Arangkada of Leo Lastimosa for April 17, 2011

Ang bracelet

Si Lorelie Pongcol, 32, mahimo untang mamakak sa iyang pagprenda sa gold bracelet nga nakit-an sa iyang kapuyo nga si Orlando Sambilad.  Apan iyang gitug-anan ang kawani sa pawnshop sa Tupas St., Pasil, Cebu City nga nakit-an to nila uban sa ginamit nga mga sinina gikan sa Cathay Hardware sa Plaridel St., Cebu City.
Martes sa gabii, Abril 5, nanghatag og used clothing ang mga hardware sa Plaridel ngadto sa sidewalk vendors, apil silang Orlando ug Lorelie.  Miyerkules sa buntag, Abril 6, giprenda ni Lorelie ang bracelet.  Nakaplagan sa pawnshop nga 75% nga US gold, 71.8 gramos ug balor og P200,000 ang bracelet ug mahimong iprenda og P100,000.  Apan giprenda lang ni Lorelie og P50,000.

-o0o-

Nakatimaho dayon sa transaksiyon ang sakop sa Theft and Robbery Section (TRS) sa Cebu City Police Office (CCPO).  Labi na kay nakadawat silag alarma nga nawad-an og P1 milyon nga balor sa alahas, apil nang mga bracelet, ang gilungkab nga bay sa Phase 3 sa St. Jude Acres sa Bulacao, Cebu City niadtong Abril 3, Dominggo, tulo ka adlaw sa wa pang prenda.
Gipakuha dayong TRS Chief Bonifacio Garciano ang bracelet.  Apan kinahanglan nang mobayad og P750 sa pawnshop.  Gipatawag dayong Garciano ang tag-iya sa gilungkab nga bay, si Faye Suzette Calumba, 32.  Kinsa mahimo sab untang mamakak ug mangangkon sa bracelet.  Apan nitug-an nga di to iya.

-o0o-

Si Konsehal Tantan Sabalones, chairman sa committee on peace and order sa Pasil Barangay Council, mahimo ra untang magpalingug-lingog dihang gisumbongan sa inahan ni Lorelie nga gitanggong ang iyang anak sa TRS.  Apan gitawgan ni Tantan ang iyang amigo nga si Junrey Nadela sa TV Patrol Central Visayas.
Si Junrey mahimo untang magpabungul-bungol ug mopalabi sa mas dagkong alarma.  Apan iyang natino sa Cathay nga nanghatag gyod sila og mga sinina ug ni Garciano nga gitipigan nilang bracelet.  Siyay unang nakapahibawo sa mga Sugbuanon sa kontrobersiya sa bracelet.

-o0o-

Mahimong may motulisok nilang Orlando ug Lorelie nganong giprenda ang bracelet inay iuli ngadto sa Cathay.  Mahimong may mopahinumdom sab sa mga nangangkon nga naapil ang bracelet sa mga sinina nga ilang gihatag sa tinuorayng kahulogan sa charity--giving until it hurts.  Mahimong may mobuyag sab sa sa nga sa pawnshop nga naneguro pagkolekta sa 1.5% nga interes sa P50,000 bisan wa nila mabayri bisan usa ka dako si Lorelie.  Mahimo sang dudahan si Garciano sa pagtipig sa bracelet hangtod nga gipa-imbestigar siyang Mayor Mike Rama.
Apan kinsa man tang mohukom nila?  Angayng panaminan ang maayong mga binuhatan nilang Lorelie, Tantan ug Junrey ug sa TRS.  Hinaot nga maadtong bracelet sa tinuorayng tag-iya.  O, kon di na man mailhan, sa tinuorayng nagkinahanglan.  [30]  leo_lastimosa@abs-cbn.com

Arangkada of Leo Lastimosa for April 12, 2011

        Kalang-og sa Ombudsman

    Kon may nahibilin pa nga bisan gamay na lang kaligdong ang mga opisyal ug mga kawani sa Ombudsman, hagbay ra unta silang namiya sa katungdanan:

• Kay unsaon man nimo pagpabilin sa buhatan kansang pangu mas gikaintapan sa pagyaka sa mga kasong pagpangawkaw kay sa pagdaog nila atubangan sa Sandiganbayan?;
• Unsaon man nimo pagpadayon pagpangalagad ubos sa pangu nga mas ganahan nga motila ug modupa sa iyang mga padrino ug padrina kay sa pagpalambo sa kampanya batok sa pagpangawkaw?; ug
• Makaangkon ba sila og garbo sa buhatan nga duha ra ka barangay kapitan ang labing taas nga mga opisyal sa gobyerno nga napakonbikto human sa dul-an sa dekada?

-o0o-

    Ambot unsay ilang nakit-an ni Ombudsman Merceditas Gutierrez.  Napugos ba lang pagdawat niya bisan klarong di takos?  Nilingiw ba lang sa pagpamugos ni kanhi presidente Gloria Arroyo pagpahimutang ni Gutierrez sa posisyon aron makapadayon pagpanalipod nila bisan wa na sa Malakanyang?
    Inay magduda, ang mga opisyal ug mga kawani sa Ombudsman mahinangpong nidawata sa mga timaan sa paglikoy ni Gutierrez:

• Nanghatag og makabuhong nga bonus sa pagka absuwelto gikan sa nangaging mga kaso sa impeachment batok niya; ug
• Nanghatag og pasidungog di sa labing malampusong graft investigators kon dili sa mga kawani nga makasul-ob sa labing matahom nga sinina nga Filipiniana sa flag-raising ceremonies matag Lunes.

-o0o-

    Kon wa kahibawo unsay salida ni Gutierrez sa ilang ulohang buhatan, ang taga Visayas Ombudsman gipakita sa daghan niyang paukyab sa Sugbo.  Inay mohatag og makahuloganong mensahe pagdasig sa kampanya batok sa pangurakot, nagsige hinuon og kanta-kanta og "Pilipinas Kong Mahal."
    Sa iyang pagduaw sa Dakbayan sa Lapulapu, si Gutierrez nipirma og kauyonan pag-deputize sa mga magpapatigayon nga nangahas pagbarug batok sa pamunoan ni kanhi mayor Arturo Radaza.  Gipasakaan dayon nila si Radaza og mga kasong pagpangawkaw.  Nga hangtod karon, kongresista na lang si Radaza, padayong giyak-an ni Gutierrez.

-o0o-

    Si Gutierrez way kalainan sa mga kawatan nga iya untang bantayan.  Gitagoan niya gikan sa Malakanyang, Civil Service Commission ug media ang tanan niyang statements of assets, liabilities and net worth (SALN).   Gibasura ni Gutierrez ang lagda sa iyang gipulihang si Simeon Marcelo nga naghatag og gahom sa iyang mga pangabaga pagresolber sa mga kaso.  Gusto ni Gutierrez nga sublion niyang tanan maong nagtumpi pag-ayong mga kaso sa iyang buhatan.
    Gipakaingon sa mga kawani ug mga opisyal sa Ombudsman nga malikayan nilang binuang ni Gutierrez pinaagi sa pagdasig sa mga nagkinihaay paghusay sa ilang panagsungi.  Maong bisan ang mga kawatan gidasig pag-uli sa ilang kinawat ug ang mga gikawatan paghangop nga nauli pang ilang kabtangan.  Sa ilang pagpabilin, bisan ang labing ligdong nga mga kawani ug mga opisyal sa Ombudsman inanay nang natakdan sa kalang-og.  [30]  leo_lastimosa@abs-cbn.com

Arangkada of Leo Lastimosa for April 9, 2011

Buslot sa PTAP

Nangonsulta ang Malakanyang sa sektor sa transportasyon sa wa pa ipahibawo ang Public Transport Assistance Program (PTAP).  Gikonsulta di lang ang transport groups sa kaulohan kon dili hasta na ang taga Kabisay-an ug Mindanao.  Usa sa gidapit pagtambong sa konsultasyon sa kaulohan sa niaging buwan mao si Ryan Benjamin Yu, tsirman sa Citrasco (Cebu Integrated Transport Services Cooperative).
Mao nay maayong balita.  Lahi sa nangaging mga pamunoan nga mo-diretso lang og patuman sa mga programa sa way pagpangutana sa mga hingtungdan, gipaminaw sa Malakanyang ang sektor nga direktang maapektahan sa PTAP sa wa pa sugdi pag-umol ang mga lagda.

Ang daotang balita:  Segun ni Yu way bisan usa sa ilang sugyot ang gipaminaw.

-o0o-

Usa sa labing huyang nga aspeto sa P450 milyones nga PTAP nga nakit-an ni Yu mao ang paggamit og smart cards.  Gitumbok niya ang mosunod nga mga hinungdan:

• Ang dako kaayong gasto paghimo sa smart cards, nga hangtod karon wa pa itug-an sa Malakanyang kon pila, nga maggamit lang sud sa usa o duha ka buwan, mas kapuslan kon idugang sa subsidy nga P1,050 matag PUJ o P35 lang matag adlaw;
• Ang smart cards di maggamit sa kinabag-an sa gasoline stations nga di pa computerized, mahimo ganing di mabasa sa computerized gas stations nga naghupot og lahi nga sistema; ug
• Abtan og siyam-siyam ang Land Transportation Franchising and Regulatory Board (LTFRB) una maapud-apod ang smart cards sa 10,000 ka PUJs sa Sugbo ug kapin sa 200,000 ka PUJs sa ubang bahin sa nasud.

-o0o-

Nagduda sab si Yu kon mahuman bang pagprinta sa smart cards karong buwana aron maapud-apod na, suma sa saad sa Sugbuanong Energy Secretary Jose Rene Almendras, sugod sa Mayo 1.  Matod ni Yu haskang dugaya pang mahuman sa smart cards kon tinud-on nga sukipan sa license plate number ug franchise number sa matag PUJ.
Ang alternatibong sugyot sa transport groups atol sa konsultasyon niadtong Marso, nga gisalikway sa mga tigpasiugda:  Ang paggamit sa certification nga pinirmahan sa regional directors sa LTFRB sa paghatag sa P1 nga usbaw sa plitehan sayo ning tuiga.

-o0o-

Bisan tuod ang LTFRB certification gihatag lang sa PUJs nga may balidong prangkisa, mahimong nakamenos sa ordinaryong piraso sa papel ang mga utok sa PTAP.  Mas bilib sila sa smart cards nga ilang gipasalig nga puno sa security features aron di matikas ni kapahimuslan.
Apan dakong opisyal sa gobyerno, nga tigpaminaw sa Arangkada sa DYAB Abante Pa, Bisaya, nahadlok nga nabutaan rang Malakanyang sa teknolohiya.  Matod niya ang smart cards bisan sa tanang panagang mahimong kawaton, gamiton sa lain ug tilukon.  Kay ang gasoline stations, bisan unsa ka-computerized, mas interesado sa halin kay sa kalamposan sa PTAP.  [30]  leo_lastimosa@abs-cbn.com

Arangkada of Leo Lastimosa for April 8, 2011

                Pagpilot sa ngabil

        Kapin na sa gatos ka pasyente ang nakapalista alang sa libreng operasyon sa mga may kakulian sa ngabil ug lingagngagan nga himuon sa tibuok semana sunod semana.  Ikatulong tuig na ni sa panaghugpong sa Operation Rainbow sa Australia ug sa Kiwanis Club of Cebu aron paghatag og kahigayonan sa mga bata nga makapuyo og normal nga kinabuhi bisan sa ilang kakulian.

        Makaparehistro ka pa hangtod karong Sabado, Abril 9, pinaagi sa pagtawag sa Lapulapu City District Hospital, nga maoy pahigayonan sa tibuok kalihokan, sa ilang mga numero sa telepono nga 3400248 ug 3400249.  Mosunod ang screening sugod sa alas-7 sa buntag hangtod sa alas-5 sa hapon karong Dominggo, Abril 10.

-o0o-

        Ika-20 na ni ka tuig ni Wilma Dunne, presidente sa Operation Rainbow, nga nanabang sa labing kabos nga mga pasyente ug mga tambalanan sa Pilipinas.  Nalukuplukop na niya ang Luzon. Kabisay-an ug Mindanao.  Cebuana nga tua na manimuyo sa Australia ug boluntaryo sab sa Operation Rainbow ang nagda niya dinhi sa ato.

        Nalipay pag-ayo si Dunne sa kadaghan sa ilang mga pasyente sa niaging tuig, kanus-a nakigtambayayong ang Kiwanis Club sa DYAB Abante Pa, Bisaya! ug ABS-CBN Cebu sa pagpahibawo sa mas daghang katawhan labot sa talagsaong pangalagad.  Nanghinaot ang mga tigpasiugda nga mas daghan pa gyong mga pasyente ang ma-operahan karong tuiga.

-o0o-

        Mahimong ma-operahan ang mga pasyente nga nagpangedaron og tulo ka buwan pataas.  Matod sa boluntaryong mga doktor gikan sa Australia mas bata ang pasyente mas maayo, labi na kon wa pa silang kasugod og sulti.  Mas lisod nang mahibalik ang normal nga sinultihan kon dako nang pasyente.

        Bisan mopasar sa screening, wa hinuoy garantiya nga ma-operahan ang tanang pasyente.  Kinahanglan nga wa silay hilanat ug ubang sakit sa adlaw mismo sa operasyon.  Kon daghan gyod kaayo ang operahanan, mahimo nga magsugod na ang mga doktor pag-opera sa Dominggo sa hapon aron mas daghan pa gyod ang maatiman sa di pa siya mamiya sunod semana.

-o0o-

        Unahon pag-opera ang mga pasyente gikan sa kalungsoran gawas sa Metro Cebu ug ubang mga lalawigan.  Kinsa hatagan sa Kiwanis og libreng katulganan ug mga pagkaon samtang magpaabot nga maatiman.  Si Steve Hahn, kanhi presidente sa Kiwanis, niingon nga nakahuwam sila og mga higdaanan aron mas mapahimutang ang mga pasyente.

        Sa niaging tuig, may mga kompaniya sa barko ug ayroplano nga nitanyag og libreng plite alang sa kabos nga mga pasahero gikan sa kasilinganang mga lalawigan.  Kon gusto kang motampo paghimong mas sayon sa operasyon sa mga pasyente, sama sa paghatag og kalingawan sa mga batang pasyente, makahimo ka pakiglambigit sa imong higalang Kiwanian o pagtawag namo sa DYAB sa 4221950 ug 4221953, o i-email mi sa dyab1512@gmail.com.  [30]  leo_lastimosa@abs-cbn.com

Arangkada of Leo Lastimosa for April 6, 2011

Buslot sa subsidy

Dunay 216,988 ka jeepneys nga namasahero sa kadalanan sa Sugbo ug ubang bahin sa Pilipinas.  Mao ni ihap sa Department of Transportation and Communications (DOTC) ug Japan International Cooperation Agency (Jica) niadtong 2007.  Labing seguro niburot na ni sa niaging upat ka tuig.  Apan wa koy mas bag-ong ihap nga nakuha.

Busa mao lang una ni ang atong gamiton pagtino pilay madawat sa matag PUJ operator gikan sa P450 milyones nga gigahin sa Malakanyang nga subsidy.  Ang Public Transport Assistance Program (PTAP), o Pantawid Pasada, mahimong ihatag sa tricycles kon moangkon og counterpart ang local government units.  Gipapas na sa listahan sa makadawat ang mga mangingisda ug mga mag-uuma.

-o0o-

Kon ihurot og hatag ngadto sa PUJs, makadawat ang matag unit og P2,073.85 sa usa ka buwan, o P69.13 matag adlaw.  Mas gamay hinuon ang nahaunang sugyot sa Department of Energy (DOE) nga maoy nisugyot sa subsidy, tag-P500 ra sa matag PUJ, o P16.67 matag adlaw.  O, segun sa kuwentada sa DOE, P3 matag litro sa krudo nga ilang makonsumo.
Sa akong pagsuwat ini, bisan napirmahan nang Presidente Noynoy Aquino ang Executive Order No. 32, wa pay natakdang kantidad.  Umulon pang implementing rules and regulations (IRR) sa  DOE, Department of Budget and Management (DBM), Department of Interior and Local Governments (DILG), Department of Finance (DOF) ug DOTC.

-o0o-

Komplikado hinuon ang sistema sa pagpatuman sa subsidy.  Maong nipasidaan ang DOE nga mahimong unya pa ni sa sunod buwan mapahimuslan.  Nagkinahanglan sila og upat ka semana una maprinta sa mapilian nga mga bangko ang "smart cards" nga maoy basehan sa diskuwento nga P3 matag litro.  Ambot asa ituslok ang smart cards, sa gasoline stations ba sa ATM o sa bag-ong lungag nga ilang mahunahunaan, aron pagtino nga di magamit sa laing butang.
Laing posibleng suliran:  PUJ operators ang hatagan sa subsidy; unsa may garantiya nga ila ning itunol sa PUJ drivers nga maoy magpatubil og krudo matag adlaw?

-o0o-

Matod sa Malakanyang di iapil sa subsidy ang buses.  Kay bag-o lang napatuman ang uminto sa ilang plitehan.  Apan wa ba diay sila mahunghongi sa Land Transportation Franchising and Regulatory Board (LTFRB) nga napasaka na sab ang minimum nga plitehan sa PUJs?  P1 ang uminto.  Dinhi sa Sugbo, inay P6.50 (nga P7 ang aktuwal nga gikolekta sa PUJ drivers) nahimo na karong P7.50 (nga, nakatag-an ka, P8 na sab ang aktuwal nga gikolekta).

Ug mao ni akong nakita nga labing dakong buslot ning subsidy nga giaprobahan sa Malakanyang.  Mora lang sila og nag-drowing sa papel, kinuha ang mga numero sa tumoy sa ilang buhok.  Way bisan usang nagtagad pagsusi sa tinuod nga kahimtang sa kadalanan.  [30]  leo_lastimosa@abs-cbn.com

Arangkada of Leo Lastimosa for April 4, 2011

Tahas sa DOE

Pipila ka nagpakabana nga mga motorista nakabantay nga, human sa sunudsunod nga pagsaka sa presyo sa lana sukad sa pagsugod ning tuiga, nagkadako ang kang-a sa presyo sa nagkalainlaing gasoline stations dinhi sa Metro Cebu.  Nga kon magkugi lang ang mga drayber pagsusi ug pagtandi sa mga presyo, inay magpiyong lang pagpatubil sa ilang mga suki, mahimong makadaginot sila og gikan sa P5 hangtod sa P9 matag litro.
Ang mga nakabasa ini nga dunay mga sakyanan, pribado man o pamasahero, mapugwat tingali sa kadako sa kalainan ug magharab-harab dayon paglibot sa nagkalainlaing gasoline stations.  Kon usa ka nila, pagbantay.  Tingali og mas dako ang imong maggasto pagtultol kay sa madaginot sa labing baratong presyo.

-o0o-

Usa sa nagpakabanang motorista, taguon lang nato sa ngang Jay Jakosalem, nisugyot nga among isibya ang managlahi nga mga presyo aron magiyahan ang mga tigpaminaw.  Ako siyang gipahibawo sa mga limitasyon:

• Di mi maka-uran-uran og sibya sa ngan sa mga kompaniya ug produkto nga di paninglan og kontrata sa among Sales Department kon dayegon, o mag-atubang og posibleng kaso kon sawayon;
• Aron makiangayong matandi ang presyo, kinahanglang suruyon ug isibya ang presyo sa tanang gasoline stations sa Metro Cebu, pero wa mi reporters ni airtime para ana; ug
• Mahimong biyaan mi sa kinabag-an sa mga tigpaminaw nga way sakyanan ug mahimong di interesado.

-o0o-

Apan ang sugyot nilang Jay ug kaubanan di angayng palabyon.  Ang pagpahibawo sa katawhan sa dakong kalainan sa presyo sa nagkalainlaing gasoline stations, gawas nga makatabang tinuod sa mga motorista, makapugos pa gyod sa mga kompaniya sa lana pagdani og dugang mga kustomer pinaagi sa pagpuhalay sa ilang presyo.
Nga mao ang usa sa labing mahinungdanong tumong sa Oil Deregulation Law.  Nga maoy kanunayng mapasok sa suok kon magkonsabo nang mga kompaniya sa lana pagdungan pagpahibawo sa mga usbaw, nga managsama hangtod sa kataposang usa ka dako.  Apan wa mahibaw-i sa kadaghanan nga duna diay gasoline stations nga, tungod tingali kay nagsikit ra, nagpalabwanay og laslas sa ilang presyo.

-o0o-

Anhi mosud, managhas ko pagsugyot, ang Department of Energy (DOE).  Di lang tungod kay Sugbuanon ang kalihim, si Jose Rene Almendras, ug ang chief of staff, si Atty. Ina Almendras Magpale, kon dili tungod kay ila ning trabaho.
Nganong di man suguon nilang Almendras ug Magpale ang tanang regional directors sa DOE pagsumiter sa presyo sa tanang gasoline stations matag adlaw?  O, kon apiki sa mga kawani, matag semana?  Gawas nga mapamatud-an nga nag-inspeksiyon gyod diay sila sa gasoline stations, masusi pa sa DOE tinuoray bang kumpetinsiya sa mga kompaniya sa lana.  Ang mga sakop na sa media ang mahibawo unsaon pagsibya ang kasayuran nga madani, di magduka, ang mga tigpaminaw.  [30]  leo_lastimosa@abs-cbn.com

Arangkada of Leo Lastimosa for April 3, 2011

Sakit ni Sanchez

Ambot kon si Bise Gobernador Greg Sanchez bay nagsugo sa iyang mga suod sa paghatag og managlahi nga kasayuran mahitungod sa kahimtang sa iyang panglawas.  Usa nila niingon nga may sakit lang siya sa tutonlan maong maglisod pagsulti.  Lain nipahibawo nga may pneumonia siya.  Gidasonan sa lain pa nga may tubig ang iyang baga.  Apan pulos nila gipanghimakak ang mga huhungihong nga himatyon na siya ug gitagalan og pila na ka lang ka buwan ang iyang kinabuhi.
Bisan unsa pay kahimtang sa panglawas ni Sanchez, kadako kaha sa iyang kahimangod nga di siya makapangunay pagpasabot sa mga Sugbuanon.  Siya untay labing takos nga mopatin-aw nganong wa na siya pakita sa publiko sa niaging kapin na sa duha ka buwan.

-o0o-

Isip politiko, sukad niadtong board member pa hangtod nga napiling ikaduhang labing taas nga opisyal sa lalawigan sa Sugbo, way suliran ang mga sakop sa media sa pakighinabi ni Sanchez.  Si Sanchez pa man gani ang nireklamo nga wa na siya hatagi og samang pagtagad sa media human sila nagkasungi si Gobernador Gwen Garcia.
Way lipudlipod si Sanchez nga nanubag sa daghang kontrobersiya nga naglambigit sa mga kawani ug mga sakyanan sa iyang buhatan, sa iyang pribadong mga negosyo, ug bisan sa pagkagumon sa iyang anak nga lalaki sa ilegal nga drugas.  Maong dako kaayong haw-ang ang namugna ning iyang kahilom.

-o0o-

Wa katabang pag-iban sa kalibog sa katawhan ang pagka magsisibya ni Sanchez.  Siya gyod gani ang nanag-iya di lang sa usa usa kon dili sa upat gyod ka sibyaanan sa radyo.  Ang pagpalta sa inadlaw niyang tulomanon sa radyo, labaw sa wa na pagduma sa sinemanang sesyon sa provincial board, maoy nakapadangilag sa kabalaka nga di kasarangan ang iyang sakit.
Bisan kinsang magsisibya mosulti nimo nga ang sakit sa tutonlan di makapugong niya pagtingog sa radyo.  Ubo man o pagaw lang ang hinungdan, naanad nang mga tigpaminaw nga matag karon ug unya mausab ang tingog nga ilang madunggan.  Silay labing daghan og pangutana kon may tingog nga di na madunggan sa kahanginan.

-o0o-

Mas maayo kay sa pagpakahilom ug sa pagpangilaba nga tugotan siyang makapahuway ug mas maayong ipangaliya ang iyang kahimtang ang gihimo ni Kongresista Tomas Osmeña.  Sa labing sayo nga kahigayonan, siyay nangunay pagpahibawo sa mga Sugbuanon nga duna siyay kanser sa urinary bladder.  Wa itago ang iyang pagpatambal sa Estados Unidos, gipasundayag sa tanang gustong motan-aw ang iyang pagpaupaw, ang iyang kaluya, ang di na normal niyang pagpangihi ug ang pagkahibalik sa kabaskog sa iyang panglawas.
Kon makabasa si Sanchez ini, kinasingkasing kong mohangyo niya sa pagtug-an sa kamatuoran ngadto sa mga Sugbuanon.  Di krimen ni timaan sa kahuyang ang pagkasakit.  Maiya ang hingpit nilang pagsabot ug pangaliya.  [30]  leo_lastimosa@abs-cbn.com

Arangkada of Leo Lastimosa for March 15, 2011

Salamat sa amihan

Amihan.  Hanging amihan.  Maoy labing lig-on nga panalipod sa Pilipinas gikan sa radiation.  Kon simbako, layo ra to, tabukon og pito ka lawod, moulbo gyod ang naapiki nga mga plantang nukleyar sa Fukushima Prefecture sa Japan.  Matod sa Philippine Nuclear Research Institute (PNRI) ang amihan maoy mopalayo ug motino nga di makaabot sa atong nataran ang bisan unsang makahilo nga hangin gikan sa Japan.
Matod ni PNRI Director Alumanda dela Rosa ang labing dakong alas sa Pilipinas mao nga ang hanging amihan magpabiling modominar sa atong kahimtang sa panahon hangtod unya sa Mayo 15 ning tuiga.  Gipaabot nga ang krisis sa mga plantang nukleyar sa Japan hingpit nang masulbad sa mosunod nga mga adlaw.

-o0o-

Mao nga palihug papasa ug ayaw ipada sa imong mga higala ang iresponsableng text messages nga nagpasidaan nga niabot na sa Pilipinas ang radiation ug acid rain gikan sa Japan.  Tinuod nga duha na ka plantang nukleyar sa Fukushima ang niulbo.  Apan ang International Atomic Energy Agency (IAEA) nipasalig nga ubos kaayo ang radiation level sa palibot sa mga planta, nga sama ra sa x-ray exposure.
Sa pikas nga bahin, nipasidaan hinuon ang Pentagon nga mahimong mas dako ang suliran kay sa giangkon sa Japan.  Ang ilang helicopters nga naglupad dul-an sa 100 ka kilometro gikan sa mga planteng nukleyar nakakuha og radioactive particulates — nga gisusi pa sa laboratoryo, apan gituohan nga naglakip sa cesium-137 ug iodine-121 — pasabot nga nagkalapad ang kahugaw sa palibot.

-o0o-

200,000 na ka molupyo sa 20 ka kilometro nga radius sa mga plantang nukleyar, apil nang pipila ka Pilipinhon, ang gipabakwet.  Gipanghatagan sila og iodine aron pagpanalipod sa ilang thyroid glands nga maoy unang atakehon sa radiation, ug mahimong mosangpot sa thyroid cancer.
Nangandam na sab ang atong Department of Health (DOH) og prophylactic potassium iodide aron pag-alkontra sa posibleng pagsuyop sa radioactive iodine.  Matod ni Agnette Peralta, DOH medical physicist, nga ang radiation nga motapot sa lawas matangtang pinaagi sa pagkaligo.

-o0o-

Gikahadlokan nga ang krisis sa mga plantang nukleyar sa Japan mahimong molungtad og usa ka tuig o mas dugay pa.  Ang gihimo karon sa mga tagduma mao ang pagpabaha og dagat sa nagbaga nga reactors.  Nga mopabukal sa dagat ug makapataas pag-ayo sa pressure, nga kinahanglang pahungawon ang gamayng radiation aron kabombahan og dugang dagat.

Dugay pa hinuon nga makabalik sa ilang mga pinuy-anan ang gipabakwet nga mga molupyo tungod sa anam-anam nga pagpahungaw sa radioactive materials.  Nga peligrong makahulga sa mas daghan pang mga molupyo kon mausab ang direksiyon sa hangin.  Nga inay mohuyop sa radiation ngadto sa Pacific Ocean moabog na hinuon ini ngadto sa mas dagkong mga dakbayan sa Japan.  [30]  leo_lastimosa@abs-cbn.com

Arangkada of Leo Lastimosa for March 14, 2011

Hulgang nukleyar

Bisan sa kalayo ra sa Pilipinas gikan sa duha ka naapiking reactors sa Fukushima Daiichi Nuclear Power Station, gitun-an na sa mga eksperto ang posibleng kadaot nga atong mahiagoman kon, simbako layo ra to, tabukon og pito ka lawod, moabot dinhi ang hinungaw sa radiation tungod sa kakusog sa bawod.
May sukaranan ang pangandam nilang Presidente Noynoy Aquino ug sa kadagkoan sa National Security Council (NSC), Philippine Nuclear Research Institute ug Philippine Atmospheric Geophysical and Astronomical Services Administration (Pagasa).  Sa akong pagsuwat ini, niangkon na ang kadagkoan sa Japan sa kahigayonan sa meltdown sa duha nila ka plantang nukleyar.

-o0o-

Ang duha ka 40 anyos na nga plantang nukleyar sa Fukushima Daiichi gitukod aron makasugakod sa 7.9 magnitude nga linog.  Samtang nakalahutay unta sa 9.0 magnitude nga linog niadtong Biyernes, nga nisangpot sa automatic shutdown sa mga planta, way nakapangandam sa nisunod nga tsunami nga nakaguba sa duha ka sapaw sa pangandam pagpabugnaw sa planta nga, sama sa ordinaryong oven, magpabiling magbaga bisan napawong na:

• Nawagtang ang suplay sa kuryente tungod sa pagkaputol sa mga alambre human bahai ang planta; ug
• Naapil og kagguba ang diesel generators nga mao untay alternatibong mopabugnaw sa mga planta kon wa nay kuryente.

-o0o-

Ang kataposang linya sa depensa batok sa pag-ulbo sa mga plantang nukleyar mao ang mga baterya nga nilungtad lang og walo ka oras.  Maong napugos nang mga tagduma sa planta pagpasud sa dagat, nga desperadong lakang kay di na man kapuslan ang mga planta karong nabasa na sa dagat.
Ang pasiunang pag-ulbo sa usa sa mga planta niadtong Sabado, bisan giingon sa mga tagduma nga nakaapektar lang sa outer building ug wa sa reactors, nagmatuod sa kaseryuso sa suliran.  Pun-an pa nga sa silingang Daini Nuclear Plant, dunay laing tulo ka reactors nga nawad-an sa ilang cooling systems.  Sa kinatibuk-an, ang Japan dunay 17 ka plantang nukleyar nga naglakip sa 55 ka reactors ug maoy nagsuplay sa 30% sa ilang panginahanglan sa kuryente.

-o0o-

Gibasol karon sa mga eksperto sa Estados Unidos Ug Francia ang kalangay sa Japan paghimo sa labing tukma ug dinalian nga mga lakang pagpugong sa meltdown:

• Gibalibaran nilang hinabang nga coolants nga gitanyag ni US President Barack Obama pila ka takna human nabutyag ang krisis, aron lang dawaton dihang naapiki na;
• Nagdumili sila pagpahungaw og gamayng bahin sa radiation, tungod sa kahadlok nga tulisukon sa mga Hapones nga kusganong nisupak sa mga plantang nukleyar human sa pagpamomba sa Hiroshima ug Nagasaki niadtong 1945, nga makalikay unta sa nag-ung-ong nga mas dakong katalagman (napugos ra gihapon sila pagpahungaw sa planta nga nisangpot sa dakong kadaot sa mga kawani sa planta ug sa 160 ka mga molupyo sa Fukushima nga wa dayon makabakwet).  [30]  leo_lastimosa@abs-cbn.com

Arangkada of Leo Lastimosa for March 13, 2011

Unsay tsunami?
Puslan mang wa tay mahimo pagtag-an ug pagpugong sa linog ug tsunami, ato na lang sabton.  Usa sa labing suhito mao si Greg Valentine, geology professor sa University at Buffalo, The State University of New York Center for Geohazards Studies.  Nahinabi siya sa Scientific American:
Giunsa sa linog sa Japan pagmugna ang tsunami?
Ang tsunami namugna sa linog diin ang sawog ang Pacific Ocean nitibugsok sa ilawom sa kadagatan sa Japan.  50 ngadto sa 100 ka kilometro nga bantok nga yuta sa Pacific niirog paingon sa yuta sa ilawom sa kadagatan sa Japan nga di sama kabantok, ug mas gaan.  Sa ilang panag-abot, kusganon silang magbag-iray.  Namugna ang kusganong puwersa sa dagat.  Dihang nag-ukang sila, ang yuta sa Pacific kalit nga nihagsa ug ang yuta sa Asya nga kabahin ang Japan nisulbong.  Nabugwak ang daghang tubig, ug maoy hinungdan sa tsunami.
Unsay kalainan sa tsunami sa kasarangang mga bawod?
Ang tsunami paspas kaayo.  Ang kasarangang bawod gipalihok sa hangin, maong managsama rang ilang gikusgon.  Ang gikusgon sa tsunami mag-agad sa giladmon.  Sa bukas nga kadagatan nga may giladmon nga lima ka kilometro, ang tsunami moabot og 800 ka kiometro matag oras.  Ang sa tsunami sa dagat nga may giladmon nga tunga sa kilometro moabot og 260 ka kilometro matag oras.
Unsaon pagkausab sa tsunami inig abot sa kabaybayonan?
Makadaot kaayong tsunami kay, samtang magkaduol sa baybayon, mohinay kini, mao nga ang tubig sa atubangan sa bawod mas hinay kay sa tubig luyo sa bawod.  Magsapaway ug magpatungpatong ang tubig.  Moabot hangtod sa 20 ka metro ang gitas-on sa bawod ug magpabilin nga ingon ana sa dugayng higayon.  Maong mabahaan ang mga luna, bisan layo na sa dagat, nga ubos sa gitas-on sa tsunami.
Matag-an bang gitas-on sa tsunami sa di pa moabot sa baybayon?
Matag-an ang agianan ug gikusgon sa tsunami, apan lisod itakda ang gitas-on.  Mag-agad ni sa gikusgon ug gidaghanon sa bawod ug sa porma sa sawog sa dagat--unsa kakalit nga momabaw.
Kuyaw bang ang aftershocks sa linog sa Japan makamugna og dugang tsunami?
Kuyaw.  Ang pagkausab sa bahin sa sawog sa Pacific Ocean ug kadagatan sa Japan makaapektar sa kaliboan ka kilometro sa Pacific plate nga nagpaingon sa ubos sa Asian plate.  Apan kon duna may laing tsunami di na sama kabangis.
Unsa kakusog ang aftershock aron makamugna og tsunami?
Ang magnitude 6 o mas kusog pa makamugna og tsunami, apan mag-agad sa matang sa linog.  Kon ang duha ka tipaka sa yuta modailos lang sa usag-usa, sama sa San Andreas Fault sa California, gamay rang tsunami.  Ang hinungdan sa dakong tsunami sa Japan mao nga bangis kaayong binag-iray sa yuta nga nakapalihok sa dakong bahin sa dagat.  [30]  leo_lastimosa@abs-cbn.com

Arangkada of Leo Lastimosa for March 11, 2011

                Paglawog sa OFWs

        Maayo tingaling laslasan og diyutay sa kadagkoan sa gobyerno ang pagarpar sa ilang kaandam pag-atiman sa OFWs nga namakwet, ug busa nawad-an og trabaho, tungod sa kagubot sa Libya.  Ang ilang gipagawal nga P10,000 nga financial assistance, lokal nga mga trabaho ug ginagmay nga patigayon mahimong makapagaan sa palas-unon apan di garantiya nga ang OFWs makapadayon pagpatungha sa ilang mga anak, makapatambal sa ilang mga masakiton ug makahatag sa ilang pamilya og sanag nga ugma.

        Mas maayo pang angkunon sa gobyerno nga duna tay dakong krisis sa panrabaho.  Nga maoy hinungdan nga ilang gidasig, inay gibadlong, ang minilyon ka OFWs pagbiya sa ilang yutang natawhan ug pagpanimpad sa langyawng kabaybayonan.

-o0o-

        Panghambog ra gyoy puhonan sa Overseas Workers Welfare Administration (OWWA), Philippine Overseas Employment Administration (POEA), Department of Labor and Employment (Dole) ug Department of Foreign Affairs (DFA).  Haskang dugaya nilang nakatabang sa naapiki nga OFWs sa Libya.  Nangilog pa gyod og kredito sa langyawng employers nga maoy naghago ug niggasto sa pagpabakwet sa OFWs ug ubang langyawng mga mamumuo.

        Ug wa silay laraw alang sa OFWs sa Saudi Arabia ug ubang nagkaguliyang nga mga nasud sa Middle East ug North Africa.  Kutob ra sila sa panghinaot nga di manakod ang gubat sa Libya.  Sama rang nangandoy nga mohunong ang katawhan pag-alsa batok sa kurakot ug madaugdaugon nilang pamunoan.

-o0o-

        Ang lapad nga pakigbisog alang sa kagawasan ug demokrasya sa mga nasud nga giduma og mga diktadura sud na sa daghang mga dekada di nang kapugngan.  Sama sa katawhang Pilipinhon nga nilingkawas sa diktadurang Ferdinand Marcos human sa kapin sa duha ka dekada, di na sila maggapos ni mapahilom.

        Giusikan sa atong kagamhanan ang tanang kahigayonan pagputol sa di makiangayon nga pagsangyaw ug pagtumod sa atong baratong kusog pamuo bisan ngadto sa labing kuyaw nga mga nasud.  Ang nisilaob nga krisis sa Libya ug kasilinganang mga nasud hinaot nga makapugos na nila pagmugna og mas disenteng kahigayonan sa trabaho dinhi sa atong kaugalingong nataran.

-o0o-

        Di makiangayon alang ni Presidente Noynoy Aquino nga siyay nakasapupo sa nangalisbo nga kabilin sa mga pamunoan nga iyang gisundan.  Apan usa nila mao ang iyang inahan busa di siya angayng magbagulbol.  Hinunoa, angayng dawaton ang makasaysayanong hagit pagbutang og kinutoban sa taas nang kasaysayan sa kaulipnan sa atong mga anak sa singot.

        Gisagop ni Aquino ang kinaham nga pagarpar sa mga nag-una niya ang pagmugna og minilyon ka bag-ong kahigayonan sa trabaho.  Hinaot nga iyang apilon ang pagpaningkamot nga makiangayon ang mahatag nga suholan ug benepisyo aron nga wa nay mangahas pagtalikod sa ilang mga anak ug pagsugal sa ilang kaluwas sa mga langyaw nga way pagtahud sa kaligdong sa ilang pakigbisog sa mas maayong kaugmaon.  [30]  leo_lastimosa@abs-cbn.com

Arangkada of Leo Lastimosa for March 9, 2011

                Lihay si Noynoy

        Ang reklamo ni kanhi kongresista Jose "Peping" Cojuangco nga bisan silang mga paryente maglisod pagpakigkita ni Presidente Noynoy Aquino nidason sa daghang kasayuran sa determinadong mga paningkamot sa bag-ong tagduma sa Malakanyang paglikay nga masuyop sa naandang influencia sa gamhanang mga pundok.  Si Cojuangco wa mag-inusara.  Daghang sama niya nga nagtuong sikit sa gahom apan naglisod pagduol ni Aquino.

        Maong sama ni Cojuangco napugos sila pagpadayag sa ilang kahimangod pinaagi sa media.  Nituyo gani pagsukwahi sa pipila ka baruganan sa palasyo.  Apan sa kaso ni Cojuangco ang nakigtagbo niya mao ang mga representante sa Presidential Management Staff (PMS) di si Aquino.

-o0o-

        Mapahimuslanong mga pundok sa Sugbo nagsugod na pagbaiid ni Aquino dihang nagkabantang na nga di kadaog ang ila untang gilaoman nga makapanalipod sa ilang mga interes--silang kanhi defense secretary Gibo Teodoro ug Senador Manny Villar.  Nagsugod dayon pagsusi kinsay mga suod ni Aquino sa Sugbo nga ilang mapangulitawhan.

        Apil sa una nilang natultolan mao ang Sugbuanong mga paryente ni Shalani Soledad, ang hinigugma ni Aquino nga aktibong nangampanya alang sa iyang kandidatura dinhi sa Sugbo.  Apan dihang naklaro nga di siya mahimong taytayan sa Malakanyang, labi na dihang nabisto nga nagkabuwag na silang Aquino, ang mga nakabubo na unta og dakong puhonan ni Shalani napugos sa pagpangita og laing kadangpan.

-o0o-

        Tungod sa pagtambong ni Aquino sa paglusad sa kandidatura ni kanhi Cebu City Councilor Junjun Davide pagka gobernador sa Sugbo, mas daghan ang nanambong kay sa gipaabot.  Maong napugos ang mga tigpasiugda sa pag-amut-amot aron pagtapak sa dakong kuwang sa ilang bayranan.

        Ang kakuwang sa kuwarta nabatyagan sa mga boluntaryo alang ni Aquino sa inadlawng panginahanglan sa ilang headquarters sa Dakbayan sa Sugbo.  Maong gihangop nila ang P20 milyones nga tanyag sa ka dakong negosyante sa Sugbo.  Ubos sa kundisyon nga magbutang sila og laing headquarters sa luna sa negosyante.  Apan ang negosyante nangampanya batok sa pipila ka lokal nga mga kandidato sa Liberal Party mao nga napugos sila pagbalibad.

-o0o-

        Karong presidente na si Aquino, ang iyang mga boluntaryo magkapuliki og balibad sa mga negosyante nga motanyag pagpahuwam sa ilang mga sakyanan matag duaw ni Aquino sa Sugbo.  Sa unang pagduaw ni Aquino dinhi uban sa iyang economic managers, haskang daghanang mga negosyante ang nabawo nga wa kapusli ang nag-atang nilang luho nga mga sakyanan dihang nagsinardinas ang delegasyon ni Aquino sa usa ka coaster.

        Mas daghang sakyanan ang nag-atang nang daan sa pagduaw ni Aquino atol sa Sinulog Grand Parade.  Apan nabawo na sang tanan dihang nikabayo si Aquino sa pickup sa Department of Environment and Natural Resources (DENR).

Hinaot nga di lang libreng mga sakyanan sa hakog nga mga interes ang malikayan ni Aquino.  [30]  leo_lastimosa@abs-cbn.com

Arangkada of Leo Lastimosa for March 8, 2011

                Kalangay sa DepEd

        Gawas sa pasangil nga nanikas sa National Achievement Test (NAT) aron modako ang rating sa iyang tulonghaan ug moburot ang kahigayonan sa iyang promosyon, si Jessica Abayon, prinsipal sa Ramon Duterte Memorial National High School (RDMNHS), gitumbok sab nga nag-abuso sa iyang katungdanan ug nanghasi sa mga magtutudlo nga nangahas pagbisto sa iyang binuhatan.

        Mao ni hinungdan nga gisuspenso si Abayon ni Direktor Recaredo Borgonia sa Departamento sa Edukasyon (DepEd) sa Central Visayas.  Di hinuon silot ang 90 ka adlaw nga suspenso.  Gitumong ni aron di maggamit ni Abayon ang iyang buhatan pagguba sa mga ebidensiya ug paghasi sa mga saksi.  Gipanghinaot nga moggawas gyong kamatuoran sa imbestigasyon sa mga pasangil batok niya.

-o0o-

        Ang imbestigasyon nga gipasiugdahan ni Cebu City Asst. Schools Division Superintendent Salustiano T. Jimenez, pangu sa Division Investigation Committee, ug giaprobahan ni Dr. Rhea Mar A. Angtud, Cebu City Schools Division Superintendent, nakakita sab og igong sukaranan sa mosunod nga mga pasangil batok ni Abayon:

1. Pagpamalit og digital camera ug laptop alang sa personal nga katuyoan ug pagtipig sa kahimanan inay itugyan sa property custodian;
2. Paglapas sa Civil Service Laws pinaagi sa pagdumili pagrehistro sa iyang attendance sa Biometrics sa tulonghaan; ug
3. Paglapas sa pagdili sa DepEd sa "No Permit, No Exam Policy" dihang iyang gipagawas sa classrooms ang mga tinun-an nga wa kabayad sa mga amotan nga gipahamtang sa PTCA (Parents Teachers Community Association).

-o0o-

        Nakaplagan sab sa imbestigasyon sa Cebu City Division, nga gidasonan sa buhatang rehiyonal sa DepEd, nga gipanimaslan ni Abayon ang mga magtutudlo nga nangisog pagpasangil niya sa pagpanikas sa NAT ug ubang kahiwian.  Human nipasaka og pormal nga kaso batok ni Abayon, nikalit lang pagtibugsok ang rating sa mosunod nga nagpakabana nga mga magtutudlo:

1. Adelfa Salvador;
2. Nina Mae Arrogante; ug
3. Nimfadora Ungab.

        Silang tulo gikataho nga gipasidan-an sab ni Abayon nga isumbalik pagkiha kon modayon gyod pagpasaka og pormal nga kaso batok niya.

-o0o-

        Ang NAT sa RDMNHS nga maoy sentro sa kontrobersiya napahigayon niadto pang Marso 11, 2010, o tangkod nang usa ka tuig karong semanaha.  Nga karon pa makasohi ug masuspenso si Abayon, nagmatuod sa kaluya sa DepEd pagsusi sa mga pasangil batok sa iyang kadagkoan, nga nakahatag ni Abayon og tibuok tuig sa paglisudlisod sa mga magtutudlo nga nibarug batok niya.

        Tungod sa kahadlok nga maniobrahon na sang NAT karong tuiga kon di lang gihapon masilotan si Abayon, ang nangreklamong mga magtutudlo nidangop sa Arangkada sa DYAB Abante Pa, Bisaya! sa niaging buwan.  Dihang among gipakisayran, si Jimenez nipahibawo nga nahuman nang imbestigasyon ug naluwatan nang iyang mga rekomendasyon niadtong Disyembre.  Naabtan si Borgonia og duha ka buwan pagpatigbabaw sa rekomendasyon.  Hinaot nga di na siyam-siyaman ang pormal nga husay.  [30]  leo_lastimosa@abs-cbn.com

Arangkada of Leo Lastimosa for March 7, 2011

               Tikas sa NAT

        Sunudsunod nga ipahigayon ang Regional Echievement Test (RAT) ug National Achievement Test (NAT) sa mga tinun-an sa mga eskuylahang publiko ug pribado dinhi sa Sugbo ug ubang bahin sa nasud karong buwana.  Ang tinuig nga mga pasulit sa tanang mga tinun-an sa elementarya ug high school dayong tapos sa tuig tingtungha gigamit sa Departamento sa Edukasyon (DepEd) isip sukaranan sa pagtuon ug pagpalambo sa kalidad sa edukasyon ug pagranggo sa mga eskuylahan.

Ang mas taas nga ranggo nga makuha sa mga eskuylahan human sa RAT ug NAT makatabang sa mga magtutudlo nga nangandoy og promosyon.  Mao nga dako kaayo ang tentasyon alang sa mga labing ambisyuso nila pagmaniobra sa pasulit.

-o0o-

        Pila ka adlaw sa wa pa ang NAT sa niaging tuig, ang mga magtutudlo sa Ramon Duterte Memorial National High School (RDMNHS) sa Dakbayan sa Sugbo gipatawag sa ilang prinsipal sa usa ka tigom.  Usa sa mga nakatambong sa tigom niingon nga labihan nilang kurata dihang giingnan nga:

1. Mangandam paghatag sa labing tukma nga tubag sa mga pangutana sa NAT sa ilang tagsa-tagsa ka subjects;
2. Hatagan sila sa NAT questionnaires inig abot gyod sa mga kopya sa principal's office sa sayong buntag ug ang codes sa ilang mga tubag i-apud-apod dayon sa tanang mga tinun-an nga niapil sa pasulit; ug
3. Di sila angayng mahadlok kay ang ilang gihimo dunay pagtugot gikan sa kadagkoan sa DepEd.

-o0o-

        Tuod man, morang piyesta ang NAT sa RDMNHS niadtong Marso 11, 2010:  Ang subject teachers nag-iyahay pagpanubag sa questionnaires nga mao pa lang gyoy pag-abot, laing pundok sa mga magtutudlo ang nangopya sa codes sa mga tubag ug niapud-apod dayon sa mga kopya ngadto sa mga tinun-an ug lain pa gyong pundok sa mga magtutudlo ang gidestino sa kusina, nangluto sa labing lamiang putahe alang sa mga bata.

        Ang resulta?  Nisaka ang RDMNHS regular classes gikan sa No. 39 ngadto sa Top 15 ug ang Night Classes, nga gigiyahan mismo sa prinsipal, nilayat gikan sa No. 33 ngadto sa Top 3 sa tibuok Cebu City Division.

-o0o-

        Ang magtutudlo nga nakatambong sa tigom nga gipatawag sa prinsipal, uban sa laing duha ka magtutudlo, nangisog pagbutyag sa kahiwian nga ilang gipasangil batok ni Jessica Abayon.  Apan human nakapasaka og reklamo sa DepEd, naapiki silang Adelfa Salvador, Nina Mae Arrogante ug Nimfadora Ungab.  Nidangop sila sa Arangkada sa DYAB Abante Pa, Bisaya! pagtiyabaw nga gigukod silang Abayon.

        Bisan sa iyang panghimakak sa mga pasangil, nakakita ang DepEd og igong sukaranan pagpasaka og mga kasong dishonesty, grave misconduct ug oppression batok ni Abayon.  Gisuspenso sa mosunod nga 90 ka adlaw.  Hinaot nga ang gituohang mga padrino ni Abayon di manglawgaw sa pormal nga husay sa nalangay na pag-ayong mga kaso.  [30]  leo_lastimosa@abs-cbn.com