Arangkada of Leo Lastimosa for July 9, 2010

                        Buslot sa MVIS

 

            Labing uwahing ebidensiya nga ang Motor Vehicle Inspection Section (MVIS) wa magsilbi sa pagtino sa kaluwas sa mga sakyanan nga nagdagan sa kadalanan kon dili nahimo na hinuong kahimanan sa panguwarta sa kadagkoan sa Land Transportation Office (LTO):  Duha ka buses sa V & JA, ang tag-iya sa bus nga naaksidente sa Toledo City niadtong Sabado, nasakpan nga way hand brakes.

            Nganong narehistro man ang duha ka buses nga wa man diay hand brakes?  Di ba nga sa di pa marehistro o malab-as ang rehistrasyon sa mga sakyanan kinahanglan man nga moagi ug makapasar sa MVIS?  Nataligam-an ba lang sa MVIS ang pagka way hand brakes?

                        -o0o-

            O tinuod ang pasangil nga kon bundakan og kuwarta ang taga MVIS mahimong di na kinahanglan nga ipakita sa mga tag-iya ang ilang mga sakyanan?  Ang bugtong lusot sa mga tagduma sa MVIS ug sa kadagkoan sa LTO mao ang pagpasangil nga gitangtang sa operator sa V & JA ang hand brakes human nasusi ang duha nila ka buses.

            Mao nga kon duna pay bisan gamay na lang nga lama sa kauwaw nga nahibilin ang taga MVIS ug LTO, angay nilang ilubong ang ilang mga dagway sa yuta.  Among isugyot nga adto ni nila himuon sa kanunayng gibahaan nga nataran sa LTO sa Mandaue.  Gawas nga humok nang daan ang yuta, nangalisbo nang daan ang palibot.

                        -o0o-

            Akong gipangutana si Regional Director Benjamin Go sa Land Transportation Franchising and Regulatory Board (LTFRB) nganong inay silotan ang operators sa buses nga nangahagbong sa MVIS hatagan man hinuon og higayon nga maka "take 2" o maka "take 3" pa gani.  Iyang tubag?  Dunay pipila ka bahin sa pakisusi sa MVIS nga mahimo rang usab-usabon nga di maapektahan ang kaluwas sa mga sakyanan.

            Unang susihon sa MVIS mao ang mga suga ug brakes.  Dayon ang suspension system ug wheel alignment nga susihon sa computer.  Dayon ang pagsusi sa headlight alignment.  Karong nasakpang way hand brakes, nganong gitugotan mang operator nga makataod og brakes inay silotan na unta?

                        -o0o-

            Pait nga kamatuoran mao nga way take 2 sa tinuod nga kinabuhi.  Kon moambak nang bus sa pangpang, di makasawo ang MVIS ug hatagan og laing higayon ang operator ug drayber pagkurihir sa depekto sa sakyanan.

            Laing buslot sa MVIS mao nga magpaabot lang kanus-a ganahan magpasusi sa mga sakyanan ang operators.  Nga dunay tanang kahigayonan pagtabon sa ilang kalapasan.  Sama sa drug test sa mga motorista.  Ang mga ungo sa drugas mahimong di lang una mohithit sud sa pila ka adlaw sa dayong pa-renew sa ilang lisensiya.  Mas sayon ug mas laktod pa gyod kon kaila nila ang way paglubad ni kamatayon nga fixers sa LTO.  [30]  leo_lastimosa@abs-cbn.com

Arangkada of Leo Lastimosa for July 8, 2010

                        Erap batok Davide

 

            Kon paminawon si kanhi presidente Joseph Estrada, si kanhi chief justice Hilario Davide Jr. oportunistang dako ug di takos nga mogukod sa mga nautangan niya og kabubut-on.  Gidasonan ni Estrada ang dugay nang huhungihong nga si Lucio Tan ang nikumbinser niya pagtudlo ni Davide isip chief justice sa Korte Suprema niadtong 1998.  Ug nipasidaan siya nga di kasaligan si Davide sa pagpangu sa Truth Commission pag-imbestigar sa mga eskandalo ni kanhi presidente Gloria Arroyo.

            Mahimong molampos si Estrada sa pagsablig og lapok sa nabantog nga kaligdong ni Davide.  Apan mas nilampos siya pagmatuod sa pagduda nga ang labing mahinungdanong mga hukom sa iyang pamunoan gidiktahan sa suod niyang mga higala, di sa interes sa nasud ug sa katawhan.

                        -o0o-

            Nikumpisal si Estrada nga naumol ang desisyon pagtudlo ni Davide sa labing taas nga katungdanan sa labawng hukmanan sa penthouse sa hotel ni Tan, diin gipatawag siya ni Tan ug diin nagpaabot nang daan si Davide.  Wa hinuon mosulti si Estrada nganong nagpadiktar siyang Tan—unsay iyang utang kabubut-on o kon unsay bugti sa iyang pag-uyon.

            Matod ni Estrada wa makawang ang pagtabang ni Tan kang Davide:  Kay ang kasong tax evasion batok ni Tan nga niabot sa Korte Suprema, inay husayon ang merito, gihimong bola sa pingpong ug gipasa pagbalik sa ubos nga hukmanan.

                        -o0o-

            Nihit ang mga detalye ni Estrada sa kaso.  Igo lang siyang niingon nga way niapelar mao nga hingpit nang nabasura ang kasong tax evasion batok ni Tan.

            Nakalimot ba si Estrada nga siya pa ang presidente niadtong higayona?  Nga ang prosekusyon sa kaso—nga naglakip sa Department of Justice ug sa buhatan sa solicitor general—iyang mga tinudlo ug direktang ubos sa iyang buhatan?  Nga, sa ato pa, pinasikad sa kasayuran nga gikan ra sang Estrada, ang kapakyas pag-apelar iyang kasaypanan ug di kang Davide?

                        -o0o-

            Ang mga pasangil ni Estrada batok ni Davide kabahin sa libro mahitungod sa iyang kinabuhi ug pamunoan nga gitakdang mogawas karong Disyembre.  Giuna-una niya pagpagawas ang mga pasangil aron pagkuwestiyon sa pagkatudlo ni Davide sa Truth Commission ug sa iyang kamatinud-anon paggukod ni Arroyo.  Nga, sama ni Tan, nautangan sab og kabubut-on ni Davide kay maoy nitudlo niya pagka embahador sa Pilipinas alang sa United Nations.

            Ang wa hisguti ni Estrada mao ang dako niyang kahiubos ni Davide.  Kinsa bisan gitudlo niya sa Korte Suprema wa mopakita og bisan gamay na lang timaan pagdupa niya atol sa impeachment trial sa Senado ug mao pa gyoy nipapanumpa ni Arroyo human siya napalagpot sa Edsa Dos niadtong Enero 20, 2001.  Samang katakos ni Davide pagsalikway og utang kabubut-on, bisan sa pasidaan ni Estrada, mahimong mapuslanon pagtuman sa labing bag-o niyang gimbuhaton.  [30]  leo_lastimosa@abs-cbn.com

Arangkada of Leo Lastimosa for July 7, 2010

                        Media ug gabinete

 

            Ambot kinahanglan pa nga seminaron ang mga sakop sa gabinete ni Pres. Noynoy Aquino unsaon pagpakiglambigit sa media.  Di na sila kinahanglan nga magkuha og resource persons nga mga eksperto sa media ug public relations aron pagpasabot sa batakan nilang mga gimbuhaton di lang ngadto sa media kon dili, ug labi na, ngadto sa mga magbubuhis nga, segun sa ilang pangu, maoy tinuod nilang amo:

·        Pagpakisayod unsay labing dagko ug dinalian nga mga panginahanglan sa nagkalainlaing mga hut-ong sa katilingban nga ilang gialagaran; ug

·        Pagpasabot sa ilang mga programa ug unsay kapuslanan ngadto sa kinabag-an sa nasud ug sa katawhan.

                        -o0o-

            Hinaot nga way sukaranan ang mga pagduda nga ang mga sakop sa gabinete inay tudloan sa makiangayon nga pakiglambigit sa media hulhogan na hinuon unsaon pagmaniobra sa media.  Kansang mga sakop mopalabi sa mga opisyal nga di kamaong manubag sa ilang mga pangutana kay sa mga tinubdan nga nakamenos nila.

            Angayng pasabton ang mga sakop sa gabinete ni Aquino nga ang sayop nga tubag sa media mas maayo pa kay sa paglikay-likay og tubag sa ilang mga pangutana.  Nga maoy bisyo nilang kanhi presidente Gloria Macapagal-Arroyo ug sa iyang gabinete.  Wa sila manambong og seminar mahitungod sa media.  Igo lang gipakaon ug gipainom ug gisuburnohan ang mga sakop sa media nga ilang natental.

                        -o0o-

            Sayop gyod hinuon si Presidential Spokesman Edwin Lacierda sa pakiglalis sa mga sakop sa media nga ilang gibakwi ang Memorandum Circular No. 1 di tungod sa sayop kon di tungod sa language "fine-tuning."  Si Lacierda, isip tigpamaba sa kampanya ni Aquino, suhito na sa media.  Ang bugtong katin-awan sa iyang bulilyaso mao nga nasudlan nang iyang ulo og gagmayng bakukang sa gahom.

            Sayop sab si Education Secretary Armin Luistro pagpasangil sa media nga nasayop sa sex education.  Daghang hambogerong sakop sa media.  Masuko sila kon pahibaw-on sa ilang sayop.  Mas maayong sultihan na lang unsay gituohan ni Luistro nga sakto.

                        -o0o-

            Di angayng maalarma ang Malakanyang sa giingon nilang kapakyas sa media pagtahud sa naandan nga "honeymoon period" sa unang 100 ka adlaw sa bag-ong pamunoan.  Di angayng ikahasol nga karon pa lang gikuti-kuti nang pagka-uwahi ni Aquino sa iyang mga lakaw, sa sayop sa iyang labing unang kamandoan ug sa panag-unay sa iyang mga dumadapig.

            Angayng pangandaman ang di kapugngan nga pag-abot sa panahon nga ang mga sakop sa media magsugod na og pangutana, ug nianang higayona may sukaranan nang mga magbubuhis nga maningil, unsa nay nahitabo sa ilang gipasalig nga pagbadlong sa grabe nga pangurakot, paghaw-as sa katawhan gikan sa lapad nga katimawa ug matinud-anon nga pagpatuman sa balaod, bisan kinsa ang hingtungdan ug bisan kinsa pa ang maig-an.  [30]  leo_lastimosa@abs-cbn.com

Arangkada of Leo Lastimosa for July 6, 2010

                        Bag-ong DPWH

            Ang bag-ong liderato sa DPWH di na mosusi tinuod ba nga, sama sa overpriced nga decorative lampposts ug surveillance cameras sa Asean Summit sa Sugbo, anomaluso sab ang pagpangaspalto sa kadalanan ug ang pagpatuman sa uban pang mga proyekto sa summit niadtong 2007.  Mao ni pasumbingay ni DPWH Secretary Rogelio Singson.

            Kinsa nahadlok nga kon iyang subayon ang mga pasangil sa kahiwian sa mga proyekto sa pamunoang Arroyo, wa na siyay laing mahimo.  Nitataw hinuon si Singson nga iyang paningkamotan paghatag og kinutoban ang kinawatay sa mga proyekto sa DPWH—nga sa pipila ka kaso 30% na lay nadapat sa proyekto kay ang 70% giilogan sa pribadong mga bolsa.

                        -o0o-

            Sa ato pa, mahimong di na matubag ang misteryo nganong ang makalibog nga kaso sa overpricing sa deco lampposts kutob ra sa mga opisyal sa rehiyonal nga buhatan sa DPWH sa Central Visayas ug wa kaabot nilang kanhi kalihim Hermogenes Ebdane ug ubang mga opisyal sa nasudnong buhatan, kansang pagtugot gikinahanglan pagpalihok sa higanteng transaksiyon.

            Gawas lang kon ang mga proyekto sa niaging Asean Summit maapil sa imbestigasyon sa Truth Commission ni kanhi chief justice Hilario Davide Jr.  Gawas sa kaso sa deco lampposts nga nagkayamukat sa Sandiganbayan, padayong giyak-an sa Visayas Ombudsman ang nag-unang kaso sa surveillance cameras.  Wa gyod gani susiha ang pasangil nga nipis kaayong aspalto sa ruta sa summit.

                        -o0o-

            Si Singson, kanhi tagduma sa Maynilad Water Services Inc., nipasidaan nga iyang palagputon ang mga opisyal sa DPWH nga di mosubay sa hiningusgan niyang kampanya batok sa pangurakot.  Determinado siya pagkuha pagbalik sa pagsalig sa katawhan alang sa usa sa labing nangalisbo nga buhatan sa kagamhanan.

            Uban ang pagtabang sa nagpakabana nga mga sektor sa katilingban, nanumpa si Singson pagbaraw sa nimaniobra sa mga subasta sa labing dagkong mga proyekto, pagtaktak sa "15-30" nga mga kawani sa nasudnon ug rehiyonal nga mga buhatan ug paghunong sa sabotahe sa pagpatuman sa mga proyekto nga nakapausik og binilyon ka pesos sa atong buhis.

                        -o0o-

            Hangtod karon wa pay lagda unsaon pagsusi sa Truth Commission ang gidudahan nga mga transaksiyon sa pamunoang Arroyo.  Ang mga sakop sa komisyon ba lay magpili?  O modawat sila sa mga reklamo sa mga magbubuhis?  Kutob ba lang sa mga proyekto nga gipasiugdahan sa nasudnong kagamhanan?  O mahimo sang iapil ang mga proyekto sa lunod-patay nga mga alyado ni Arroyo nga gidudahang gihimo sang kahimanan sa grabeng kawat?

            Wa pa ganing kasugod sa pakisusi, gikondenar nang komisyon ni Davide nga inutil ug ang pagtukod ni Aquino ini nga way kapuslanan.  Kasagaran sa nikisikisi mga turutot ni Arroyo.  Nga wa gyod untay angayng kahadlokan kon tinuod pa nga way mahimo silang Davide ug kaubanan.  [30]  leo_lastimosa@abs-cbn.com

Arangkada of Leo Lastimosa for July 5, 2010

                        Tunglo sa LTO

Dihang nagtuon pa kog drive (sa wa pa makumbinser nga mogamay ang dan kon duna koy kasugat), gihatagan ko sa driving school og student's permit.  Nga gipakaingon nako nga angay lang aron may papel kong kuptan nga nagtugot nako pagkat-on pagmaneho ginamit ang kadalanan.

Hangtod nga akong nalilian sa website sa LTO ang mga panginahanglan sa student's permit:  Aplikasyon alang sa driver's license; orihinal nga birth certificate uban ang photocopy; NSO authenticated birth certificate uban ang opisyal nga resibo ug photocopy; orihinal nga balidong pasaporte uban ang photocopy; ID sa PhilHealth, o GSIS, o TIN, o Pag-ibig, o sa kompaniyang gitrabahoan; ug kon 16 ngadto sa 18 anyos pang aplikante, gi-notaryohang pagtugot sa mga ginikanan.

-o0o-

            Mas kuti ang mga panginahanglan non-professional ug professional driver's license.  Apan akong driving school nipasalig nga human sa usa ka buwan kabayloan na ang akong student's permit og non-professional driver's license.  Wa na ko magtagad pagkuha og driver's license apan daghan sa akong mga higala niingon nga namayad lang silag fixers.

            Atubangan sa sunudsunod nga mga aksidente sa kadalanan sa Sugbo karong tuiga, ug human niasumir ang bag-ong pamunoan, angayng sublion sa LTO ang busluton nilang sistema.  Unsa ba kaluwas ang inosenteng mga pasahero ug responsableng mga motorista gikan sa mga drayber nga gipanghatagan og lisensiya sa way pagtudlo sa batakang mga lagda sa trapiko ug luwas nga pagmaneho?

-o0o-

            Gawas sa negatibong resulta sa drug test, medical certificate, NBI clearance ug TIN, ang aplikante kinahanglan nga mopasar sa written ug practical examination.  Apan nahibaw-an na sa tanan, gawas na lang tingali sa tigsuwat sa press release sa LTO nga nabadlong na nilang fixers, nga ipahigayon lang ang tinarung nga pasulit kon may bus nga moambak sa pangpang ug ubang aksidenteng mamatyan og daghan.

            Labaw nang wa magtagad ang LTO pagsusi kamao ba gyong momaneho ang mga aplikante nga ilang gihatagan og lisensiya.  Hinaot nga ilang tun-an ang mga sugyot nga hiusahon ang driving schools pagtikad og lapad nga luna nga morepresentar sa tanang matang sa agianan ug komplikasyon sa trapiko alang sa ilang mga tinun-an.

-o0o-

            Dia pay laing binuang sa LTO.  Nakahibawo ka ba unsay kalainan sa non-professional ug professional license?  Ang non-professional driver's license nagkinahanglan og student's permit nga balido sud sa usa ka buwan; samtang ang professional driver's license nagkinahanglan og student's permit nga balido sud sa lima ka buwan.

Mao ra na.  Way lahi nga pakisusi kamao ba gyong moda og higanteng trucks o buses ang mga aplikante sa professional license.  Maong sunod higayon nga makasugat o makasakay ta og trak o bus sa lugsungon nga likoanan duol sa pangpang, mangaliya ta nga ang drayber wa kabayad og fixers.  [30]  leo_lastimosa@abs-cbn.com

Arangkada of Leo Lastimosa for July 4, 2010

                        Numero sa Kongreso

            Nangalisbo ang matematika sa politika.  Ang Liberal Party (LP) duna ray upat ka senador.  Apan mahimong makakuha sa Senate Presidency.  Ang LP duna ray 45 ka kongresista.  Apan segurong makakuha sa House Speakership.

            Ang higanteng dahili sa mga politiko ngadto sa LP nanukad ra gyod sa paglingkod ni Pres. Noynoy Aquino sa Malakanyang.  Tungod sa sistema sa politika nga nahigot sa pork barrel—nga mahimong isabod apan mahimo sang yak-an sa palasyo—hapit tanang magbabalaod gusto nang motila sa lapalapa sa bag-ong pamunoan.  Lisod tuohan nga pila lang ka buwan ang nilabay, makabungog nga mayoriya sa samang mga magbabalaod nag-ambahan pagtabon sa mga eskandalo sa kanhi presidente karon ila nang kauban, si Gloria Arroyo sa ikaduhang distrito sa Pampanga.

-o0o-

            Ang upat ka LP sa Senado mao silang Kiko Pangilinan (ang ituboy pagka Senate President), Franklin Drilon, Ralph Recto ug TG Guingona.  Ang pundok ni Manny Villar naglakip nilang Alan ug Pia Cayetano, Bongbong Marcos, Loren Legarda ug Miriam Defensor Santiago.

            Ang pundok nga gipangulohan ni Edgardo Angara, mahimong mopaluyo ni Pangilinan, naglakip nilang Migz Zubiri, Bong Revilla, Lito Lapid, Gringo Honasan ug Tito Sotto.  Si Senate President Juan Ponce Enrile nipiling Pangilinan.  Bisan si Serge Osmena, nga nitawag sa LP bloc nga "hollow block," mobotar ni Pangilinan.  Ang 12 botos ni Pangilinan kuwang pa hinuon sa gitakda nga mayoriya nga 13 botos.  Bisan 21 na lang sila.  Kay nagtagutago pa si Ping Lacson, binilanggo gihapon si Antonio Trillanes ug tua na sa Malakanyang magtikaw-tikaw si Noynoy Aquino.

-o0o-

            Mas klaro nang numero sa House.  Si Sonny Belmonte, salamat sa bendisyon ni Aquino, nakapahimus sa pagburot sa mga sakop sa LP.  Gikan sa 44 nga nidaog sa Mayo 10, nadugangan silag 25.  60 sa 104 ka Lakas mopaluyo niya.  37 ka NPC, nga nagpaabot nga kuyogan sa 20 ka Lakas, parang Belmonte.  23 ka NP gipasalig sang Villar alang ni Belmonte.

            Sa labing uwahing ihap sa LP, 195 na ka kongresista ang mopaluyo ni Belmonte.  Apil na sa ihap ang mga independente ug pipila ka party-list.

-o0o-

            Apan ang bag-ong kongresista sa ikaduhang distrito sa Pampanga may laing mga numero nga gitamdan.  Gitahan na niyang kahigayonan nga ma-speaker.  Masaligon hinuon nga makakuha sa suporta sa 100 ka kongresista.  Di sila kinahanglang modiga na sa ilang baraha karon.  Mahimo ganing mosipsip una silang Belmonte.

            Ang 15^th Congress maoy labing dako sa kasaysayan—may 287 ka sakop, salamat sa 57 ka party-list representatives.  Nga ang mayoriya iyang Arroyo (pito ray nisaad pagbotar ni Belmonte).  Di sila kinahanglan nga manlihok dayon.  Unya na kon apikihon gyod sa Truth Commission sa daghan uyamot niyang eskandalo, si Arroyo nagkinahanglan lag 95 botos pag-impeach ni Aquino.  [30]  leo_lastimosa@abs-cbn.com

Arangkada of Leo Lastimosa for July 3, 2010

                        Bara sa trapiko

 

            Kon tumanon gyod ni Pres. Noynoy Aquino ang iyang saad sa di paggamit og wang-wang ug pagsunod sa mga lagda sa trapiko, nga hinaot makapauwaw sa mga politiko nga maghawud-hawod sa kadalanan, kinahanglan siyang momata og mas sayo.  Nga sayon na lang kon matuman ang iyang saad pagputol sa iyang bisyo pagtukaw hangtod sa lawom nga gabii.

            Ang pagkatanggong ni Aquino sa trapiko nga nakapauwahi niya sa pagtunol sa liderato sa Armadong Kusog di igong sukaranan pagbakwi sa iyang saad.  Bisan sa pag-insistir sa iyang mga magtatambag nga gitugotan siya sa balaod nga mag-wang-wang.  Kon di sila gustong maibanan ang katug sa presidente, mas maayong tambagan nila siya unsaon pagsulbad ang nagkagrabeng suliran sa trapiko.

-o0o-

            Mas dakong kahasol ang nahiagoman ni Aquino sa trapiko sa burukrasya.  Ang pagkasayop sa Memorandum Circular No. 1 (MC 1) nagmatuod nga nagduhiraw pa ang iyang pamunoan pagsubay sa nagkalainlain nga ang-ang sa kaliboan ka mga katungdanan sa kagamhanan.  Di hinuon ni atraso sa bag-ong pamunoan.  Kay ang buhatan nga gitahasan pagtarung ug pagpalig-on sa burukrasya nagpaggamit man sa mga maniobra paghimo ini nga tam-okanan sa way nakamaohan nga mga batabata sa mga politiko.

            Ang Civil Service Commission (CSC) giumol sa batakang balaod aron pagpatigbabaw ug pagpalambo sa propesyonalismo sa burukrasya.  Ug pagpanalipod ini gikan sa pagpanghilabot sa mga politiko nga mas hiktin og panglantaw kay nagsige lag lantaw sa sunod nga piniliay.

-o0o-

            Apan ang CSC gipangulohan karon ni FranciscoDuque.  Kinsa modagan unta pagka senador hangtod nga naklaro nga nangiwit siya sa surveys, sama sa ubang suod ni Arroyo.  Kinsa natugpa na lang sa CSC kay nabisto nga di kuwalipikado ang unang gipahimutang ni Arroyo, ang lain niyang itoy nga si Ricardo Saludo.

            Klaro ang tuyo ni Arroyo pagbutang ni Duque sa CSC uban ang pito ka tuig nga termino:  Ang pagpanalipod sa iyang mga batabata sa labing mahinungdanon nga mga buhatan sa kagamhanan, bisan kon kasagaran nila di takos sa mga katungdanan nga ilang gihuptan.

-o0o-

            Ug nagsugod dayon si Duque pagtuman sa iyang papel.  Gipahiyos niyang epekto sa MC 1 pinaagi sa pag-insistir nga di kaabot og 1,500 ang maapektahan sukwahi sa pangangkon sa bag-ong pamunoan.  Nikumpisal hinuon si Duque nga 89% pa sa mga posisyon ang ilang na-imbentaryo.  Wa siyang kapasabot nganong natapos na lang ang termino ni Arroyo wa pa ni nila mahuman.

            Matod ni Duque 357 ra ka presidential appointees ang co-terminus ni Arroyo, sa ato pa nangatangtang na niadtong Hunyo 30; ug 831 ang naghupot og career executive service positions apan di CESO eligible.  Kon may bisan gamay na lang kaligdong si Duque gitangtang na unta niyang mga tinudlo ni Arroyo nga way tukmang eligibility bisan sa wa pa mopuli si Aquino.  [30]

Arangkada of Leo Lastimosa for July 2, 2010

                        Tangtang si Winston

 

            Di na si Winston Garcia ang presidente ug general manager sa Government Service Insurance System (GSIS).  Bisan kon wa pa katudlo si Pres. Noynoy Aquino sa mopuli niya.  Matod ni Aquino nga banker ang sunod nga moduma sa GSIS.  Apan nangayo og dugang lugway pagpangandam sa dakong kausaban sa iyang kinabuhi, ug kinitaan, kon hingpit nang mobiya sa pribadong sektor.

            Sa labing unang kamandoan sa unang tigom sa gabinete ni Aquino, nga gibakwi dayon alang sa "language fine-tuning," gitangtang na ang tanang tinudlo nga mga opisyal kansang termino napupos dungan sa nagtudlo nila nga si kanhi presidente Gloria Arroyo niadtong udtong tutok sa Hunyo 30.

-o0o-

            Maayo ning balita alang sa mga sakop sa GSIS.  Kinsa wa matagbaw sa pamunoan ni Garcia nga samtang napuno sa pagawal nga nidako pag-ayong kita sa GSIS kanunay sang nalangay sa paghatag sa binuwan nga pension ug ubang mga benepisyo.  Kanunayng gibasol ni Garcia ang computerization.  Nakalimot tingali nga ang computerization angay untang mosangpot sa mas paspas ug mas hapsay nga, di sa way kinutoban nga pagkabara sa, mga transaksiyon.

            Nanghinaot ang mga sakop sa GSIS nga sa kataposan mahibaw-an na gyod nila unsay hinungdan sa kahasol sa pagkobra sa ilang mga benepisyo:  Ang kagubot ba gyod sa sistema; o ang ka wa nay kuwarta sa GSIS?

-o0o-

            Ang Memorandum Circular No. 1 (MC 1) sa Malakanyang nagpasabot sab nga bakante nang katungdanan pagka general manager sa Mactan Cebu International Airport Authority (MCIAA).  Kay co-terminus man si Heneral Danilo Augusto Francia ni Arroyo.

            Di na magsilbi ang palusot ni Francia nga magpabilin siya sa katungdanan hangtod nga makatudlo si Aquino og ipuli niya.  Ubos sa kamandoan, ang ikaduha nga labing taas nga opisyal maoy kasamtangan nga mopuli pagduma sa MCIAA.  Hangtod nga may klaro na gyong itudlo si Aquino.  Nga hinaot pa unta makapasar na sa panginahanglan sa career service executive officer (CESO) eligibility sa Civil Service Commission (CSC).

-o0o-

            Daghang susama og kahimtang ni Francia.  Nga naglaom nga magpabilin sa katungdanan.  Nanghinaot sila nga mataligam-an sa Malakanyang ang pagpabilin sa ilang katungdanan.  Kay may kaliboan pa nga mas dagkong mga katungdanan nga angay nga unang hulipan.

            Klarong lipat-lipat ang ilang tuyo.  Naglaom sila nga sa pagsubli sa Malakanyang sa bakanteng mga katungdanan, di maapil ang ila.  Kay wa pa man sila mobiya ug busa di pa bakante.  Hangtod nga makabaiid sila og sikit sa luwag sa bag-ong pamunoan aron kalugwayan ang malipayon nilang mga adlaw.  Hangtod nga giluwatan ang MC 1.  Nga bisan gibakwi dayon ug giusab ang makalibog nga lengguwahe, epektibo na nga nideklarar sa katungdanan ni Francia ug sa tanang political appointees nga bakante ug hinog na nga pulihan.  [30]  leo_lastimosa@abs-cbn.com

Arangkada of Leo Lastimosa for July 1, 2010

                        Duda ni Davide

 

            Gipahibawo ni President-elect Noynoy Aquino atol sa iyang inaugural address nga gidawat nang kanhi chief justice Hilario Davide Jr. ang iyang tanyag pagpangu sa Truth Commission.  Wa hinuon dugangi ni Aquino ang mga detalye sa mga gahom ug mga gimbuhaton sa komisyon nga iya nang napahibawo sa paghingan sa mga sakop sa iyang bag-ong gabinete.

            Ug si Davide way ikapuno.  Makigtagbo pa siya sa ubang mga sakop sa komisyon nga wa pa niya mailhi hangtod karon.  Igo lang niingon si Aquino nga ang komisyon makaandam ug makapasaka og mga kaso batok sa mga mapamatud-an nga nahilambigit sa mga eskandalo sa gipulihan niyang pamunoan ni kanhi presidente, karon Kongresista, Gloria Arroyo.

                        -o0o-

            Si Kongresista Eduardo Gullas nipasabot nga wa kinahanglana ang pagpasar og balaodnon sa Kongreso pagtakda sa gahom ug mga gimbuhaton sa Truth Commission.  Matod niya igo na ang kamandoan ni Aquino nga ang komisyon ni Davide makiglambigit sa Department of Justice (DOJ).  Nga wa makapapas sa kalibog sa pipila ka mga abogado.

            Kinsa nangutana kon kabahin ba sa gahom sa komisyon ni Davide ang pagluwat og supina pagpugos sa mga tawo pagtambong sa mga imbestigasyon nga ilang ilusad.  Kay kon kutob ra sila sa pagdapit, mahimo silang isnabon ni Arroyo ug sa ubang gipasanginlan nga nahilambigit sa Hello Garci, NBN-ZTE ug ubang mga eskandalo.

                        -o0o-

            Apan ang Truth Commission, sama sa DOJ, di makadiretso pagpasaka sa mga kaso sa Sandiganbayan.  Kon mga opisyal sa kagamhanan ang hingtungdan igo lang sila nga makapasaka sa ilang mga rekomendasyon sa buhatan sa Ombudsman.

            Kansang tagduma, si Merceditas Gutierrez, niabsuwelto nang daan ni kanhi first gentleman Mike Arroyo sa NBN-ZTE.  Nimando si Gutierrez nga iimbudo sa iyang buhatan ang tanang ipasaka nga mga kaso.  Mahimo nga iyang yak-an ang mga kasong ipasaka ni Davide hangtod siyam-siyaman.  O hangtod mapupos ang iyang termino unya sa Disyembre 2012.

                        -o0o-

            Gikuwestiyon na ang kaligdong ni Davide tungod sa iyang kasuod ni Arroyo.  Ang wa hibaw-i sa mga nanaway mao nga nibiya na si Davide sa UN aron pagpangampanya alang sa iyang anak, Hilario III, pagka gobernador sa Sugbo ug ni Aquino.  Mas maapiki ang komisyon, ug manimaho gyod og pagpanggukod, kon gitugyan pa ngadto sa pangu nga higpit nga kaatbang ni Arroyo.

            Napamatud-an na sang Davide sa impeachment trial ni kanhi presidente Joseph Estrada sa Senado nga mapatigbabaw ang iyang kaligdong bisan si Estrada ang nagtudlo niya pagka chief justice ug bisan gisigehan og hulhog sa mga kaatbang ni Estrada.  Gawas pa, gitudlo ni Arroyo si Davide sa UN di tungod sa ilang kasuod kon dili aron pagpapas ni Davide isip politikanhong karibal tungod sa taas niyang popularidad human niretiro gikan sa Korte Suprema.  [30]  leo_lastimosa@abs-cbn.com

Arangkada of Leo Lastimosa for June 30, 2010

                        Duha ka Sugbuanon

 

            Duha ka Sugbuanon ang naapil sa pagtudlo ni Presidente Noynoy Aquino sa mga sakop sa iyang gabinete.  Pulos mahinungdanon ang katungdanan nga ilang huptan.  Si Jose Rene Almendras maoy mangu sa Department of Energy (DOE) nga maoy mosulbad sa lapad nga krisis sa elektrisidad sa Sugbo, Kabisay-an, Luzon ug Mindanao.  Samtang si kanhi chief justice Hilario Davide Jr. maoy mangu sa gitukod nga Truth Commission nga maoy mo-imbestigar sa mga eskandalo sa pamunoan ni Gloria Macapagal-Arroyo.

            Wa maapil sa ginganlan ni Aquino si Kongresista Tomas Osmena sa habagatang distrito sa Dakbayan sa Sugbo.  Kansang gipangandoy nga National Economic Development Authority (NEDA) gitugyan ni Aquino ngadtong Cayetano Paderanga, kinsay maoy naghupot sa samang katungdanan sa gabinete ni anhing presidente Cory Aquino.

                        -o0o-

            Si Almendras mas nailhan sa mga Sugbuanon isip igsuon ni Cebu Provincial Board Member Agnes Magpale ug uyoan ni outgoing Tourism Secretary Ace Durano.  Mas naila hinuon siya sa kalibotan sa patigayon isip tagduma sa mga kompaniya sa Ayala, ang Cebu Holdings Inc. kaniadto ug ang Manila Water Company karon.

            Mas nailhan siyang Aquino kay classmate sila sa Ateneo de Manila University.  Kasaligang mga tinubdan nagbutyag nga salig kaayo si Aquino ni Almendras nga maoy una niyang gitanyagan isip executive secretary (apan gibalibaran ni Almendras kay di siya politiko) ug dayon isip kalihim sa Department of Public Works and Highways (nga iya sang gibalibaran tungod sa ka-kontrobersiyal sa DPWH).

                        -o0o-

            Gipasabot ni Aquino nga ang Truth Commission ni Davide iyang gitahasan sa pag-andam ug pagpasaka og mga kaso batok sa tanang nahilambigit sa mga eskandalo sa iyang gisundang pamunoan.  Gitataw ni Aquino nga angayng tiwason ang wa gyod matarung pag-imbestigar nga Hello Garci, NBN-ZTE, Fertilizer Scam ug daghan pang uban.

            Way makalalis sa katakos ug kaligdong ni Davide pagbugtaw sa kamatuoran sa labing nangalisbo nga mga eskandalo sa pamunoang Arroyo.  Kini bisan siyay nagpapanumpa ni Arroyo human sa Edsa Dos batok ni kanhi presidente Joseph Estrada (nga mao say nagtudlo niya pagka chief justice) ug bisan gitudlo siyang Arroyo isip embahador sa Pilipinas alang sa United Nations.

                        -o0o-

            Masulbad ba dayong Almendras ang kanihit sa kuryente?  Sa way paglawog sa katawhan ngadto sa independent power producers (IPPs) nga maoy gihimo ni kanhi presidente Fidel Ramos pagsulbad sa krisis sa kuryente sa 1992?  Tan-awon nato kon ang iyang kamalampuson sa pribadong sektor magsilbi ba sa maliputong burukrasya sa kagamhanan.

            May igo pa bang kahimsog ang 75 anyos nang si Davide pagtuman sa imposibleng tahas nga gisangon ni Aquino niya?  Wa pa ganing kalingkod, niandar nang makinarya sa propaganda pagbuong sa iyang kadungganan.  Gisugdan na pagbanhaw ang pasangil nga wa siyang kapatin-aw giunsa paggasto ang binilyon ka pesos nga Judiciary Development Fund (JDF) sa Korte Suprema.  [30]  leo_lastimosa@abs-cbn.com

Arangkada of Leo Lastimosa for June 29, 2010

                        Job Fair sa Opon

 

            Kaliboan na sab ka bakanteng trabaho ang maaplayan sa mga way trabaho ug sa mga nangita og mas maayong trabaho atol sa Kapamilya Local Job Fair tibuok adlaw karong Dominggo, Hulyo 4.  Salmotan sa mga kompaniya sa Mactan Export Zone, ipahigayon ni sa Pueblo Verde, MEZ II, sa Basak, Lapulapu City.

            Timaan ni nga nahibalik na ang kadasig sa operasyon sa mga kompaniya sa MEZ human sa kalibotanong krisis sa panalapi sa niaging tuig.  May pipila pa gani nga nipalapad sa ilang patigayon.  Ang pipila sa nisalmot sa mga kompaniya igo lang hinuon nga moilis sa ilang mga kawani kansang mga kontrata mapupos na.

                        -o0o-

            Ang mosunod maoy gikinahanglan:  Production workers, sewers, company drivers, store managers, cashiering supervisors, administrative officers, receiving supervisors, checkout clerks, warehouse supervisors, baggers, sales clerks, machinists, engineers, encoders, janitors, purchasing staff, call center agents, accounting clerks, CAD operators, visual illustrators, fashion designers, costing and analyst staff, metal sample makers, finance clerks, quality assurance agents, riders, mass communication graduates, waitresses, waiters, welders, construction workers, cahiers ug IT graduates.

            Mahimo nga makaaplay ang bag-ong mga gradwado.  Matod ni Grace Jamio, Public Employment Services Officer (PESO) sa Lapulapu City mahimo gani nga maaplay ang mga gradwado sa high school.  Mahimo sab nga makaaplay bisan ang mga hingkod na og pangedaron.

                        -o0o-

            Karon pa lang, angayng andamon na ang mga dokumento alang sa employers.  Mas maayo nga daghanon ang kopya sa mga dokumento aron makapangaplay sa daghang trabaho.  Kinahanglan nga isumiter sa mga gradwado sa high school ang mosunod:  Bio data, 2x2 colored picture, birth certificate, high school diploma, high school card, certificate of good moral character, barangay clearance, certificate of employment (kon duna) ug certificate of training (kon duna).

            Ang mga gradwado o tinun-an sa kolehiyo kinahanglan nga mosumiter sa mosunod:  Resume, 2x2 colored picture, birth certificate, transcript of records, barangay clearance, certificate of employment (kon duna) ug certificate of training (kon duna).

                        -o0o-

            Nagpadayon na karon ang rehistrasyon sa mga aplikante sa PESO sa Lapulapu City Hall.  Ang pre-screening sa mga aplikante ipahigayon sa Pueblo Verde, MEZ II, Basak, Lapulapu City sa bisperas sa job fair karong Hulyo 3, 2010 gikan sa alas-8 sa buntag hangtod sa alas-5 sa hapon.

            Unsa may bentaha kon marehistro ug ma-screen nang daan ang mga aplikante?  Mag-una na sila og duha ka lakang sa ubang mga aplikante.  Sa adlaw sa job fair karong Dominggo, Hulyo 4, modiretso na sila og atubang sa mga tagduma sa nisalmot nga mga kompaniya.  Sa ato pa, mas daghang trabaho ang ilang kaaplayan.  Gawas nga di na maguba ang ilang hinapay ni magkadusingot sa taas nga linya.  Ug makatingob na sa pagpangandam pagtubag sa mga pangutana sa employers.  [30]  leo_lastimosa@abs-cbn.com

Arangkada of Leo Lastimosa for June 28, 2010

                        Linigwatay parang Noynoy

 

            Wa pa ganing kalingkod si President-elect Noynoy Aquino sa Malakanyang, nitumaw nang panagsungi sa nagkalainlaing pundok nga pulos nagpaluyo nila.  Ang panagsungi gikahadlokan nga (1) kon di makapalawom sa ilang pasiunang away ni Vice President-elect Jejomar Binay, (2) makapabuak sa ilang kasuod sa naparot niyang runningmate, si Senador Mar Roxas; nga gikahadlokan nga pulos (3) makapalipat niya pagtuman sa duha ka labing dagko niyang saad sa kampanya—ang pagbadlong sa pangurakot ug pagsulbad sa katimawa.

            Tungod sa kauwahi nang naumol sa iyang kandidatura pagka presidente, wa nay panahon sa paghusay sa panagsungi ug paghiusa sa nanguhong nga mga pundok nga nipaluyo niya.  Ang managlahi nga mga panglantaw sa iyang mga dumadapig mao karoy nagbira-bira sa direksiyon sa iyang pamunoan.

-o0o-

            Duha ang labing higpit nga nagkabangga nga mga pundok, mas maayong makaila mo nilang kay mahimong mosalida sila sa unang mga adlaw sa pamunoang Aquino:

·        Ang Balay group nakakuha sa iyang ngan sa building ni Roxas sa Cubao nga maoy gibasehan sa Hyatt 10, ang kanhi mga sakop sa gabinete ni Pres. Arroyo nga namahawa ug niawhag sa iyang resignasyon human sa pag-ulbo sa Hello Garci scandal, ug sa Bantay Balota, ang pundok nga nanalipod sa mga boto nilang Aquino ug Roxas sa niaging piniliay; ug

·        Ang Samar group nagbase sa karaang bay sa Samar Avenue sa Quezon City gikatahong naglakip ni Senador Chiz Escudero ug sa mga abogado nga niboluntaryo pagpanalipod sa kandidatura ni Aquino, gipangulohan ni Maria Montelibano, ig-agaw ni Aquino, ug gikatahong nangampanya sab alang ni Binay.

-o0o-

            Ang unang mga lakang ni Aquino isip presidente ipasikad sa iyang plataporma.  Nga giumol sa mga eksperto sa Partido Liberal nga gitapok ni Roxas sa wa pa siya mopadaplin alang ni Aquino.  Ang National Institute for Policy Studies (NIPS) gikatahong naglakip ni Neric Acosta, naparot nga kandidato pagka senador, ug Manuel Quezon III, tigpasabot sa mga pangandam sa inugurasyon.

            Laing sakop sa NIPS mao si Dina Abad, kongresista sa Batanes ug asawa sa campaign manager sa LP, Butch Abad.  Kon matudlo si Abad isip budget secretary ug ang ilang anak, si Julia, chief of staff karong Aquino sa Senado, isip pangu sa Presidential Management Staff (PMS), ang pamilyang Abad maoy labing dakog tingog sa Malakanyang.

-o0o-

            Nireklamo sa karambola sa mga dumadapig ni Aquino mao ang iyang uyoan, si kanhi kongresista Peping Cojuangco, kinsa nangluod nga wa paminawa sa iyang pag-umangkon.  Mao ba ni hinungdan nga nataligam-an bisan ang labing yanong mga gimbuhaton sama sa pagdapit sa ilang mga lider sa Sugbo alang sa inugurasyon?

            Nidaog si Aquino bisan sa away sa iyang mga dumadapig.  Hinaot nga molampos sang iyang pamunoan bisan sa linigwatay sa labing dagkong mga haligi sa iyang pamunoan.  [30]  leo_lastimosa@abs-cbn.com

Arangkada of Leo Lastimosa for June 27, 2010

                        Milagro sa kamunggay

 

            Dihang gihangyo namong mga tigpaminaw sa DYAB sa pagda og mga putahe nga may kamunggay, kay gihimo mang Kamunggay Festival ang labing uwahing Kumbira sa Kapamilya pagtimaan sa ika-15 nga sumad sa sibyaanan, gipakaingon namo nga pipila ray motuman ug ang kasagaran mogamit sa ilang kagawasan pagluto sa ilang tinuod nga kinaham nga mga pagkaon bahala nag way kamunggay.

            Maong labihan namong kuganga dihang nasaksihan ang lamian nga pasundayag sa mga pagkaon nga pulos naggamit og kamunggay.  Nagtuo man gud mi nga mapul-an pa og pangumbinser sa katawhan sa paggamit sa kamunggay sa bag-ong mga paagi puno sa paghimo ining sud-an.  Sama sa naandan, gipamatud-an sa katawhan nga di sama kaiwit ang iyang kasayuran kay sa gituohan.

-o0o-

            Apil sa nakadapit sa among pagtagad mao ang binangkal nga kinamunggayan, cake nga labihang berdeha tungod sa sagol nga kamunggay, kamunggay pizza, kamunggay wine, kamunggay omelet, kamunggay sandwich, pulburon nga kamunggay, kamunggay-kamote pie ug kamunggay iced tea.

            Labing kinaham sa mga nanambong ang kinamunggayan nga lechon baboy sa Danao nga gituyo pagpaandam sa nanamilit na namong kauban nga si Atty. Ina Magpale Asirit.  Nagduda hinuon ko nga tungod to kay nagpabilin ang kamadanihon sa lechon bisan duga sa kamunggay ang gipahid ug gisagolan og lab-as nga dahon sa kamunggay ang mga lamas sa tiyan.  Ang naandan nga tinunoang utan kamunggay, tinunoang nangka ug kamunggay, manok nga kinamunggayan ug sardinas nga kinamunggayan wa sab pasayloa sa mga nangumbira.

-o0o-

            Kamunggay ang logo sa Food and Nutrition Reasearch Institute sa Department of Science and Technology.  Gawas nga pagkaon, ang kamunggay makatabang pagtin-aw sa panan-aw, paghilis sa pagkaon, pag-ayo sa sakit sa tiyan, paglimpiyo sa samad, pag-ayo sa hubak, sakit sa dunggan ug labad sa ulo.  Tungod sa kaabunda sa calcium, ang kamunggay makapalambo sab pag-ayo sa gatas sa mga inahan nga nagpatutoy.

            Si Josie Elli, senior science research specialist sa DOST 7, nipasabot sa mga nanambong sa Kumbira nga daghan nang mga produkto ug teknolohiya sa kamunggay.  Mapauga ang kamunggay nga di mawa ang kamapuslanon aron mapulbos ug maggamit sa mas daghang mas mapuslanong mga paagi.

-o0o-

            Alang sa mga nagduda pa sa kamunggay, palihug basaha ni:  Ang usa ka tasa nga linuto nga kamunggay dunay 3.1 g. protein, 0.6 g. fiber, 96 mg calcium, 29 mg phosphorus, 1.7 mg iron, 2,820 mg carotene, 0.07 mg thiamin,0.14 mg riboflavin, 1.1 mg niacin, and 53mg ascorbic acid or vitamin C. Ang antioxidant activity sa kamunggay 71%, ubang α- tocopherol (vitamin E) equivalent nga 45.

Tungod sa abundang vitamins A, C ug E nga gamhanang antioxidants, ang kamunggay makapugong sa arthritis, cancer, mga sakit sa kidney ug kasingkasing ug pagpangunot sa panit.  Ang kamunggay duna say phytochemical niaziminin nga makabatok sa tumor.  [30]  leo_lastimosa@abs-cbn.com

Arangkada of Leo Lastimosa for June 25, 2010

                        Gaway ni Gloria

 

            Naghinam-hinam nang militanteng mga pundok ug ubang nagpakabanang sektor sa ka katilingban pagpasaka og mga kasong pagpangawkaw batok ni Pres. Arroyo.  Kinsa mahukasan na sa presidential immunity from suit human sa udtong tutok sa Hunyo 30.  Sa kataposan, mapaninglan na gyod nila si Arroyo sa tanang mga pasangil sa pagpangawkaw sa siyam ka tuig niyang pagtungkawo sa Malakanyang.

            Magkapuliki gyod tinuod si Arroyo pagpanagang sa magpungasi nga mga kaso batok niya.  Di nang kapasalipod sa iyang mga alyado sa Kongreso nga nibasura sa tanang impeachment complaints ug nibabag sa tanang pagsuway pag-imbestigar sa mga pasangil batok niya.  Di na sab mahimong moingon lang nga, "I'm sorry," sa way pag-angkon og bisan unsang kasal-anan.

                        -o0o-

            Apan ang tanang mga kasong kriminal nga ipasaka batok ni Pres. Arroyo moagi sa buhatan sa Ombudsman.  Nga giduma ni Merceditas Gutierrez.  Classmate ni First Gentleman Mike Arroyo, tinudlo ni Pres. Arroyo ug magpabilin sa katungdanan hangtod sa Disyembre 2012.

            Kinsa nimatuod sa makadaghan na uyamot nga higayon nga mas matinahuron sa mga Arroyo kay sa balaod.  Kansang labing uwahing salida mao ang pagyaka sa $329 milyones nga eskandalo sa NBN-ZTE, pagpalingkawas sa first gentleman dihang sibaw nang awhag sa pagpasaka sa kaso sa Sandiganbayan, pagsakripisyo ni kanhi Comelec chairman Benjamin Abalos ug pagduhig pa gyod ni SSS President Romulo Neri nga mao untay nibutyag sa pagsuway pagpanuburno.

                        -o0o-

            Wa paminawa ni Gutierrez ang mga awhag nga mokanaog sa katungdanan dungan sa pagbiya ni Arroyo sa Malakanyang.  Aron kahatagan og hingpit nga kagawasan si President-elect Noynoy Aquino pagtakda og lab-as nga direksiyon sa kampanya batok sa pagpangawkaw.

            Samang Arroyo, si Gutierrez duna say immunity from suit.  Mapalagpot lang sa katungdanan pinaagi sa impeachment.  Nga makapabuak-buak lang sa Kongreso ug makalipat sa Malakanyang kon ilusad sa unang tuig sa pamunoang Aquino.  Sa ato pa, kon magpabaga gyod si Gutierrez pagyaka sa mga kaso batok ni Arroyo, gikahadlokan nga bisan ang dagkong gahom sa buhatan ni Aquino way mahimo.

                        -o0o-

            Inutil ba gyod si Aquino ug ang minilyon ka katawhang Pilipinhon nga nipili niya sa niaging piniliay sa mga gaway samang Gutierrez nga gipahimutang daan ni Arroyo pangandam sa iyang pagbiya sa Malakanyang?  Mao nay hagit sa liderato ni Aquino ug sa padayong pagpakabana sa katawhan.

            Seguro nang makuha ni Aquino ang mayoriya sa House of Representatives.  Mahimong makuha sab ang liderato sa Senado.  Apan ang mga kongresista ug mga senador igo lang magpaling-paling asa padung ang hangin sa politika.  Ang Ombudsman, ang prosecutors ug ang mga maghuhukom sa Korte Suprema ug ubos nga mga hukmanan kinahanglan nga mopadaplin sa ilang utang kabubut-on ug mopatigbabaw sa mas dako nilang katungdanan sa nasud, sa katawhan ug sa kasaysayan.  [30]  leo_lastimosa@abs-cbn.com

Arangkada of Leo Lastimosa for June 24, 2010

                            Alas ni Binay

 

              Maayong pagkaduwa ni Vice President-elect Jejomar Binay ang iyang baraha.  Samtang pila na lang ka adlaw sa di pa siya moasumir sa Malakanyang uban ni President-elect Noynoy Aquino.  Sama sa kangilngig nga nakatago sa tanan niyang alas sa niaging kampanya:  Sa pagdiga sa inanay niyang pag-apas ni Senador Loren Legarda pila ka semana wa pang piniliay; ug sa kalit ug makapakugang nga pagbundak sa iyang labaw ni Senador Mar Roxas sa adlaw sa piniliay.

              Way makatulisok ni Binay nga nagpa-presyo.  Ni nanglawgaw sa pag-organisar ni Aquino sa iyang gabinete ug sa pagpangandam sa makasaysayanon nga inugurasyon karong Hunyo 30.  Way makapasangil ni Binay nga nisabotahe sa anak sa iyang pinangga nga si kanhi presidente Cory.

-o0o-

              Di hinuon lunsay si Binay.  Napakyas siya pagtago sa tanang sidsid sa sayal sa iyang ka-burukinto.  Sama sa iya untang pagpanumpa atubangan ni Chief Justice Renato Corona, nga makapa-bakikaw sa padayong pagkuwestiyon ni Aquino sa pagdalidali ni Pres. Arroyo pagtudlo ni Corona sa higayon nga gidid-an siya sa balaod.  Ug sa iya untang pagpapanumpa sa mga Marcos--silang Imelda, Bongbong ug Imee--nga mosukwahi sa panumpa ni Aquino pagtinuod pagsakmit sa tanan nilang ilegal nga katigayonan.

              Apan gibalikan si Binay sa tarung nga kabuot.  Adto siya manumpa sa panumpaan ni Aquino nga si Associate Justice Conchita Carpio Morales.  Ug iyang gibalibaran ang mga Marcos.

-o0o-

              Laing timaan nga di hingpit nga magpa-upuy-upoy si Binay mao ang iyang pagpangayo sa Department of Interior and Local Governments (DILG).  Nga duna siyay katungod sa iyang gipasigarbo sa dagko niyang nahimo isip mayor sa Makati City.

              Apan may sukaranan ang mga pagduda nga gamiton lang niya ang DILG pagpalambo sa iyang politikanhon nga mga ambisyon sa sunod nga piniliayng presidensiyal sa 2016.  Gawas pa, di siyang kalalis sa katakos, kahaom ug kaligdong sa napilian ni Aquino alang sa DILG nga si Magsaysay Awardee ug Naga City Mayor Jesse Robredo.

              Mao nga alas nga baraha ang gipagawas ni Binay dihang nakigkita siyang Aquino ug nitataw nga di na siya mangayo og bisan unsang buhatan.

-o0o-

              Si Binay di kaaway ni Aquino.  Maisip gani nga mas suod pa siya ngadtong Aquino ug sa iyang igsuong mga babaye kay ni Roxas.  Kinsa nipasangil nga gibukubuko siya sa mga paryente ni Aquino.  Maong di mabasol si Aquino nga magdumili paghatag sa bisan unsay pangayuon ni Binay tungod sa giisip nga dakong utang kabubut-on sa pagpadaplin sa ambisyon ni Roxas nga mag-presidente alang niya.

              May alas pa hinuon si Binay.  Nahibawo sab si Aquino nga di maayong tan-awon nga iya na lang sab nga nuntan ang pagpanluod ni Roxas.  Ug lisod pasabton ang katawhan nganong himuon lang niyang reserba nga ligid ang ilang gipili nga bise presidente.  [30]  leo_lastimosa@abs-cbn.com