ni Trillanes ang pagpa-kyut-kyut sa iyang kaubanan sa GO sa dayong tapos sa campaign period.   Ang mga nag-una sa surveys sa SWS ug Pulse Asia nihunong na pag-atake ni Arroyo uban ang panghinaot nga mosamot pagburot ang ilang mga boto kon makuha ang pagpaluyo sa mga dumadapig sa administrasyon.   Apan si Trillanes hangtod sa kataposang gutlo sa iyang hinigpitan nga mga pamahayag gikan sa bilanggoan way lipud-lipod sa iyang panganti pagpalagpot ni Arroyo sa Malakanyang tungod sa lapad nga panikas ug pangurakot.

        Maong gikan sa iyang pagpangiwit sa unang mga adlaw sa kampanya, ug bisan sa kakabos sa iyang kampanya, nga giduma lang sa pipila niya ka mga kadugo ug mga higala nga way katakos sa paglibot sa tibuok nasud, si Trillanes inanay nga nikatkat paduol sa winning circle.   Maong ang iyang pag-okupar sa ikasiyam nga luna sa exit poll nga gihimo sa Pulse Asia alang sa ABS-CBN niadtong Mayo 14, samtang nakapakugang sa kadaghanan, gipaabot nang daan sa iyang kaubanan sa GO ug bisan sa mga tagduma sa Team Unity (TU).

-o0o-

        Iniglingkod ni Trillanes sa Senado sugod karong udtong tutok sa Hunyo 30, magsugod ang mas dakong labad sa ulo sa administrasyon.   Nga ilang kalikayan kon panaminan ang higante nilang kasaypanan sa niaging kampanya.  Kay kon padayunon pagtanggong si Trillanes, mamahimo siyang labing unang senador sa kasaysayan nga mag-alagad sa katawhan gikan sa bilanggoan:   Paggawason lang aron pagtambong sa mga sesyon sa Senado aron ibalik ra sab pagbalhog sa iyang selda diin, segun sa iyang abogado, di siyang kaligoy ug way laing mahimo gawas sa pagpanday sa iyang gisaad nga mga balaodnon pagsumpo sa pangurakot sa militar ug sa sibilyan nga kagamhanan.

        Apan kon di na babagan ang paglingkawas ni Trillanes, ug hatagan nag higayon nga gawasnong makatuman sa iyang mga gimbuhaton, may kahigayonan nga makita sa katawhan nga di siya sama kaligdong ni katakos sa didto pa sud sa bilanggoan.   [30]  leo_lastimosa@abs-cbn.com

Arangkada for June 14, 2007

        PAUGAT NI GLORIA

 

        Ang kapakyas sa Commission on Elections (Comelec) pagtiwas sa iskutenyo sa piniliay pagka senador usa na ka buwan human sa eleksiyon sa Mayo 14 nakapalig-on sa mga pagduda nga, sama sa naandan, napakyas na sab ang ahensiya pagpatigbabaw sa tinuorayng kabubut-on sa katawhan batok sa way kinutoban nga pagpanlubag ug pagpanikas sa mga nagtungkawo sa gahom.

        Abunda ang mga ebidensiya sa nangalisbong mga kahiwian sa piniliay:   Ang kapakyas pag-ilis ni Lintang Bedol ug ubang kadagkoan sa Comelec nga gilambigit sa Hello Garci scandal tulo ka tuig nang nilabay, ang pagpatay ug pagpanghasi sa mga nangisog pagbutyag sa lapad nga tikas ug ang sayon nga pagkahanaw sa nagkatuiris nga mga dokumento sa piniliay di na mahitabong tabonan sa mga pangangkon sa mga turutot sa Malakanyang nga napamatud-an sa piniliay ang kalig-on ug kaligdong sa atong sistema.

        Dakong balikas ang pangugat ni Pres. Arroyo nga ang mas lig-ong mayoriya sa oposisyon sa bag-ong Senado angayng makighiusa niya alang sa kalamboan sa nasud.   Siya maoy angayng moduko sa kabubut-on sa katawhan nga klaro nang nisalikway sa iyang liderato pinaagi sa pagbasura sa pahoy niyang mga kandidato.

-o0o-

Nakabuylo nang pangandam alang sa usa sa labing dako ug labing gikahinaman nga lumba sa dagan dinhi sa Sugbo, ang DYAB Kapamilya Run, nga ipahigayon karong Dominggo, Hunyo 17.   Gipaabot nga salmotan sa 1,000 ka runners, ang ikapitong hugna sa tinuig nga lumba magsugod ug matapos sa Sumilon Road sa Cebu Business Park ug molatas sa dagkong kadalanan sa Dakbayan sa Sugbo.   Usa ni sa highlights sa tibuok buwan nga pagsaulog sa ika-12 nga sumad sa pagkatukod sa DYAB Abante Bisaya.

        Dunay tulo ka kategoriya sa lumba nga maapilan:   10 kilometros (babaye, lalaki ug Executive Runners A ug B); 5 kilometros (babaye ug lalaki); ug 3 kilometros nga fun run.  Bugti sa P100 nga registration fee, ang runners makakuha na og singlets ug giveaways.

-o0o-

        Mahimong magpalista sa mosunod nga registration centers:   Ayala Turista Booth, Wow Travel & Tours sa E-Mall, ABS-CBN Broadcast Complex sa Jagobiao, Mandaue City ug Philippine Sports Commission sa Cebu City Sports Center.  Ang rehistrasyon pormal nga tapuson sa udtong tutok karong Sabado, Hunyo 16.   Ipanghatag ang singlets ug race packets sa tibuok hapon sa Sabado sa ABS-CBN Complex.

Gawas sa naandan nga cash prizes, trophies ug medals, duna say ipanghatag nga special awards alang sa biggest delegation, labing batan-ong runner, labing hamtong nga runner, tibuok pamilya nga managan, labing sayo nga naka-parehistro ug, kay Fathers Day man unyang Dominggo, amahan nga kinapaspasan nga modagan.

Si Cebu City Councilor Jack Jakosalem nipahibawo nga makadawat sab og mga medalya ni Pres. Arroyo ang unang duha ka finishers sa mga lalaki ug mga babaye sa 10K.   [30]  leo_lastimosa@abs-cbn.com

Arangkada for June 13, 2007

        DAOG APAN PILDE

 

        Ang alyansa nilang Gobernador Gwen Garcia sa Sugbo ug Barangay Kapitan Mary Ann delos Santos sa Lahug batok ni Cebu City Mayor Tomas Osmena tungod sa hulga pagkanselar sa proyekto pagtukod og bag-ong upat ka andana nga school building sa Lahug Elementary School nagmadaugon.   Ang pahibawo nga nagdugo ang ilang mga kasingkasing alang sa inosenteng mga tinun-an, kansang pagtungha gikahadlokang mahimong mas lisod kon mahinayon ang paghikaw sa dugang classrooms, nakadawat og lapad nga pagdayeg ug pagpaluyo sa nagkalainlaing hut-ong sa katilingban.

Ug tuod man, si Mayor Osmena, nga gikaintapan sa iyang katig-a, nikakak, nitalaw, niputi ang kiting, napugos pagbalitok sa iyang baruganan, nibakwi sa iyang deklarasyon sa gubat ug nisaad nga sugdan nang pagtukod sa school building sa mosunod nga mga adlaw.

-o0o-

        Apan ang kalit nga kausaban ni Mayor Osmena wa maggumikan sa kusi sa konsiyensiya.   Mas lisod tuohan nga gikunsaran ug gilamdagan siya sa Espiritu Santo.  Mahimong nagdugo og diyutay ang iyang kasingkasing alang sa mga bata (saligi si First Lady Margot Osmena sa pagsige og gahot niya).   Mahimo ganing nakaamgo na nga wa siyay dag-anan batok sa duha ka babaye nga nibarug alang sa linghod nga mga tinun-an.

        Ang gihimo sa mayor, samtang motumaw sa unang pagtan-aw nga timaan sa iyang tam-is nga pagtahan, maoy labing bangis nga bawos batok sa duha ka giisip niyang tigpaka-aron-ingnon.   Wa pa gani kahunahuna unsaon pagsaulog ang ilang kadaogan batok ni Osmena, silang Garcia ug delos Santos nakaamgo nga mora silang mga turista nga way laing kapaingnan human kalita sa pagbira ang ilang gitungtongan nga nagburut-burot ug gidudahan nga overpriced sab nga carpet sa CICC.

-o0o-

        May sukaranan ang pagkuwestiyon sa pagpakabana nilang Garcia ug delos alang sa mga bata:

·         Kinsay nakakita sa panginahanglan pagtukod sa school building aron nga di maghuot ang mga tinun-an?  Si Osmena ug mga opisyal sa dakbayan, di silang Garcia ug delos Santos; ug

·         Kinsay nigahin sa P15 milyones, nisubasta sa proyekto, ug nisud og kontrata pagtukod sa school building karong tuig tingtungha?   Si Osmena ug mga opisyal sa dakbayan, nga way bisan gamayng tampo nilang Garcia ug delos Santos.

-o0o-

        Inay mapahiyumon, ayaw kahibung kon silang Garcia ug delos Santos aslom og mga dagway nga morang nawad-an sa ilang kinaham nga duwaan.   Unsaon na man lang ron ni Garcia ang P5 milyones sa buhis sa mga Sugbuanon nga iyang giamot ug ang piso-piso nga natigom ni delos Santos?

        Hinaot nga si Garcia makamatngon nga mas nagkinahanglan og tabang ang mga eskuylahan sa lalawigan nga mas apiki kay sa Lahug.   Ug hinaot nga si delos Santos mahigmata nga ang kadaotan sa pagpanggukod ni Osmena way kalainan sa iyang pagbalibad sa pipila ka proyekto tungod lang kay gikan sa Cebu City Hall.   [30]  leo_lastimosa@abs-cbn.com

Arangkada for June 12, 2007

        KANG-A SA PANARBAHO

 

        Gilusad sa DYAB Abante Bisaya ang laing Kapamilya Relief Campaign, ning higayona alang sa 134 ka pamilya nga nagpuyo sa 70 ka naugdaw nga mga bay ang naigo sa dakong sunog sa Sitio Little Dalaguete, Barangay San Nicolas, Dakbayan sa Sugbo.   Si Barangay Kapitan Senon Bacus nipahibawo nga ang labing dinaliang hinabang sa mga biktima, nga ang kasagaran naggikan sa lungsod sa Dalaguete sa habagatang Sugbo, mao ang pagkaon, tubig, sinina, tambal ug mga gamit sa panimay.

        Sa makausa pa, mangahas na sab mi pagpanuktok sa inyong kasingkasing sa palihug paghatod sa mga hinabang nga bugas, sardines, noodles, used clothing ug ubang panginahanglan, apil nang mga gamit sa tulonghaan alang sa mga tinun-an nga wa kahipos sa ilang notebooks ug mga uniporme tungod sa kakalit sa kayo, sa ABS-CBN Regional Broadcast Complex sa Jagobiao, Mandaue City; o sa Barangay Hall sa Mabolo, Cebu City.

-o0o-

        Bisan sa pagbunok sa uwan sa Dakbayan sa Sugbo gahapon sa buntag, kaliboan ka mga aplikante ang nagpanon pag-apil Local ug Overseas Job Fair nga gipahigayon sa dakong wanang sa Bradford Church sa Osmena Blvd. sa bisperas sa ika-109 nga pagsaulog sa Adlaw sa Kaugalingnan.   Ang job fair nga gisalmotan sa 30 ka local employers ug langyawng placement agencies gipasiugdahan sa Southwestern University, Cebu City government, Department of Labor and Employment, DYAB Abante Bisaya ug ABS-CBN Cebu.

        Duna pay laing duha ka job fair nga umaabot karong buwana:

·         Ang Local Job Fair karong Hunyo 23 sa Abellana National School nga pasiugdahan sa Cebu Chamber of Commerce and Industry, Cebu City government, DYAB ug ABS-CBN Cebu; ug

·         Ang Local ug Overseas Job Fair karong Hunyo 30 nga idungan sa piyesta sa way kinutobang mga pangalagad (medical, dental ug legal mission, one-stop shop sa mga serbisyo sa nagkalainlaing ahensiya sa kagamhanan, livelihood skills training ug daghan pang uban) atol sa Halad sa Kapamilya sa DYAB Abante Bisaya sa Mabolo Elementary School.

-o0o-

        Nagpadayon ang paningkamot pagtapak sa nagkadakong kang-a tali sa mga kurso sa mga kolehiyo ug unibersidad ug aktuwal nga mga panginahanglan sa mga kompaniya sa Sugbo ug Central Visayas.   Subo nang daan nga daghang gradwado nga way trabaho.  Mas makapasubo, ug way lalis nga usa ni sa labing dakong anomaliya sa atong panahon, nga daghang bakanteng trabaho nga di kasudlan kay di tukma ang mga kurso nga ilang gihagoan ug gitukawan pagkuha.

        Si Fidel Magno sa Department of Manpower Development and Placement nihingusog sa job search ug employers forum aron magsayranay ang mga aplikante ug mga magpapatigayon sa ilang katakos ug panginahanglan.   Mas malungtarung sulbad ang pag-usab sa mga kurso aron nga di mausik ang salapi ug panahon sa mga tinun-an pagtapos sa mga kurso nga sa kapulihay di diay nila kapuslan.   [30]  leo_lastimosa@abs-cbn.com

Arangkada for June 11, 2007

       DAMGO SA KAUSABAN

 

       Kon kawani ka sa kagamhanan nga nakabantay sa pangabuso, panglaktod ug pangurakot sa imong kadagkoan, unsa may angay nimong buhaton?  Mangiyugpos lang ug molingiw sama sa naandan?  O magpakabana aron pagbaraw sa kahiwian?

        Kon magpakabana ka pinaagi sa pagbutyag sa pag-usik-usik ug pagbolsa sa buhis sa katawhan, apan inay pasidunggan sa imong pagbarug alang sa katarung ug kaligdong, gihasi, gigukod ug giapiki na hinuon, unsa may imong buhaton?  Mangiyugpos pagbalik ug sa makausa pa molingiw na sab, sama sa naandan?  O mangisog ug mosukol ug mosupak sa imong kadagkoan nga, sama sa naandan, wa managana paggamit sa ilang gahom batok nimo, sama sa ilang pagpahilom ug pagpatagam sa mga nag-una nimo?

-o0o-

        Ang pakigbisog batok sa kahiwian di sayon.  Kasagaran ikabangga nimo ang labing gamhanang mga sakop sa katilingban—ma-opisyal man sa kagamhanan o ma-dagko mang haligi sa katilingban—kay sa pagbarug batok sa pangabuso ug pagpahimus matumban man gyod nimo ang ilang dagkong kalyo.  Ug di hapuhap ray imong mapaabot gikan nila.

        Ila ang tanang kapilian paglisudlisod sa imong kinabuhi—mahimo ka nilang hayluon aron nga mohilom na lang, o hudlaton gyod kon magmagahi, o kulban sa kaldero kon mosukol gyod, o taralon sa hukmanan, o hatagan og kinutoban ang imong edad.  Tungod sa imong kaggamay, wa kay ikasarang pagbatok sa ilang panimawos.  Apan ang atong sistema sa hustisya maoy gitahasan aron makaangkon ka og makiangayong kahigayonan pagpanalipod sa imong kaugalingon, ug pagpatigbabaw sa katarung batok sa kadaotan.

-o0o-

        Ang nagkalainlaing mga institusyon nga gitahasan pagpatigbabaw sa kaangayan di sab hinuon hingpit nga gawasnon sa pagtuman sa ilang mga gimbuhaton.  Gamhanang mga politiko ug dagkong mga magpapatigayon maoy nagpahimutang sa mga polis, mga piskal, mga maghuhukom ug bisan sa mga tagduma sa independenteng mga ahensiya sama sa Ombudsman, Commission on Audit ug Civil Service Commission.

        Busa kon modangop ka ning maong mga institusyon, way garantiya nga kapanalipdan ang imong mga katungod ug nga mapatigbabaw ang makiangayon nimong kawsa.  Apan di ka pa hingpit nga mapukan.  Duna pay laing alas nga imong kapasilongan.

-o0o-

        Ang katawhan.  Sila ang labing gamhanan.  Gikan nila ang tanang gahom nga gipahimuslan sa labing dagkong mga opisyal sa kagamhanan.  Sila ang kataposang magbuot unsaon pagpatigbabaw ang labing dakong kaayuhan alang sa labing daghan.

        Apan ang kinabag-an sa katawhan mga kabos ug burong.  Samang gamhanang mga politiko ug dagkong mga magpapatigayon, nga maoy responsable sa pait nilang kahimtang, di motugot nga masakmit pagbalik ang gahom nga dugay na nilang gitahan.  Ang niaging piniliay, samtang dunay pipila ka tilimad-on sa kausaban, nimatuod sa makausa pa nanghawod lang gihapon ang mga kukhan.

        Ang maayong balita nga gitudlo sa atong kasaysayan:  Ang kinabag-an sa katawhan di hangtod sa hangtod nga mapig-otan.  [30]  leo_lastimosa@abs-cbn.com

Arangkada for June 10, 2007

SAYOP NGA KASAL

 

Tugoti nga sugdan nako ning sugilanon pinaagi sa
pagtataw nang daan nga di ko maayong kuhaon ni bisan kinsa--bisan sa
labing suod nakong mga higala ug mga kapamilya--pagluhod sa ilang mga
kasal.  Apan tuohi nga puno sa kauwaw kining akong pangumpisal.

Nahadlok kong nagbasol ang mga nasayop na pagkuha nako.  Kay kanunay
kong mauwahi sa mga kasal nga wa nako malimti.  Sa kasal sa akong
pag-umangkon, pinirmahay na lang sa marriage contract ang akong
naabtan.  Sa kasal sa lain nakong kadugo, labihang gum-osa sa akong
Barong Tagalog kay, nakatag-an mo, nataligam-an sa pagpalaba.

-o0o-

Sa labing uwahing kasal nga akong giludhan, andam na kong mobiya sa
bay alang sa simbahan 15 minutos sa di pang kasal.  Apan nakadawat kog
text gikan nilang Jenny Ricarte ug Agnes Sabaldan sa Association of
Concerned Texters (kay ang kaslunon, si Ronald Bustamante, sakop sa
ACT) nga nagsugod nang paso sa kasal.

Maayo na lang nga gidali kog hatod sa akong asawa sa simbahan sa Consolacion.  Naabtan nako ang mga lalaking nag-barong gawas sa simbahan.  Usa nila nitaod dayon nakog corsage.  Nakaginhawa kog luag nga, sa kataposan, wa na gyod ko
mauwahi.  Nakapanungog pa gud kog text nilang Jenny ug  Agnes nganong
nadugay og sugod ang kasal.

-o0o-

Human sa 30 minutos nakong hinuwat, niabot ang bride.
Nakugang ko kay di man siya si Rodina, ang pangasaw-unon ni Ronald.
Diha pa sab kong kabantay nga wa koy bisan usa nga kaila sa mga
tigpasiugda ug mga bisita sa kasal.

Nitawag kong Jenny ug Agnes apan wa nay nitubag.  Hangtod nga nakadawat kog text ni Agnes nga nangutana kon hain kong simbahana kay tua sila sa Fatima Parish sa Basak ug hapit na mahuman ang kasal uban ni Fr. Joy Danao!

Morang wa magtugkad ang akong mga tiil sa yuta nga nanamilit sa mga kaslunon sa Consolacion nga tua diay sa laing simbahan ang akong kasal.

-o0o-

Pag-abot nako sa Fatima Parish, nangaliya na sila og "Our Father."
Mas sayo kay sa pinirmahay sa marriage contract apan nagdukuduko na
ko, wa nang kaako pagtan-aw ni Fr. Joy.

Ang mga paryente sa mga kaslunon, nga napasidan-an na tingali sa akong kanunayng pagka-uwahi, mas nahibung nga duna na koy corsage.  Maayo na lang nga managsama og kolor apan ang ila gikuwintas ang ako gitusok.

-o0o-

Pagpadung na namo sa reception sa Cebu Royale Estate sa Consolacion, si Luz Bugtai, laing sakop sa ACT ang nitawag sa akong atensiyon nga posibleng
nakuwangan ang corsage sa kasal nga nasaypan nakog adto.

Sama sa naandan, mas makahuloganon ang sulti sa akong asawa: Tungod sa akong pakauwaw, mahimong motagam na gyong among mga higala ug kaparyentihan
pagdapit nako sa ilang mga kasal.  [30]  leo_lastimosa@abs-cbn.com

Arangkada for June 9, 2007

        SENTENSIYA SA V-HIRE

 

        Di tinuod nga gi-sentensiyahan nag kamatayon ang mga V-hire (vehicles for hire).  Igo lang silang gipasidan-an nga ang ilang operasyon kutob kutob na lang karong 2013.  Sa ato pa, unom ka tuig na lang ang ilang lugway sa pagpamasahero sa kadalanan.

        Gitataw hinuon sa Land Transportation Franchising and Regulatory Board (LTFRB) nga mahimo pang V-hire nga mo-operate lapas sa 2013.  Apan kinahanglan silang mokuha og laing prangkisa sa Garage-Terminal (GT) Express.  Kansang mga kundisyon sama rang nag-awhag sa mga hingtungdan sa pagpangita na lang daan og bag-ong panginabuhi.

                -o0o-

        Ang V-hire drivers ug operators nga nanambong sa Kapamilya Media Forum sa SM City Entertainment Plaza nitataw nga mas sayo nga mamatay ang ilang panginabuhi kon ilang tumanon ang mosunod nga mga lagda sa LTFRB labot sa ilang pagpamasahero:

·         Di silang kapaningil og plitehan sa matag usa sa mga pasahero kay pakyaw ang ilang bayad, ipasikad sa matag biyahe ug sa gilay-on;

·         Di sila makapakanaog, ug labaw nang di makapasakay og mga pasahero, sa bisan asang bahin sa ilang ruta gawas lang sa gitakda nilang terminal ug destinasyon.

                -o0o-

        Ubos sa GT Express, makahimo na sila pagpangolekta og plitehan gikan sa mga pasahero apan gitakda sab nga tag-P2 ra matag kilometro sa matag pasahero.  Sa ato pa, sa unang lima ka kilometro, makakolekta silag P10, labaw sa P6 nga minimum nga plite sa PUJs.  Apan lahi sa PUJs, di gihapon silang kapasakay ni kapakanaog og pasahero gawas sa ilang garahe ug terminal.

        Matod sa V-hire drivers ug operators maalkanse gihapon sila kay wa man silay pasahero sa pabalik nga biyahe gikan sa ilang destinasyon padung sa terminal.  Maong nihangyo sila sa LTFRB ug sa nangreklamo nga drivers ug operators sa taxis. buses ug PUJs nga hatagan na lag kagawasan ang mga pasahero pagpili sa labing tukma nga sakyanan nga makahatod nila sa nagkalainlaing destinasyon.

                -o0o-

        Si LTFRB 7 OIC Reynaldo Elnar nitataw nga mahimong mausab pang mga lagda kon makumbinser ang ilang kadagkoan sa mga argumento pabor sa V-hire.  Si Cebu City Councilor Jack Jakosalem, tsirman sa transportation committee sa Cebu City Council, nitataw nga angay sang paminawon ang sentimento sa mga pasahero nga nakaphimus sa serbisyo sa V-hire.

        Sa iyang bahin, si Richard Cabucos, presidente sa Metro Cebu Taxi Operators Association (MCTOA), nireklamo nga kon di mabadlong ang kalapasan sa V-hire padayon gyong makan-ang ang mga pasahero sa taxis.  Samtang ang presidente sa Cebu Provincial Bus Operators Association, Nick Villahermosa, masaligon nga di kasustinir ang V-hire sa pagsubay sa ilang mga ruta ug pag-ilog sa mga pasahero sa ilang buses.

        Si Minda Ocliasa, usa sa mga pasahero nga nakapahimus sa serbisyo sa V-hire, nanghinaot nga mahusay ang panagsungi nga di masakripisyo ang interes sa mga sumasakay.  [30]  leo_lastimosa@abs-cbn.com

Arangkada for June 8, 2007

        SENTRO SA LOTTO            

 

        Ang bugtong nahibaw-an sa Philippine Charity Sweepstakes Office (PCSO) mahitungod sa mananaog sa P126.8 milyones sa bola sa lotto karong semanaha mao nga napalit niya ang tiket gikan sa outlet sa F. Ramos St. sa Dakbayan sa Sugbo.  Pulos na lang mga istorya nga di matino ang ubang gisumpay nga kasayuran mahitungod sa labing bag-ong multi-milyonaryo sa Pilipinas—nga taga Guadalupe siya, nga 30 anyos pa, nga lalaki, nga inhinyero, ug nga silingan rang Cebu City Mayor Tomas Osmena.

        Kay wa may bisan gamayng kasayuran mahitungod sa mananaog nga nahimutang sa tiket, mahimo sab nga di siya Sugbuanon kay nakahapit lang sa Ramos (daghang nagpuyo sa boarding houses sa Ramos nga mga tinun-an o mga trabahante nga taga laing lalawigan), nga labaw nang di taga Guadalupe ni silingan sa mayor, nga 60 anyos na, nga babaye diay, ug nga di siya inhinyero.

-o0o-

        Si Roberto Pio Cinco, ang tagduma sa lotto operations sa Sugbo, nitug-an sa DYAB Abante Bisaya nga makobra ug maggasto na lang sa mananaog ang iyang dakong daog apan mahimong sila dinhi sa Sugbo di lang gihapong kaila niya.   Pipila sa higpit nga mga lagda sa seguridad aron pagtino nga luwas ang mga mananaog sa lotto gikan sa mga kriminal ug mga mapahimuslanon:

·         Patalikdon sila sa pagkuha sa hulagway sa ilang pagdawat sa dagko nilang premyo gikan ni PCSO Chairman Serge Valencia; ug

·         Ang tseke nga ilang madawat mahimong idiretso og deposito sa sanga sa Land Bank of the Philippines nga naa ra sab mahimutang sa sud sa samang building ug busa nay bisan gamayng risgo inig gawas nila.

Maong nitambag si Cinco sa mananaog karong

semanaha, ma-Sugbuanon man siya o dili, ug sa umaabot nga mga mananaog sa lotto nga di na sila kinahanglang magda pa og police escorts o bodyguards sa ilang pagkobra.   Kay madugangan lang hinuon ang ilang hataganan og balato.

-o0o-

        Si Cinco niluwat sa mosunod nga mga katin-awan nganong dako kaayong halin sa lotto dinhi sa Sugbo kon itandi sa ubang bahin sa nasud:

·         Ang Sugbo maoy sentro sa minilyon ka mga dumuduong—magpapatigayon, mamumuo, tinun-an o turista—gikan sa nagkalainlaing mga lalawigan sa Kabisay-an ug Mindanao;

·         Kay sentro man sa patigayon sa Kabisay-an ug Mindanao, mas daghang kuwarta ang magbinayloay dinhi sa Sugbo; ug

·         Ang mga Sugbuanon mahigugmaon sa pagpamasin sama sa derby, sweepstakes ug bisan na gani sa ilegal nga mga sugal sama sa tigbakay.

Si Engr. Nigel Paul Villarete, Development ug Planning

Officer sa Dakbayan sa Sugbo, dunay laing pangagpas:  Mas dako ang halin sa lotto dinhi kay nagpabiling luwas ang Sugbo gikan sa jueteng ug last two ug inanay na gyong napapas ang karaang kabuang sa masiao.   [30]  leo_lastimosa@abs-cbn.com

Arangkada for June 7, 2007

        WOW, KAUWAW

 

        Human nila pasanginli nga namakak, nagpataka ug nagsamuksamok lang sa iyang mga pasangil, ug human nila siya bugalbugali nga upaw ug buangbuang, ang kadagkoan sa Kapitolyo sa Sugbo nga gipangulohan ni Gobernador Gwen Garcia nikumpisal nga nagsulti diay sa tinuod si Crisologo Saavedra sa iyang pangangkon nga dunay dugang P261 milyones nga gasto sa pagtukod sa Cebu International Convention Center (CICC) nga gipaningil na sa WT Construction.   Apan inay manlipaghong sa kauwaw, si Garcia nipili sa pagpadayon sa pagbuong sa kadungganan ni Saavedra pinaagi sa pagpanghilabot sa iyang pribadong negosyo ug security escort.

        Mao ni tinuod nga dagway sa liderato sa Kapitolyo.   Bisan unsaon pag-retoke sa ilang gamhanang makinarya sa propaganda, nasihag ang ilang kapating ug ka-way kaikog sa Sugbuanong mga magbubuhis.  Nga human gipasaligan nga labihang baratoha sa CICC, karon gi-ulog-ulogan na sab nga wa pa diay mahuman ang kuwentada kay labihan man diayng dakoa sa istruktura nga ilang gitukod.

-o0o-

        Kon tuohan ang balitok karon ni Garcia nga di pa diay to mao ang P581 milyones nga iyang gipangugatan atubangan sa diriyot mapasmo niyang mga dinapit sa Capitol Social Hall niadtong Mayo 3 nga mao ray naggasto, nganong nangahas na man siya pagtandi sa CICC sa susamang buildings sa ubang bahin sa nasud?   Kalangay ba sa paniudto maoy nakalipat niya nga di makiangayon ang pagtandi sa wa pa mahumang kuwentada ngadto sa ubang nahuman nang mga transaksiyon?   O nisuway gyod siya paglipat sa mga Sugbuanon, suma sa pasangil ni Saavedra atubangan sa Visayas Ombudsman, ug nasakpan lang?

        Karong nabisto na nga dul-an gyod diay sa P1 bilyon ang naggasto sa CICC, asa man kuhaon ni Garcia ang kuwarta nga nilapas sa gahin sa Cebu Provincial Board?   Nagplano ba siya paghapak sa dugang gasto ngadto sa gisigehan niya og hisgot nga "reconfiguration" sa CICC?  Di ba mas lisod ipatin-aw nganong mamahimong kabahin sa "reconfiguration" ang electrical, plumbing ug ubang trabaho nga gikinahanglan sa di pa ablihi ug sugdi paggamit ang CICC niadtong Disyembre nga gi-detalye sa WT sa ilang paningil nga gilawalawaan sa Kapitolyo sukad pa niadtong Pebrero 21 ning tuiga?

-o0o-

        Gibahaan ang Arangkada sa DYAB Abante Bisaya og mga tawag gikan sa mga Sugbuanon nga nakasud sa CICC sa nangaging mga semana.   Nga mahimong madugangan pa karong nabisto na nga mahimong moabot gyod diay og P842 milyones ang gasto sa CICC.  Gawas kon kapamatud-an sa Kapitolyo ang WT, di si Garcia, maoy namakak.

        Matod sa mga nakalibot sa CICC ug nakakita sa nangliki nang bungbong, naguba nang mga pansayan ug namurot nang carpet, labihan kakasarangan sa ilang nakita nga nagmahay sila nga naghago pa sa pagsud inay pagpabilin na lang nga magpaantaw sa gawas.   Maong inay motuaw nga, "Wow!," nakaingon sila nga, "Kauwaw!"  [30]  leo_lastimosa@abs-cbn.com

Arangkada for June 6, 2007

        LABAW SA LOTTO

 

        Si Crisologo Saavedra, ang responsable sa pagkabisto sa giingong mga eskandalo sa mga proyekto sa niaging 12 ^th Asean Summit nga gipahigayon dinhi sa Sugbo, nangangkon nga labaw pa sa nakadaog sa lotto ang mga Sugbuanon tungod sa pagkahunong sa mga transaksiyon nga iyang gibisto ngadto sa publiko.   Tungod sa iyang mga expose, si Saavedra nipahibawo sa iyang pagtambong sa Arangkada sa DYAB Abante Bisaya nga nadaginot sa Sugbuanong mga magbubuhis ang mosunod:

·         P300 milyones ang nadaginot sa gahin alang sa decorative ug street lamps sa mga dakbayan sa Sugbo, Mandaue ug Lapulapu;

·         P20 milyones sa surveillance cameras nga hangtod karon wa dawata sa kapolisan; ug

·         P261 milyones nga dugang gahin sa Cebu International Convention Center (CICC) nga, niya pa, gitagoan ni Gobernador Gwen Garcia gikan sa mga Sugbuanon atol sa kuwentada-nga-way-dokumento nga iyang gipasiugdahan dayong eleksiyon.

-o0o-

        Ang P581 milyones sa atong buhis nga naluwas gikan sa gikahadlokang pangurakot tungod sa exposes ni Saavedra mas dako tinuod sa P126.8 milyones nga nadaog sa bulahan nga molupyo sa Guadalupe, Cebu City sa labing uwahing bola sa lotto sa Philippine Charity Sweepstakes Office (PCSO) karong semanaha.

        Kon wa mong kabantay, samang kantidad ang gideklarar ni Garcia nga iyang naggasto sa pagtukod sa CICC.   Ambot tinuyo ba o naatol lang, si Saavedra mas nadasig sa panagtakdo sa duha ka kantidad nga iyang giisip nga laing di malalis nga timailhan nga magmalampuson gyong iyang kawsa bisan sa kadagko sa mga kalyo nga iyang natamakan.

        Bisan kon siyay nakabisto sa giingong mga kahiwian ug nakaaghat sa Visayas Ombudsman pagbaraw sa mga transaksiyon, si Saavedra nahiagom gihapon sa mga pagpanggukod ug pagbugal-bugal, kasagaran gikan sa mga turutot sa Kapitolyo.   si Saavedra mapasalamaton hinuon nga ang kasarangang mga molupyo nga iyang masugatan sa kadalanan nitimbaya niya, nidasig sa iyang gihimo ug nipasalig nga nangaliya ang tibuok nilang pamilya alang sa iyang kaluwas ug kalamposan.

-o0o-

        Inay tarungon pagtubag ang mga pasangil ni Saavedra kon tinuod bang niabot og P842 milyones ang kinatibuk-ang gasto sa CICC ug nga iyang gitago gikan sa mga Sugbuanon ang P261 milyones nga giingong gipaningil sa WT Construction sa dugang gasto, si Garcia gipasanginlang naningkamot pagsimang sa atensiyon sa mga magbubuhis:

·         Gikiha, gipailisan ug gipasuspenso niya si Acting Deputy Ombudsman Virginia Palanca-Santiago gikan sa pag-imbestigar sa mga pasangil ni Saavedra;

·         Gihudlat niyang mga kawani nga gidudahang maoy nanghatag sa mga dokumento sa CICC ngadtong Saavedra nga ipanglabay gawas sa Kapitolyo; ug

·         Gihilabtan na niyang pribadong negosyo ni Saavedra, apil nang guwardiya nga gidestino sa kapolisan human nakadawat og mga hulga sa iyang kinabuhi, gawas nga gipasidan-an sang pasakaan og kasong libelo uban ang mas dakong danyos sa layong hukmanan sa, nakatag-an mo, Barili.   [30]  leo_lastimosa@abs-cbn.com

Arangkada for June 5, 2007

        SAYOP SILANG DUHA

 

        Nasayop si Barangay Kapitan Mary Ann de los Santos sa Lahug, Cebu City sa iyang pasangil nga way proyekto nga gipasiugdahan si Mayor Tomas Osmena sa iyang barangay.   Ang iyang lusot nga mahimong wa lang siya mahibawo sa mga proyekto sa mayor kay wa moagi sa iyang buhatan mahimong makaiban apan di hingpit nga makapapas sa iyang responsibilidad sa pagpakatap sa sayop nga kasayuran.

        Apan di matulisok si de los Santos nga nibuko-buko sa mayor sa niaging eleksiyon pinaagi sa tago nga pagpakatap ngadto sa mga molupyo sa Lahug og mga suwat nga nagsubli sa pasangil.   Bukas nga giluwatan ni de los Santos ang pasangil, ug ambot nganong kalit lang nakalimot ang mayor nga kusganon na niyang gipanghimakak ang maong pasangil, bisan sa wa pa magsugod ang kampanya.

-o0o-

        Ang sayop nga pangangkon ni de los Santos, ug uban niyang mga panaway sa liderato ni Osmena ug sa BO-PK, gisalikway na sa mga Sugbuanon niadtong Mayo 14.   Pinaagi sa paghatag nila ni Osmena og makabungog nga mayoriya ug lab-as nga tulo ka tuig nga termino hangtod sa 2010.  Ambot nganong gibuling-bulingan ni Osmena ang iyang kadaogan ning wa kinahanglana nga pagpanggukod.

        Nasuko ba siya nga, sa makausa pa, napilde na sab sa Lahug?   Nauwaw ba nga wa matinuod ang gipasalig nga labing menos 100,000 ka botos nga mayoriya batok ni de los Santos?  Nahimangod ba nga igo lang niangkon si de los Santos og kapildehan apan maisugon gihapong nagdumili pag-amen niya?

        Bisan unsa pay hinungdan sa labing uwahi niyang pag-ulbo, way katungod si Osmena pagsilot ug paghulga sa kaugmaon sa kabataan sa Lahug.

-o0o-

        Malampuson ang Kapamilya Tree Planting sa bukiran sa Jaclupan, Talisay City niadtong Sabado.   Salamat sa mga sakyanan nga gipaggamit ni Talisay City Mayor Soc Fernandez, kapin sa 300 ka mga tigpaminaw sa DYAB Abante Bisaya ang nag-abot ug nagtinabangay pagtanom sa 3,000 ka lawngon sa nangka, chicos ug sambag nga giandam sa MCWD alang sa kabahin sa 65 ektaryas nilang luna nga maoy gisaligang tinubdan sa tubig sa Metro Cebu gikan sa habagatan.

        Ang tree planting nibukas sa tibuok buwan nga kalihokan sa ika-12 nga sumad sa pagkatukod sa DYAB nga maoy pagsaulog sa kamanggihatagon, pagpasidungog sa pag-inunongay ug pagpalambo sa pagtinabangay sa mga Sugbuanon.

-o0o-

Mosunod nga mga kalihokan:

·         Hunyo 9:  Kumbira sa Kapamilya sa TV Barn sa ABS-CBN Complex sa Jagobiao, Mandaue City;

·         Hunyo 17:  Kapamilya Run Year 7 nga manukad ug matapos sa Sumilon Road sa Cebu Business Park;

·         Hunyo 23:  Local Job Fair sa Cebu Chamber of Commerce and Industry (CCCI) ug Cebu City government; ug

·         Hunyo 30:  Halad sa Kapamilya, ang piyesta sa mga pangalagad sa mga ahensiya sa kagamhanan ug pribadong sektor.   [30]  leo_lastimosa@abs-cbn.com

Arangkada for June 4, 2007

       SAYOP NGA SULBAD

 

       Tungod sa makauuwawng kapakyas sa kagamhanan paghatag og kinutoban sa nagkataas nga listahan sa mga suliran sa public schools, bisan pila na ka pamunoan ang nagbanus-banos pagduma sa nasud, nagkadaghan ang nisagop sa niadto-binuang-kaayong-paminawon-apan-karon-mora-nang-katuohan nga pagduda:  Nga ang labing dagkong mga opisyal sa kagamhanan, bisan unsay ilang politikanhong bulok, kabahin sa lapad nga konsabo pagnudnod sa kalidad sa edukasyon ngadto sa iyang labing masulub-ong ang-ang.  Ang katuyoan?  Aron nga ang kinabag-an sa katawhan magpabilin nga burong ug kabos ug mag-agwanta nga nag-ilaid lang gihapon sa tumang katimawa.  Bisan sa kapid-an na ka katuigan nga mga pasalig paghaw-as nila.

        O ang mas yanong katin-awan:  Ang pagpakabana sa mga namunoan paghatag og mas sanag nga kaugmaon pinaagi sa pagtarung sa edukasyon sa kabataan kanunayng malupig sa mas dinalian ug madanihong panginahanglan pagbusog una sa hakog nilang mga panudlanan.

-o0o-

        Sa pagbukas sa klase karong semanaha, masugamak ang kabataan sa naandang litaniya sa mga suliran sa public schools—kakuwang sa classrooms, kakuwang sa mga magtutudlo ug kakuwang sa mga libro.  Inay manlipaghong sa kauwaw pag-atiman ning labing batakang mga panginahanglan, ang atong mga politiko igo lang mo-ulug-ulog (ang bag-ong hubad:  namakak) nga ang edukasyon maoy ilang gihatagan sa labing dakong gahin sa nasudnong budget, mas dako pa kay sa Armadong Kusog ug sa DPWH.

        Gibalikbalik nila ning gikapoy ug nangurayot nang pangulipas bisan dugay rang nabisto ang ilang baraha.  Ang gahin sa edukasyon sa Pilipinas labihan kaubos kon itandi sa ubang mga nasud dinhi sa Asya.  Nga usa sa posibleng mga katin-awan nganong gikan sa pagka ikaduhang labing adunahang nasud sunod sa Japan upat na ka dekada ang nilabay nabiyaan na ta karon ug igo na lang sa paghanggab sa abog sa kalamboan sa atong silingang mga nasud.

        Nakapait kay, tungod tingali sa kakuwang nato og edukasyon, padayon lang gihapon ta nga nagpailad nila.

-o0o-

        Maong inay moawhag sa kagamhanan pagpangita og mas matinud-anon ug mas malungtaron nga sulbad sa mga suliran sa edukasyon, nalipat lang gihapon ta, ug usahay mopakpak pa gani, sa mga programa nga igo lang niwaling sa responsibilidad sa nagpabaya nga mga politiko ngadto sa mga ginikanan ug sa pribadong sektor:

·         Gibuktot ang nagkalisudlisod nang daan nga mga ginikanan sa way kinutobang mga amotan nga gipahamtang sa utro-sang-nalipat-o-sipsip-lang-gyod nga kadagkoan sa Parents-Teachers-Community Association (PTCA);

·         Gidasig ang mga ginikanan pagsakripisyo paglukdo sa mga lingkoranan o paghatag og pintal, bentilador ug kurtina aron mas mapahimutang ang ilang kabataan—ug palihug hatag gyod aron di managanang magtutudlo pagpadagko sa ilang grado; ug

·         Gipasidunggan ang dagkong mga kompaniya nga nisagop og mga eskuylahan, inay tarungon pagkolekta ang ilang buluhisan aron ikapuno sa gahin sa edukasyon, wa nay eskuylahan nga magpasagop ug, labaw sa tanan, di na sila kinahanglang magpaka-aron-ingnon.  [30]  leo_lastimosa@abs-cbn.com

Arangkada for June 3, 2007

       DOWNLOAD SA BEATLES

 

       Gipaabot nga mosulbong pagbalik ang Beatles kon ma-digitize nang ilang mga awit karong tuiga ug mabatian na sa mga batan-on (ang "download generation) ang adunahang 44 ka tuig nilang kabilin.  Kini human nakumbinser sa EMI Group silang Paul McCartney, Ringo Starr ug mga tagtungod nilang John Lennon ug George Harrison paglibkas sa ilang pagsupak nga mabutang ang ilang musika sa Internet.

        Gitiman-an sab sa bag-ong mga banda niadtong Biyernes ang 40 ka tuig nga sumad sa makasaysayanong album, Sgt. Pepper's Lonely Hearts Club Band, pinaagi sa pag-record sa bag-ong mga bersiyon sa bantogang mga awit.  Naabtan ang Beatles og 129 ka adlaw paghimo sa Sgt. Pepper's; taas kaayo kon itandi sa ilang labing una, "Please, Please Me," nga nahuman sud lang sa 585 ka gutlo.

-o0o-

        Salamat sa among kamaguwangang si Buoy nga maoy nipaila-ila nilang John, Paul, George ug Ringo nako, pinaagi sa pagpatokar sa ilang mga awit nga maoy namat-an matag buntag sa gamay pa kong bata, nasentensiyahan ko sa tibuok kinabuhi nga paghigugma sa ilang gatosan ka mga awit.  Bisan ang ilang mga gihimo human nabungkag ang Beatles niadtong 1970.

        Maayo na lang nga wa diay ko mag-inusara.  Mga eksperto sa musika nangagpas nga ang pag-uyon sa Beatles sa pagbaligya sa ilang mga awit pinaagi sa web maoy usa sa labing dakong transaksiyon sa atong panahon—kay bantogan ang ilang musika, bisan pilay pangedaron sa makabati nila:  Grade One nga wa pay buot nga taga Maramag, Bukidnon; o ubanon nang 42 anyos nga sa bisan unsa niyang audio players nga mahuptan duna gyoy "Yesterday" ug "Obladi-Oblada."

-o0o-

        Sa iyang kataposang interview sa Playboy Magazine dayon niyang kamatay, si John nihatag sa iyang panahom sa pipila ka mga awit nga ilang nahimo.  Tuguting akong pakisaw-an ninyo ang iyang mga gipanulti:

·         Love Me Do:  Gisuwat ning Paul sa teenager pa siya, sa wa pa matukod ang Beatles;

·         In My Life:  Maoy labing unang kanta mahitungod sa iyang kinabuhi, sama sa nisunod nga "Strawberry Fields" nga maoy pinuy-anan sa ilang silingan nga Salvation Army;

·         Penny Lane:  Sinuwat ni Paul mahitungod sa iyang kinabuhi, bisan kon si John ang tinuod nga nagpuyo sa dang Penny Lane;

-o0o-

·         Do You Want To Know A Secret:  Dinasig sa karaang awit sa iyang inahan nga iyang gipakanta ni George kay sayon ra ang tuno;

·         P.S. I Love You:  Gisuwat ni Paul samtang didto sila sa Hamburg, Germany;

·         Please Please Me:  Iyang gisuwat samtang naminaw sa "Only The Lonely" ni Roy Orbison;

·         From Me To You:  Gisuwat nilang Paul sud sa sakyanan human nila nahimo ang "She Loves You;"

·         And I Love Her:  Unang "Yesterday" ni Paul;

·         No Reply:  Iyang unang awit nga may resolusyon.  [30]  leo_lastimosa@abs-cbn.com

Arangkada for June 2, 2007

        GUBAT SA KAPITOLYO

 

        Kon nakaduaw ka sa Kapitolyo karong bag-o, nahadlok kong nakabantay ka sa kahigpit sa seguridad nga gihabol sa tibuok palibot.   Mag-agi og duha ka lut-od sa mga guwardiya sa di pa makasud ang imong sakyanan ug kinahanglan kang mopakita sa imong ID ug magkuwintas og pases sa di pang kasud sa mga buhatan.   Sa sud, gisundan ang imong matag lakang sa surveillance cameras ug sa alertong mga guwardiya.

        Ang Kapitolyo sa panahon ni Noy Pabling Garcia ug sa ubang nangaging mga gobernador labihan katahom ug kabukas.   Ang nagbuntaog nga ulohan nihangop sa tanang nanuaw—bata ug tiguwang, kabos ug adunahan, adlaw ug gabii—uban ang pasalig ug pahinumdom nga ang tinuod nga gahom sa kagamhanan nagikan sa katawhan.   Karon ang Kapitolyo nabulit na sa mga koral ug armadong mga guwardiya.  Batok sa iyang kaugalingong katawhan.

-o0o-

        Malampuson gyod tingali kaayong bag-ong sistema sa seguridad kay ubos ra man sa pagduma ni Gobernador Gwen Garcia ug sa iyang security consultant ug manghod nga si Byron Garcia nga nahitabo ang mosunod:

·         Naugdaw ang pipila ka building apil ang mahinungdanong mga dokumento ug kabtangan sud sa Capitol compund;

·         Napatay ang usa ka kanhi mayor pila lang ka metro gikan sa ganghaan sa buhatan sa gobernador;

·         Di nang kaprotesta sa tugkaran ang militanteng mga pundok ug ubang mga kaatbang sa mga Garcia kay gikonbikto na silang daan sa mga Garcia nga mga komunista ug mga terorista; ug

·         Nabuak ang bintana sa Kapitolyo kay gibato sa mga dumadapig usa ka kandidato pagka kongresista nga, kay nagpatuo mang supak sa komunismo ug terorismo, gipatuyangan sa ilang gibati sa nataran sa Kapitolyo.

-o0o-

        Wa pa matagbaw sa paghimo sa Kapitolyo nga morang kampo sa mga armado nga andam sa bisan unsang gubat sa bisan unsang oras, ang pamunoang Garcia nipahugot sab sa ilang seguridad gikan sa ilang kaugalingong mga kawani.

Human pakauwawi nga mga tapolan ug mga mabudhion, pipila ka mga kawani nangreklamo nga gipanglungkab ang ilang mga hunos ug gikatag ang ilang mga dokumento sa sawog tungod lang sa pagduda nga silay nanghatag og makadaot nga mga kasayuran ngadto sa mga sakop sa media.

-o0o-

        Ang labing uwahing lakang ni Garcia mao ang pagdili sa mga kawani pagpaminaw sa radyo.   Gimandoan niyang tanang department heads pagtino nga magmingaw ang tanang buhatan sa Kapitolyo gikan sa mga kanta ug mga komentaryo sa radyo.

        Gisilotan ba niyang KBP Cebu Chapter sa pagpangahas pag-awhag niya pagbalhin sa venue sa usa sa mga kasong iyang gipasaka?   O nagtuo nga ang pagpig-ot makapugong sa mga kawani pagsumbong sa media sa mga transaksiyon nga iyang gisudlan?

        Kon basehan ang gidaghanon sa mga kopya sa labing uwahing memorandum nga nagbaha sa among sibyaanan, napakyas si Garcia sa iyang panghudlat.   [30]  leo_lastimosa@abs-cbn.com

Arangkada for June 1, 2007

        KALIMOT DIIN GIKAN

 

        Ang mga batan-on nga nasaag pagbasa ning maong lindog wa na tingaling kaabot, ug kon nakaabot man wa pa tingali kahimungawong ug busa maglisod na paghinumdom, niadtong talagsaong higayon dul-an sa duha ka dekada nang nilabay nga ang tingog ni Gobernador Gwen Garcia mao ray bugtong sumpay tali sa mga biktima sa makalilisang nga pagbaha sa Ormoc ug sa mga Sugbuanon nga nagkahiusa pagtabang nila.

        Ang tam-is ug tagming nga tingog sa mas batan-ong Garcia nakahikap sa malumong kasingkasing sa mga Sugbuanon nga nakahatod dayon sa mga hinabang—mga pagkaon, tambal, sinina, sin, tabla, lansang ug balde—nga maoy labing unang nadawat sa nagbangotan nga mga tagtungod sa kaliboan nga nangamatay.

-o0o-

        Gimingaw ko sa maong tingog.  Kay napulihan na sa singgaak nga puno sa kayugot sa mga opisyal ug mga kawani sa Kapitolyo nga wa katagbaw sa iyang gusto, kasaba nga di makaon og iro sa mga nangahas pagsukwahi sa iyang baruganan ug kantalita nga hupong sa pagpakauwaw ug pagbugalbugal sa iyang giisip nga higpit nga mga kaatbang.

        Daghan nang dagkong kausaban nga nahitabo sukad sa masulub-ong adlaw sa Nobyembre 5, 1991 kanus-a nakamatuod silang Garcia ug ang mga Sugbuanon sa ilang kabayanihon.   Nabungkag nang unang pamilya ni Garcia sa Ormoc ug siya na karoy inahan sa mas dakong pamilya sa 47 ka mga lungsod ug lima ka mga dakbayan sa Sugbo.

Apan lisod gihapon kaayong tuohan nga si Garcia, gikang nagpakitabang alang sa makaluluoy niyang mga katagilungsod hangtod sa pagkahimong labing gamhanang lider sa lalawigan, hingpit nang nakalimot sa iyang gigikanan:

-o0o-

·         Si kanhi gobernador Lito Osmena nga maoy usa sa labing unang nakataak sa naggusbat nga Ormoc, kansang talagsaong liderato nakapalihok dayon sa nagkalainlaing mga hut-ong sa Sugbo pagsagakay sa naalaot nilang kasilinganan, giisip na karon ni Garcia nga nuog, kansang mga sugyot ug panghunahuna di na niya kapuslan, bahala na kon maoy nakatumpi sa P2 bilyones nga panudlanan nga maoy iyang gigasto pagtukod sa CICC ug ubang mga proyekto nga way klarong kuwentada;

·         Si Cebu City Mayor Tomas Osmena, nga maoy nagduma di lang sa mga hinabang kon dili apil na sa pagpahiuli sa suplay sa tubig ug kuryente ug pagpatunhay sa kalinaw sa unang mga adlaw nga nahugno pa sa kakugang ang lokal nga kagamhanan, karon iya na lang yanuyanuhon paghudlat og mga kaso gawas nga gipanak-opan ang kadalanan nga gipanag-iya sa lalawigan;

-o0o-

·         Ang mga doktor sa Sugbo nga nipahigayon sa usa sa labing lapad nga medical mission sa kasaysayan aron pagluwas sa mga himatyon ug pagtambal sa mga masakiton sa Ormoc karon iya nang gipalayas gikan sa luna nga gitugyan na unta sa Kapitolyo ngadto nila; ug labaw sa tanan

·         Ang mga Sugbuanon nga way pupanaganang nitubag sa iyang pangilaba karon di na gani pasidunggan sa labing batakan niyang katungdanan paghatag og kuwentada diin padung ang ilang kuwarta.

Arangkada for May 31, 2007

        ANGKON SA KAPILDEHAN

 

        Ang pag-angkon ni Senatorial Candidate Mike Defensor sa iyang kapildehan bisan kon wa pa mahuman ang nag-aginod nga opisyal nga iskutenyo sa Comelec gipanghinaot nga makapahubas sa tensiyon tungod sa makiangayong pagduda sa oposisyon nga nahilambigit karon ang administrasyong Arroyo sa pagmaniobra sa nauwahi nga certificates of canvass (CoCs) sa pipila ka lalawigan sa Mindanao aron pagpaburot sa mga boto ug pagpadaog nilang Defensor ug kaubanang mga kandidato sa Team Unity.

        Si Defensor nga nalansang sa ika-15 nga luna niangkon nga di na siyang kasud sa "Magic 12" karong 15% na lang sa CoCs ang wa pa maihap.   Gikahadlokan hinuon nga ang pagtahan nang Defensor di makaiban sa nag-aliwaros nga tinguha sa iyang kaubanan sa TU (silang Migs Zubiri, Ralph Recto ug Prospero Pichay) pagpalagpot nilang Aquilino Pimentel III, Antonio Trillanes IV Ug Gregorio Honasan.

-o0o-

        Daghang nahibung sa pagpangiwit ni Defensor kay siya man untay giisip nga labing humot sa mga opisyal nga nag-alirong ni Pres. Arroyo sa wa pang eleksiyon.   Apan batid nga politikanhong mga tigpaniid nagkauyon nga ang talagsaong kasuod ni Defensor kang Arroyo maoy nakalansang sa lungon sa iyang kandidatura.   Kay ang bisan unsang pagduda sa kasuko sa kinabag-an sa katawhan batok sa presidente napapas na sa pagdominar sa Genuine Opposition (GO) sa mga dumadaog pagka senador, bisan pa sa kuwartang gipabaha sa administrasyon ug bisan sa kaapiki sa panalapi ug pagkatibuwaag sa kampanya sa GO.

        Ang pangangkon sa administrasyon sa paglambo sa nasudnong ekonomiya tungod sa expanded value added tax (EVAT) hingpit sang gisalikway sa mga botante.   Ang di malalis nga kamatuoran ini mao ang makapakugang nga pagtibugsok sa kandidatura ni Senador Recto.  Kay bisan sa independente niyang panghunahuna ug sa kahumot sa iyang asawang si Vilma, napahinumdoman ang katawhan sa niaging kampanya nga siyay usa sa mga nangamahan sa EVAT nga maoy nakapasamot sa ilang katimawa.

-o0o-

        Human sa iyang pag-angkon og kapildehan, si Defensor makapa-cute na pag-ingon nga mag-drayber na lang siya alang sa iyang asawa ug mga anak kay nahibawo siyang makakuha siya og abundang pogi points, pamuhun-puhon sa umaabot pa niyang politikanhong mga ambisyon.   Apan wa magnihit ang Sugbo sa mga piliunon nga angayng pasidunggan tungod sa sayo nga pagduko sa kabubut-on sa katawhan.  Duha lang nila:

·         Si Jonkie Ouano, bisan sa kahigpit ug kainit sa niaging kampanya, gawas nga niangkon dayon sa iyang kapildehan nitanyag pa gyod sa iyang tabang ngadto sa bag-ong Mayor-elect sa Mandaue City nga si Jonas Cortes; ug

·         Si Mary Ann De Los Santos nga, gawas nga nakakuha og igong boto bisan sa kaahat sa iyang kandidatura, nitahud sa paghatag sa mga Sugbuanon ni Cebu City Mayor Tomas Osmena og lab-as nga termino.   [30]  leo_lastimosa@abs-cbn.com